وسىدان ءبىر اپتا بۇرىن زاگرەبتەگى «ماكسيمير» ستاديونىندا وتكەن ەكى كلۋب اراسىنداعى العاشقى ويىندا الاڭ قوجايىندارى «استانا» قاقپاسىنا جاۋاپسىز ءتورت گول سوعىپ, كەلەسى كەزەڭنىڭ ماسەلەسىن حورۆاتيادا شەشىپ قويعان بولاتىن. دەگەنمەن ەلوردا كلۋبىنىڭ جانكۇيەرلەرى استاناداعى جاساندى الاڭنىڭ «جاقتاسۋىمەن» «استانا ارەناداعى» قارىمتا ماتچتان ءبىر كەرەمەتتىڭ بولارىنان ءۇمىتتى ەدى. ويتكەنى فۋتبول تاريحىندا عانا ەمەس, «استانا» تاريحىندا دا بۇعان دەيىنگى ەۋروكۋبوك باسەكەلەرىندە كەرەمەت كامبەكتەردىڭ كۋاسى بولعانبىز. بىراق «استانا» فۋتبولشىلارى بۇل جولى كامبەك جاساۋ بىلاي تۇرسىن, ەلورداداعى اپتاپ ىستىققا قاراماستان كوماندانى قولداۋعا كەلگەن جانكۇيەرلەردى ءبىر گولمەن دە قۋانتا المادى.
ماتچتىڭ 24-مينۋتىندا حورۆاتيا كلۋبىنىڭ ازەربايجاندىق شابۋىلشىسى ماحير ەمرەلي يوسيپ چوندريچ قورعاعان قاقپانىڭ الىس بۇرىشىن ءدال كوزدەپ, ويىننىڭ ەسەبىن اشتى. ارادا جەتى مينۋت وتكەندە ەمرەلي قورعاۋشىلارىمىزدىڭ قورعانىستاعى قاتەلىگىنەن كەيىن باسەكەدەگى ەكىنشى گولىن سوققان ەدى. ابىروي بولعاندا, تورەشىلەر گولدىڭ ويىننان تىس جاعدايدا سوعىلعانىن بايقاپ, گولدى ەسەپتەمەي قويدى. ءسويتىپ, ءبىرىنشى تايم قوناقتار-
دىڭ ايقىن باسىمدىعىمەن اياقتالدى.
ەكىنشى تايمدا «استانانىڭ» باس باپكەرى گريگوري بابايان ءبىرىنشى تايمدا ويناعان ۆلاديسلاۆ پروكوپەنكو مەن مارين توماسوۆتىڭ ورنىنا دەمبو داربو جانە دۋشان ءيوۆانچيچتى شىعارسا, ءسال كەيىنىرەك ابات ايىمبەتوۆتى ەلحان استانوۆقا الماستىرعان سوڭ, ەلوردالىقتاردىڭ ويىنىندا وڭ وزگەرىس بايقالا باستادى. «استانا» فۋتبولشىلارى ەكىنشى 45 مينۋتتا دوپتى ءوز باقىلاۋلارىندا كوپ ۇستاپ, «دينامو» قاقپاسىنا سەگىز مارتە سوققى جاسادى. وكىنىشكە قاراي, بۇل شابۋىلداردىڭ ءبارى دە ناتيجەسىز اياقتالدى. ەسەسىنە, ماتچتىڭ اياقتالۋىنا ءبىر مينۋت قالعاندا انتونيو مارين مەرگەندىگىمەن كوزگە ءتۇسىپ, ويىننىڭ نۇكتەسىن قويدى – 2:0.
ەندى «استانا» فۋتبولشىلارى ەۋروكۋبوگتەگى جارىس جولىن ەۋروپا ليگاسىندا جالعاستىرادى. بۇل ءتۋرنيردىڭ ءۇشىنشى كەزەڭىندە جەرلەستەرىمىز بولگاريا چەمپيونى – «لۋدوگورەتس» كلۋبىمەن كەزدەسەدى. بولگاريالىق ۇجىم دا جارىستى چەمپيوندار ليگاسىنان باستاپ, ەكىنشى كەزەڭدە سلوۆەنيالىق «وليمپيادان» جەڭىلگەن سوڭ, «استانا» سياقتى چەمپيوندار ليگاسىنان شىعىپ قالعان بولاتىن.
«استانا» مەن «لۋدوگورەتس» اراسىنداعى ەۋروپا ليگاسىنىڭ ءۇشىنشى ىرىكتەۋ كەزەڭىنىڭ العاشقى ويىنى 8 تامىزدا ەلوردادا, قارىمتا كەزدەسۋ 15 تامىز كۇنى رازگراد قالاسىندا وتەدى دەپ جوسپارلانعان.
