ماجارستاننىڭ پوماز قالاسىندا وتكەن حالىقارالىق جامبى اتۋ جارىسىنىڭ التىن جۇلدەسىن جەڭىپ العان ماديار شارىپبايعا جانە يتاليانىڭ اسسيني قالاسىندا ۇيىمداستىرىلعان جاسوسپىرىمدەر اراسىنداعى حالىقارالىق بوكس تۋرنيرىندە جەڭىمپاز اتانعان مارال تولەپبەرگەنگە اۋدان اكىمىنىڭ العىسحاتى تابىستالدى.
«وكرۋگىمىزدە بۇقارالىق سپورتتى دامىتۋعا ەرەكشە كوڭىل ءبولىنىپ كەلەدى. بۇل – حالىقتىڭ دەنساۋلىعىن نىعايتۋعا, سالاماتتى ءومىر سالتىن ناسيحاتتاۋعا ىقپال ەتەدى. ەڭ باستىسى, سپورتتى سۇيەتىن, ونى كۇندەلىكتى ءومىر ءسۇرۋ داعدىسىنا اينالدىرعان مىقتى جاستارىمىز ءوسىپ كەلەدى. ولاردىڭ تولىمدى جەتىستىكتەرىنىڭ ارقاسىندا چەمپيوندار اۋىلى اتانىپ جاتىرمىز. سوندىقتان ەل ءۇمىتىن, سەنىمىن ارقالاعان سپورتشىلارىمىزعا اركەز قولداۋ بىلدىرەمىز», دەدى اتالعان وكرۋگتىڭ اكىمى مارات سۇگىربەكوۆ.
سالتاناتتى جيىندا ۇزدىك سپورتشىلار مەن ولاردىڭ باپكەرلەرىنە اۋداندىق ءماسليحاتتىڭ حاتشىسى بەكەت احمەتوۆتىڭ اتىنان دا العىسحات تابىس ەتىلسە, اۋداندىق ءماسليحات دەپۋتاتى مۇحيت ديقانالى ۇلى چەمپيوندارعا اۋىل جاستارى اتىنان باعالى سىيلىقتار تارتۋ ەتتى.
اۋىل اقساقالدارى مەن ۇستازدارى قوس جەڭىمپازدى قۇتتىقتاي كەلە كەلەشەكتەرىنە اق جول تىلەدى. «بۇعان دەيىن دە وبلىستىق, رەسپۋبليكالىق جارىستاردا توپ جارىپ, سونىڭ ناتيجەسىندە شىڭدالىپ, حالىقارالىق جارىسقا جولداما الدىم. ماجارستاندا وتكەن جامبى اتۋ جارىسىنا الەمنىڭ 14 ەلىنەن 26 مەرگەن قاتىستى. بارلىعىمىز اڭ اتۋ ستيلىندە ونەر كورسەتتىك. باسەكەلى جارىستا باعىم جانىپ, قارسىلاستارىمنان باسىم ءتۇستىم. جەڭىسكە جەتۋ جولىندا ايانباي تەر توگىپ, جۇيەلى جاتتىقتىم. جامبى اتۋدىڭ ەرەكشەلىگى – ۇنەمى ءوز-وزىڭمەن كۇرەسۋدى تالاپ ەتەدى. الداعى ۋاقىتتا بۇدان دا بيىك بەلەستەردى باعىندىرعىم كەلەدى», دەدى حالىقارالىق جارىستىڭ جەڭىمپازى ماديار ءشارىپباي.
ءبىز دە ەل نامىسىن قورعاۋشى ءجاسوسپىرىم سپورتشىلارعا اق جول تىلەدىك.
