جارىستى تاماشالاۋعا اقپارات جانە قوعامدىق دامۋ ءمينيسترى دارحان قىدىرالى, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ پەن رەسپۋبليكالىق «بايگە» فەدەراتسياسىنىڭ پرەزيدەنتى قانات كوپباەۆ ارنايى كەلدى. الامان دودانىڭ اشىلۋ سالتاناتىندا ءسوز العان اقپارات جانە قوعامدىق دامۋ ءمينيسترى دارحان قىدىرالى كەيىنگى جىلدارى ەلىمىزدە ۇلتتىق سپورت تۇرلەرىنىڭ تانىمدىلىعى ارتىپ كەلە جاتقانىن تىلگە تيەك ەتتى.
ء«بىز – جەلمەن جارىسقان, جىلقىنىڭ جالىندا وسكەن جۇرتتىڭ جۇرناعىمىز. سوندىقتان جىلقى دەسە, بايگە دەسە ءبارىمىزدىڭ دەلەبەمىز قوزىپ وتىرادى. جىلقى بىزگە قانات بايلايدى, ات – ءبىزدىڭ رۋحىمىز. سول رۋحقا قىزمەت ەتىپ جۇرگەن ۇلتتىق سپورت قاۋىمداستىعى مەن رەسپۋبليكالىق «بايگە» فەدەراتسياسىنىڭ باسشىلارىنا ءوز ريزاشىلىعىمدى بىلدىرەمىن! قازاقتىڭ رۋحى ءاردايىم بيىك بولسىن! بۇگىنگى بايگەنىڭ جەڭىمپازدارىن شىن جۇرەكتەن قۇتتىقتايمىن», دەدى دارحان قۋاندىق ۇلى.
سونىمەن قاتار سالتاناتتى ءىس-شارادا ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ جارىستىڭ ماڭىزدىلىعىنا توقتالىپ ءوتتى.
«ۇلتتىق سپورتتىڭ ارتىندا ۇلتتىڭ رۋحى, ۇلتتىڭ نامىسى, تاريحى, مادەنيەتى مەن ءداستۇرى تۇر. مەملەكەت باسشىسى قاسىم-جومارت كەمەل ۇلى توقاەۆتىڭ تىكەلەي قولداۋىمەن كەيىنگى جىلدارى ەلىمىزدە ۇلتتىق سپورت تۇرلەرى قارقىندى دامىپ كەلەدى. بۇگىنگى ءبىزدىڭ جارىسىمىزدى تاماشالاۋعا ارنايى كەلگەن اقپارات جانە قوعامدىق دامۋ ءمينيسترى دارحان قۋاندىق ۇلىنا العىس ايتامىن.
بارشاڭىزعا بەلگىلى, قازىرگى تاڭدا ءبىز ەلىمىزدىڭ بارلىق وڭىرلەرىندە بايگەدەن جارىس ۇيىمداستىرىپ ءجۇرمىز. وسىناۋ جاۋاپتى ءارى يگى جۇمىستىڭ باسىندا بولىپ, بارلىق جارىستاردىڭ جوعارى دەڭگەيدە وتۋىنە اتسالىسىپ جۇرگەن رەسپۋبليكالىق «بايگە» فەدەراتسياسىنىڭ پرەزيدەنتى قانات شوقان ۇلىنا دا ريزاشىلىعىمدى بىلدىرگىم كەلەدى. كەلەسى جىلى ەلىمىزدە بەسىنشى دۇنيەجۇزىلىك كوشپەلىلەر ويىندارى وتەدى. بۇل – ءبىز ءۇشىن دە, ەلىمىز ءۇشىن دە – ماڭىزدى جوبا. بۇل جاۋاپتى ءىس-شارا بارىسىندا جارىستاردىڭ كوپتەپ ءوتۋى ۇلتتىق سپورتىمىزدىڭ دامۋىنا زور پايداسىن تيگىزەدى. ودان بولەك تە, الداعى ۋاقىتتا ءبىز ءىرى-ءىرى دودالاردى ۇيىمداستىرامىز. وسىلايشا ۇلتتىق سپورتىمىزدى بولاشاقتا الەمگە تانىتساق دەيمىز», دەدى يسلامبەك تولەۋباي ۇلى.
