شەكاراداعى وزەننىڭ ساعاسىندا لوتوس گۇلدەيتىن 5 گەكتارعا جۋىق القاپ بار. قىزعىلت ءتۇستى لوتوستىڭ بيىكتىگى 150 سانتيمەترگە دەيىن جەتەدى. سۋ ورتاسىندا وسەتىن سيرەك گۇل تاڭەرتەڭ قاۋىزىن اشىپ, كەشكە قايتا جابادى. لوتوس گۇلدەگەن قيعاش وزەنىنە اقتوبە – اتىراۋ – رەسەي شەكاراسى باعىتىنداعى جولمەن جەتۋگە بولادى. اتىراۋدان ارا قاشىقتىق – 300 شاقىرىمعا جۋىق.
بۇل گۇلدى ۆەتنامدىقتار تازالىقتىڭ سيمۆولى رەتىندە باعالايدى ەكەن. ءتىپتى ونىڭ ەمدىك قاسيەتى بارىنا سەنەدى. اسىرەسە تۇقىمىنداعى اقۋىز بۇيرەك پەن كوكباۋىر, جۇرەك اۋرۋى مەن ۇيقىسىزدىقتى ەمدەۋگە قولدانىلادى.
جاقىندا وسىنداي ەرەكشەلىگى بار لوتوس وسەتىن القاپ سۋرەتشىلەردىڭ تۋىندىسىنا ارقاۋ بولدى. اتىراۋ وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ءابىل جولامانوۆتىڭ ايتۋىنشا, «سۋ بەتىندەگى سۇلۋلىق» پلانەرى العاش رەت ۇيىمداستىرىلىپ وتىر. وعان الماتى, قىزىلوردا, اقتوبە جانە اتىراۋدان 10 سۋرەتشى قاتىستى.
«رەسپۋبليكالىق پلانەردى وتكىزۋ كەزىندە بىرنەشە ماقسات كوزدەلدى. بىرىنشىدەن, اتىراۋ وبلىسىنىڭ رەسەيمەن شەكاراسىنداعى قيعاش وزەنىندە وسەتىن, «قىزىل كىتاپقا» ەنگەن لوتوس گ ۇلىن كەنەپ بەتىنە ءتۇسىرۋ. ەكىنشىدەن, سۋ بەتىندەگى سۇلۋلىقتى بوياۋلار ۇندەستىگىمەن بەينەلەپ, ىشكى ءتۋريزمدى دامىتۋعا ۇلەس قوسۋ. ۇشىنشىدەن, تۋعان ولكەگە سۇيىسپەنشىلىكتى ارتتىرۋ. ءتورت وڭىردەن قاتىسقان سۋرەتشىلەر ءبىر-بىرىمەن تاجىريبە الماستى», دەيدى ءابىل جولامانوۆ.
سۋرەتشىلەر قيعاش جانە شارون وزەنىنىڭ اڭعارىنداعى تابيعات كورىنىسىن, سۋ بەتىندەگى سۇلۋلىقتى كەنەپكە بەينەلەلەگەن كومپوزيتسيا جاسادى. سۋرەتشىلەر وداعىنىڭ مۇشەسى, حالىقارالىق جانە رەسپۋبليكالىق كورمەلەرگە قاتىسقان الماتىلىق قىلقالام شەبەرى ماكسيم ۆەدەرنيكوۆتىڭ ايتۋىنشا, لوتوس القابى – تۋريستىك برەندكە سۇرانىپ تۇرعان مەكەن.
«قازاقستاندا تۋريستەردى قىزىقتىراتىن تابيعي ورىندار كوپ. بىراق سۋ ۇستىندە ءوسىپ تۇرعان لوتوس سەكىلدى القاپتى العاش رەت كوردىم. شىن مانىندە سۋ بەتىندەگى سۇلۋلىقتى كوزبەن كورۋ كەرەك», دەيدى ماكسيم ۆەدەرنيكوۆ.
قىزىلوردالىق سۋرەتشى دۋلات ايتباەۆ ش.ساريەۆ اتىنداعى كوركەمسۋرەت جانە قولدانبالى ساندىك ونەر مۋزەيىنە ەرەكشە تۋىندىسىن ۇسىندى. ول لوتوس گ ۇلىن سالۋعا كۇرىشتى پايدالانعان. پلانەرگە قاتىسقان سۋرەتشىلەر لوتوس القابىن بەينەلەگەن 21 تۋىندىسىن مۋزەيدىڭ قورىنا تاپسىردى. ال سۋرەتشىلەرگە 250 مىڭ تەڭگەنىڭ ستيپەندياسى بەرىلدى.
