ء«ۇشارال – دوستىق» باعىتىنداعى رەسپۋبليكالىق ماڭىزى بار اۆتوجولدىڭ 184 شاقىرىمىن جاڭعىرتۋ كوزدەلگەن. جوبانىڭ قۇنى – 61,2 ملرد تەڭگە. باس مەردىگەر – «ابك-اۆتودور نس» جشس.
بۇل رەتتە العاشقى 87 شاقىرىم بويىنشا جول قوزعالىسى 2020-2022 جىلدارى اشىلعانىن ايتا كەتەيىك. بۇگىندە جۇمىستار ەكى ۋچاسكەدە جۇرگىزىلىپ جاتىر.
ماسەلەن, قازىر 90-120 شاقىرىم ارالىعىنداعى ۋچاسكەدە 31 شاقىرىمنىڭ 30-ىندا جابىننىڭ تومەنگى قاباتىن توسەۋگە بايلانىستى جۇمىستار اياقتالىپ, بارلىق قۇبىر ورناتىلدى. قازىر جولشى ماماندار جولعا ماستيكالىق-قيىرشىق تاستى اسفالت بەتوندى توسەپ جاتىر. اتالعان جۇمىستار 16 شاقىرىمنىڭ 14,2-سىندە ىسكە اسىرىلدى. سونداي-اق قاردان قورعايتىن قورشاۋلار, باسپالداقتار مەن توسقاۋىل قورشاۋلارى ورناتۋ قولعا الىندى. بۇدان بولەك ىرعايتى وزەنى ارقىلى وتەتىن كوپىرگە ارقالىقتار قويىلىپ جاتىر. بۇگىنگە دەيىن 50 ارقالىقتىڭ 46 داناسى ورناتىلدى.
ەكىنشى ۋچاسكەگە كەلسەك, 54,2 شاقىرىمنىڭ 49,8 شاقىرىمىندا جابىننىڭ تومەنگى قاباتىن ورناتۋعا بايلانىستى جۇمىستار اياقتالدى. بارلىق سۋ وتكىزۋ قۇبىرلارى دا سالىندى. قازىر 10,73 شاقىرىمنىڭ 6,25-ىنە جابىننىڭ جوعارعى قاباتى توسەلدى. سونىمەن قاتار توقتى كوپىرىنىڭ ارالىق تىرەكتەرىن ارماتۋرا سالۋ ارقىلى نىعايتۋ, شىندالى كوپىرىنىڭ ۇستىڭگى تاقتاسىن قۇيۋ, بۇعان قوسا سۋ وتكىزۋ قۇبىرلارىن كۇشەيتۋ بويىنشا جۇمىستار ىسكە اسىرىلىپ كەلەدى. تەمىربەتون ماتەريالدارى 100%-عا دايىن تۇر.
مەردىگەردىڭ ايتۋىنشا, 90-180 شاقىرىم ارالىعىنداعى ۋچاسكەنى بيىل جەلتوقساندا پايدالانۋعا بەرۋ كوزدەلگەن.
بۇدان باسقا قر قارجى مينيسترلىگىنىڭ مەملەكەتتىك كىرىستەر كوميتەتى مەن ۇلتتىق قاۋىپسىزدىك كوميتەتىنىڭ شەكارا قىزمەتىمەن بىرلەسىپ, قازاقستان-قىتاي شەكاراسىنداعى «دوستىق» وتكىزۋ پۋنكتىنىڭ قۇرىلىسىن اياقتاۋ مەجەلەنگەن.
