باس ساۋلەتشىنىڭ مالىمدەۋىنشە, قوناەۆتا قۇرىلىس 2 كەزەڭ بويىنشا جۇزەگە اسىرىلادى. ەڭ الدىمەن, قۇرىلىس ەسكى شاھار اۋماعىندا باستالادى. مۇندا اكىمشىلىك كەڭسەلەر, تۇرعىن ۇيلەر, مۇز ايدىنى, سپورتتىق-ساۋىقتىرۋ ورتالىقتارى سالىنادى. قاپشاعاي سۋ قويماسىنىڭ جاعالاۋىندا ورنالاسقان دەمالىس ورىندارىنا ورتاق ۆەلوجول, بۋلۆارلار سالۋ دا جوسپارلانىپ وتىر. سونداي-اق قاراۋسىز قالعان عيماراتتار, ەسكى ۇيلەر ءسۇرىلىپ, ورنىنا كوپقاباتتى تۇرعىن ۇيلەر بوي كوتەرمەك.
«قۇرىلىستىڭ ەسكى قالا اۋماعىندا باستالۋ سەبەبى – باس جوسپارعا سايكەس مۇندا 100 مىڭ ادام تۇرعىلىقتى مەكەن ەتەدى دەپ جوسپارلانعان. ياعني ءالى دە قالا كەلبەتىن رەتكە كەلتىرىپ, تۇرعىندار ءومىر سۇرۋگە ىڭعايلى ورتانى قالىپتاستىرۋ قاجەت. «جاڭا ىلە» اۋماعىنداعى قالانىڭ بولىگى دە 100 مىڭ تۇرعىنعا ەسەپتەلگەن. ال ەكىنشى كەزەڭ «جاڭا ىلە» توڭىرەگىنە ينجەنەرلىك جەلىلەردى تارتۋدان باستالادى. جالپى, قۇرىلىستى باستاۋ ءۇشىن ەكونوميكالىق كەشەندى جوسپار ازىرلەنىپ, ۇكىمەت قاراۋىنا ۇسىنىلادى. سودان كەيىن قارجى ءبولىنىپ, بارلىق ءىس-شارا قارقىن الماق. قازىردىڭ وزىندە شاھار تۇرعىزۋعا نيەتتى ينۆەستورلار كوپ. الايدا ولاردى تۇبەگەيلى قۇرىلىسقا تارتۋ ءۇشىن الدىمەن ينفراقۇرىلىم ماسەلەسىن شەشۋ قاجەت», دەيدى باس ساۋلەتشى ب.مۇسىلمانبەكوۆ.
باسقارما باسشىسىنىڭ ايتۋىنشا, جاۋاپتى كومپانيا وكىلدەرى 200 مىڭ تۇرعىنعا ارنالعان قالانىڭ باس جوسپارىن دايىنداۋعا 6 اي ۋاقىت جۇمساعان. ودان كەيىن جوسپارعا بىرنەشە رەت وزگەرىس ەنگىزىلىپ, جوبا قوعامدىق تىڭدالىم جانە ساراپشىلار تالقىسىنان وتكەن.
بۇعان دەيىن بەكىتىلگەن جوسپار بويىنشا شاھار كولەمى 9 مىڭ گەكتاردى قۇراسا, جاڭا جوبادا بۇل اۋماق ەكى ەسە ۇلكەيتىلگەن, ياعني 19 مىڭ گەكتارعا جوسپارلانعان.
قالانىڭ جاڭا جوباسى جاسىل جەلەكتى نىسانداردىڭ (پارك, اربورەتۋم, بوتانيكالىق باق) كوپ بولۋىمەن ەرەكشەلەنەدى. مۇنىڭ بارلىعى «جاڭا ىلە» اۋماعىندا بوي كوتەرەدى. سونداي-اق بۇل اۋماقتا ترانسپورتتىق-لوگيستيكالىق حاب بوي كوتەرەدى دەپ كۇتىلەدى. سەبەبى ەۋروپا جانە قىتاي اراسىن بايلانىستىراتىن تەمىرجول الماتى وبلىسىنىڭ جاڭا ورتالىعىندا ورنالاسقان. جوبادا اۋەجايدىڭ دا ورنى قاراستىرىلعان. جاڭا كەلبەتكە يە بولاتىن قوناەۆ قالاسىندا كەلەشەكتە كولدىڭ وڭ جانە سول جاق بولىگىن بايلانىستىراتىن اۆتوجول كوپىرى سالىنادى.
