اۋىل مەكتەبى اۋقىمدى جەتىستىكتەرىمەن ماقاتانادى. ماسەلەن, ۇستازداردىڭ قاجىرلى ەڭبەگىنىڭ ناتيجەسىندە مەكتەبىمىزدەن كەيىنگى 3 جىلدا ءۇش «التىن بەلگى» يەگەرى شىقتى. 5 وقۋشىمىز «ۇزدىك اتتەستات» يەگەرى اتاندى. بۇگىندە ولاردىڭ ءبارى تاڭداۋلى جوعارى وقۋ ورىندارىندا ءبىلىمىن جالعاستىرىپ جاتىر.
مەكتەبىمىزدە بىلىكتى ۇستازدار دا جەتەرلىك. ماسەلەن, 25 جىلدان اسا ەڭبەك ءوتىلى بار ءلاززات وشيموۆا مەن ءاسيا ىلياشەۆا وسى كۇنگە دەيىن تالاي شاكىرتتىڭ جولىن اشتى. وتكەن وقۋ جىلىندا اتالعان ەكى مۇعالىمنەن ءتالىم العان ەركەجان سەرىكباي, قاسىمحان قاببار, ياسمينا داۋىتحان, گۇلبارام ابىلايحان, ءاليحان بورانباي سەكىلدى وقۋشىلار رەسپۋبليكالىق كونكۋرستار مەن زياتكەرلىك سايىستاردان جۇلدەمەن ورالدى.
ماتەماتيكا ءپانىنىڭ مۇعالىمى ءمادينا ءابىلدينوۆا دا مەكتەپ ماقتانىشى ەكەنىن ايتقىم كەلەدى. ونىڭ شاكىرتتەرى دە ءبىلىم باسەكەلەرىندە بەلسەندىلىگىمەن كوزگە ءتۇسىپ ءجۇر. ونىڭ بىرنەشە وقۋشىسى اۋىل مەكتەپتەرىنىڭ 5-6-سىنىپ وقۋشىلارىنا ارنالعان «مىڭ بالا» ۇلتتىق وليمپياداسىندا توپ جاردى. ولار – نۇرفاتيما مۇراتكەن, سانجار قادىروۆ, ماليكا تولەۋ. بۇعان قوسا يسا تولەۋ مەن ايدىن ءشارىپحانوۆ تا مەكتەپ ابىرويىن اسىرىپ ءجۇر.
وسى ورايدا قازاق ءتىلى مەن ادەبيەتى ءپانىنىڭ مۇعالىمدەرى ارداق بوزعوەۆا مەن جادىرا بولاتوۆا دا اۋىل بالالارىن ايماقتىق, رەسپۋبليكالىق ءبىلىم باسەكەلەرىنە تىڭعىلىقتى باپتاپ كەلەدى. ناتيجەلەرى دە ءتاپ-ءتاۋىر.
ماماندىعىنا ادال وسىنداي مۇعالىمدەر ەڭبەك ەتەتىن اقكول مەكتەبى اۋىل بالالارىنىڭ ارمانىنا قانات ءبىتىرىپ كەلەدى. وسى جولداعى ۇستازداردىڭ ەڭبەگى جانا بەرگەي!
گۇلگاۋحار قابىلتاەۆا,
اقكول ورتا مەكتەبىنىڭ مۇعالىمى
