وبلىس باسشىسى شاعىن جانە ورتا كاسىپكەرلىكتى قولداۋ جانە دامىتۋ ماقساتىندا كاسىپكەرلىكتى دامىتۋ جونىندەگى ۇلتتىق جوبا اياسىندا 180-نەن اسا جوبانىڭ قولداۋ تاپقانىن ايتىپ, بۇل باعىتتاعى قارجىلاي قولداۋ وتكەن جىلمەن سالىستىرعاندا 40 پايىزعا وسكەنىنە توقتالدى. ب.ابدىعالي ۇلى الداعى ۋاقىتتا وبلىستاعى شارۋا قوجالىقتارىن قارجىلاندىرۋ ءۇشىن قوسىمشا قاراجات ءبولۋ ماسەلەسىن كوتەردى. «قازاگروقارجى» اق-نىڭ ۇلىتاۋ وبلىسى فيليالىن اشۋ دا كۇن تارتىبىندە تۇر.
بۇرىن مونوقالا بولىپ ەسەپتەلەتىن جەزقازعان وبلىس ورتالىعىنا اينالعاندىقتان, 2024 جىلدان باستاپ بۇل «مارتەبەسىنەن» ايىرىلادى. سوعان سايكەس مونوقالالارداعى كاسىپكەرلەرگە بەرىلەتىن سالالىق شەكتەۋلەرسىز جەڭىلدىكتى نەسيە الۋ مۇمكىندىگى توقتاتىلادى. بۇل قالا كاسىپكەرلەرىنە ءبىرشاما قولايسىزدىق تۋدىراتىنى انىق. سوندىقتان دا وبلىس باسشىسى جەزقازعان كاسىپكەرلەرىن قولداۋ ءۇشىن اۋماقتىق باعدارلاما جاساۋ تۋرالى ۇسىنىس ءبىلدىردى. ق.شارلاپاەۆ بارلىق ۇسىنىسقا تۇسىنىستىك تانىتىپ, مۇمكىندىگىنشە ماسەلەلەردى وڭ شەشۋدى قاراستىراتىنىن ايتتى.
وبلىس اكىمدىگىندەگى كەزدەسۋدەن سوڭ «بايتەرەك» ۇبح» اق باسقارما توراعاسى ق.شارلاپاەۆ پەن ۇلىتاۋ وبلىسىنىڭ اكىمى ب.ابدىعالي ۇلى «دامۋ» كاسىپكەرلىكتى دامىتۋ قورىنىڭ كەڭسەسىن جانە «اگرارلىق نەسيە كورپوراتسياسى» اق-نىڭ ۇلىتاۋ فيليالىن اشۋ سالتاناتتارىنا قاتىستى. بۇل ەكى ۇيىمنىڭ دا ايماقتاعى شاعىن جانە ورتا بيزنەستى دامىتۋعا قوسىپ وتىرعان ۇلەسى قوماقتى. ايتالىق, «دامۋ» قورى ارقىلى قازىر وبلىس بويىنشا بيىلعى 7 اي مەرزىمدە جالپى نەسيە سوماسى 9,7 ملرد تەڭگە قۇرايتىن 211 جوبا قولداۋ تاپتى. وڭىردەگى جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 19 مىڭعا جۋىق. مۇنداعى بولشەك تاۋار اينالىمىنىڭ كولەمى 45,4 ملرد تەڭگەنى قۇرايدى. ەندىگى ماقسات – كاسىپكەرلەرگە ودان ءارى قولداۋ, كومەك كورسەتۋدى ۇلعايتا بەرۋ.
«اگرارلىق نەسيە كورپوراتسياسى» اق ۇلىتاۋ فيليالىنىڭ ديرەكتورى ءىلياس بەكماعامبەتوۆ نەسيەلەندىرۋ 4 باعىت بويىنشا جۇرگىزىلەتىنىن ايتادى. ونىڭ ايتۋىنشا, «اگروبيزنەس» باعىتى بويىنشا وبلىستا قۇنى 1,3 ملرد تەڭگە قۇرايتىن 43 نەسيە, «ىسكەر» باعىتىمەن 352 ملن تەڭگەلىك 73 نەسيە بەرىلگەن. «جاستارعا – شاعىن نەسيە» باعىتى 21-35 جاس ارالىعىنداعى جاس كاسىپكەرلەردى قولداۋعا باعىتتالعان. نەسيە 5 ملن تەڭگەگە دەيىن 2,5 پايىزدىق مولشەرلەمەمەن بەرىلەدى. بۇگىنگى تاڭدا وبلىستىڭ 26 جاس كاسىپكەرى وسى مۇمكىندىكتى پايدالانىپ, ءوز ءىسىن دوڭگەلەتە باستادى. «كەڭ دالا» باعىتى شارۋالاردى كوكتەمگى-كۇزگى جيىن-تەرىم كەزىندە قولداۋ باعىتىن كوزدەيدى.
«مەن ميبۇلاق اۋىلدىق وكرۋگىنە قاراستى «كوكتوبە» شارۋا قوجالىعىن باسقارامىن. وسى قوردىڭ كومەگىمەن جەڭىلدىكتى نەسيە ارقىلى اسىل تۇقىمدى مال ساتىپ الدىق. قازىر شارۋامىز جاقسى. سوندىقتان قوردىڭ وبلىستاعى فيليالىنىڭ اشىلۋى شارۋالاردى نەسيەلەندىرۋ ىسىندە تىڭ سەرپىن بەرەدى دەپ ويلايمىن», دەيدى بىزبەن اڭگىمەسىندە وبلىستىق ءماسليحاتتىڭ دەپۋتاتى گۇلناز وماروۆا.
بيىل «اگرارلىق نەسيە كورپوراتسياسى» اق-نىڭ ۇلىتاۋ فيليالى 3,2 ملرد تەڭگە كولەمىندە نەسيەلىك قارجىلاندىرۋدى جۇزەگە اسىرۋدى جوسپارلاپ وتىر. ەگەر وتكەن 7 ايدا وبلىس بويىنشا 1,8 ملرد تەڭگەدەن اسا نەسيە قارجىلاندىرىلعانىن ەسكەرسەك, ايماقتا اتالعان قوردىڭ مۇمكىندىكتەرىن پايدالانۋعا دەگەن قۇشتارلىقتىڭ زور ەكەنىن بايقاۋعا بولادى.
«قازىر مەملەكەت تاراپىنان وتاندىق كاسىپكەرلەردى قولداۋعا بارىنشا مول مۇمكىندىك جاسالعان. ءبىزدىڭ كاسىپكە دەن قويعان ازاماتتارىمىز «دامۋ», «اگرارلىق نەسيە كورپوراتسياسى» جانە ت.ب. قورلاردىڭ مۇمكىندىكتەرىن پايدالانۋعا ۇمتىلۋى قاجەت, ءبىز حالىققا قارجىلىق كوزدەردى كورسەتىپ, تۇسىندىرە ءبىلۋىمىز كەرەك», دەگەن ق.شارلاپاەۆ ايماقتىڭ دامۋىنداعى شاعىن جانە ورتا بيزنەستىڭ ۇلەسى ولشەۋسىز ەكەنىن ايرىقشا اتاپ كورسەتتى. ول كاسىپكەرلىكتىڭ مەملەكەت قولداۋى ارقىلى داميتىنىنا دا نازار اۋداردى.