رەسپۋبليكالىق «بايگە» فەدەراتسياسىنىڭ پرەزيدەنتى قانات كوپباەۆ سوڭعى ۋاقىتتا بايگە سپورتىنان وتەتىن جارىستارعا كەلەتىن كورەرمەندەر سانى ارتىپ جاتقانىن قۋانا جەتكىزدى.
«ەلىمىزدىڭ وڭىرلەرىندە بايگە سپورتىنان جارىستاردى تۇراقتى تۇردە وتكىزىپ كەلەمىز. ماقساتىمىز – ۇلتتىق سپورتىمىز بايگەنىڭ تانىمدىلىعىن ارتتىرىپ, مارتەبەسىن ءوسىرۋ. ءبىر قۋانارلىعى, كۇن ساناپ بايگەگە قىزىعۋشىلىق تانىتىپ جاتقان كورەرمەندەر قاراسى كوبەيىپ جاتىر. بۇل – ءبىزدىڭ دۇرىس باعىتتا جۇمىس ىستەپ جاتقاندىعىمىزدىڭ ايقىن كورسەتكىشى», دەدى قانات شوقان ۇلى.
جۇلدە قورى 23 500 000 تەڭگەنى قۇراعان الامان بايگەگە ەلىمىزدىڭ بىرنەشە وڭىرىنەن 80-گە جۋىق تۇلپار قاتىسىپ, «قۇنان بايگە», «توپ بايگە», «جورعا جارىس», «الامان بايگە» بويىنشا سايىسقا ءتۇستى.
جارىس ناتيجەلەرىنە كەلەر بولساق, 9 شاقىرىمدىق «جورعا جارىسىندا» «سالكۇرەڭ» ەسىمدى تۇلپار (يەسى جان قوقانباەۆ) توپ جارسا, «مەسياتس ماي» ء(اليا اسقاروۆا) مەن «جۇلدىز» (شۋاق جايلاۋبەك) جۇلدەلى ورىنداردان كورىندى. 10 شاقىرىمدىق «قۇنان بايگە» جارىسىندا كومبەگە ءبىرىنشى بولىپ «لازەر» ەسىمدى تۇلپاردى تىزگىندەگەن الديار ۋايسحان جەتسە, ەكىنشى جانە ءۇشىنشى ورىندى اسلانبەك ابدىقال («قاراقات») مەن نۇرمۇقاش ءدىلنۇر («مامليۋك») ءوزارا ءبولىستى. ال 16 شاقىرىمعا جالعاسقان «توپ بايگەدە» «موي مير» ەسىمدى تۇلپاردىڭ يەسى ءامىر سەرىك باس جۇلدەنى يەلەندى. ەكىنشى ورىندا اسلانبەك ابدىقال («ابىراي») ەنشىلەسە, ءۇشىنشى ورىن بەكزات دىلداحانعا («ساكۋرا») بۇيىردى.
ۇلتتىق سپورت جانكۇيەرلەرى تاعاتسىزدانا كۇتكەن 23 شاقىرىمدىق «الامان بايگەدە» «تالحيز» ەسىمدى تۇلپارىمەن بەكزات ءدىلداحان مارەگە ءبىرىنشى جەتىپ, كوپشىلىكتىڭ قوشەمەتىنە بولەندى. ودان كەيىنگى ورىنداردى ارنات مۇراتحان («سەمسەر») مەن ارنۇر سامات ۇلى («سامال») يەلەندى. سونىمەن قاتار جارىستى ۇيىمداستىرۋشىلار ءار بايگەدە جۇلدەلى ورىندارعا سىنىق سۇيەم جەتپەي, 4 جانە 5-ورىن العان شاباندوزداردى دا اقشالاي سىيلىقپەن ماراپاتتادى.
ودان بولەك, جارىس بارىسىندا كورەرمەندەر ۇلتتىق كيىم بايقاۋىن تاماشالادى. بۇل سايىستىڭ جەڭىمپازدارىنا ۇيىمداستىرۋشىلار جالپى كولەمى 1 ميلليون تەڭگە سىياقىنى تابىستادى.
