دانا, ويشىل ابايدىڭ جازۋىنداعى ىزگىلىك پەن شۋاق ءالى كۇنگە دەيىن قازاق دالاسىنا جارىق بەرىپ تۇر. ونىڭ ليريكالىق جىرلارى مەن فيلوسوفيالىق كوزقاراسى قاسيەتىمەن, تەرەڭدىگىمەن قۇندى.
بەلگىلى سۋرەتشى ءا.قاستەەۆتىڭ 1945 جىلى سالىنعان «جاس اباي» سۋرەتى اقىنعا ارناپ جازىلعان باسقا پورترەتتەردەن ەرەكشە. تاريحقا كوز سالساق, 1945 جىلى اباي سۋرەتىنە ارنالعان رەسپۋبليكالىق بايقاۋ وتەدى. سول بايقاۋدا ءابىلحان قاستەەۆ تۋىندىسى – «جاس اباي» الابوتەن نازارعا تۇسكەن. سەبەبى سۋرەتشىلەردىڭ كوبىسى ابايدىڭ ەگدە جاستاعى پورترەتىن سالىپ شىقسا, قاستەەۆ قانا ەرەكشەلەنىپ, ابايدىڭ 15-16 جاستاعى جەتكىنشەك شاعىن بەينەلەگەن. «اباي جولى» ەپوپەياسىنىڭ 1-تومىنداعى «قايتقاندا» تاراۋىن وقىساق, وسى جاس, بىلىمگە ۇمتىلعان ابايدى كورەمىز.
ءا.قاستەەۆ بار شىعارماشىلىق عۇمىرىندا ابايعا ارناپ وتىزعا جۋىق كارتينا سالعان. بىراق «جاس ابايدىڭ» پورترەتى سالىنعان 1945 جىل – سۋرەتشى شىعارماشىلىعىنداعى ماڭىزدى كەزەڭ. ول بوزبالا جىگىتتىڭ ەستە قالارلىق جارقىن بەينەسىن جاساي ءبىلدى. جاس اقىننىڭ ءالى اشىلماعان مۇمكىندىكتەرىنىڭ كۇشى مەن قۋاتىن سۋرەتى ارقىلى كورسەتتى.
اۆتور بۇل كارتينانى سالۋ بارىسىندا تىكەلەي مۇحتار اۋەزوۆپەن اڭگىمەلەسىپ, ماعلۇمات جيناعان. جالپى, قاستەەۆ قانداي سۋرەت سالسا دا, الدىمەن كوزىقاراقتى ادامداردان سۇراپ سالاتىن بولعان. وسى «جاس اباي» سۋرەتىن سالاردا دا مۇحتار اۋەزوۆپەن سۇحباتتاسا وتىرىپ سالىپ شىعادى. سونىمەن بىرگە ابايدىڭ اۋىلىنا دا بارعان.
تۋىندىدا جاس اباي كىتاپ وقىپ, العان اسەرىن ءتۇۋ الىسقا قاراپ قورىتىپ تۇرعانداي بەينەلەنگەن.
