باسكەتبولدان ايەلدەر اراسىنداعى ۇلتتىق قۇرامانىڭ مەنەدجەرى جانە باپكەرلەر قۇرامىنىڭ مۇشەسى ازامات ابدۋلكارىموۆتىڭ ايتۋىنشا, قازاقستان قۇراماسى بيىلعى ازيا كۋبوگىندە ب ديۆيزيوننان ا ليگاسىنا شىعۋدى ماقسات ەتىپ وتىر.
«ەلوردادا وقۋ-جاتتىعۋ جيىنىن وتكىزىپ جاتقانىمىزعا ءبىر اپتادان استى. الدا ءالى تولىق تاعى ءبىر اپتا جاتتىعامىز. وتكەن جەتىدە قىزدارىمىز دەنە دايارلىعى جاتتىعۋلارىن وتكىزسە, بۇدان بىلاي كوبىرەك تاكتيكاعا كوڭىل بولەمىز. ەلىمىزدە ايەلدەر باسكەتبولى ەندى-ەندى قانات جايىپ, دامۋدىڭ داڭعىل جولىنا ءتۇسىپ كەلە جاتىر. ىشكى چەمپيوناتتا وينايتىن كوماندالاردىڭ دا قاتارى جىل سايىن ارتىپ كەلەدى. بۇل, ارينە, ەڭ ءبىرىنشى كەزەكتە ىشكى باسەكەلەستىكتى ارتتىرادى. ال باسەكە بار جەردە كەز كەلگەن سالا العا قاراي جىلجيتىنى ايتپاسا دا تۇسىنىكتى. سوعان قاراماستان, الداعى ازيا كۋبوگى جارىسىندا جوعارى توپقا قوسىلۋ ءۇشىن بار كۇشىمىزدى سالامىز. قىزدارىمىز بانگكوكتا يوردانيا, تايلاند جانە شري-لانكا قۇرامالارىمەن شەبەرلىك بايقاسادى. توپتاعى باستى قارسىلاسىمىز يوردانيا قۇراماسى بولماق. تايلاند سپورتشىلارى دا ءوز الاڭىندا, جانكۇيەرلەرىنىڭ قولداۋى اياسىندا وينايتىن بولعان سوڭ, ولار دا ايانىپ قالمايتىنى انىق», دەدى ا.ابدۋلكارىموۆ.
ال باسكەتبول فەدەراتسياسىنىڭ پرەزيدەنتى اباي الپامىسوۆ ۇلتتىق قۇرامانىڭ ىشكى پروبلەماسىنا توقتالىپ, قارجىنىڭ ازدىعىنا بايلانىستى سپورتشىلار سارى قۇرلىق باسەكەسىنىڭ الدىندا ءبىر عانا وقۋ-جاتتىعۋ جيىنىن وتكىزۋگە ءماجبۇر ەكەنىن ايتتى.
«قىزدارىمىز ازيا كۋبوگى جارىسى الدىندا جوسپارلانعان وقۋ-جاتتىعۋ جيىنىن وتكىزىپ جاتىر. نەگىزى مۇنداي بايراقتى دودالاردىڭ الدىندا سپورتشىلار كەمىندە ەكى-ءۇش جاتتىعۋ جيىنىنان ءوتۋى كەرەك. شەتەلدەردە شىنىعىپ, مىقتى قۇرامالارمەن سپاررينگ-جاتتىعۋ وتكىزگەنى قىزدارىمىزعا الداعى ماڭىزدى جارىس الدىندا ۇلكەن سەپتىگىن تيگىزەر ەدى. ءبىز قازىر دەمەۋشى, قوسىمشا قارجى تارتۋ بويىنشا جۇمىس ىستەپ جاتىرمىز. الداعى ۋاقىتتا جاتتىعۋلار سانىن كوبەيتۋگە تىرىسامىز», دەدى فەدەراتسيا باسشىسى.
باسكەتبولدان ايەلدەر اراسىنداعى ازيا كۋبوگىنىڭ ا توبىندا يندونەزيا, يران, مالايزيا جانە موڭعوليا قۇرامالارى كۇش سىناسسا, قازاقستان قۇراماسى ب توبىندا شري-لانكا, تايلاند جانە يوردانيا قىزدارىمەن شەبەرلىك بايقاسادى. 8 قۇراما ىشىندە جەڭىسكە جەتكەنى 2025 جىلى وتەتىن ازيا كۋبوگىنىڭ ا ديۆيزيونىنا جولداما الادى.
قازاقستان قۇراماسىنىڭ
ويىندار كەستەسى:
13 تامىز 2023: قازاقستان – شري-لانكا
14 تامىز 2023: تايلاند – قازاقستان
15 تامىز 2023: قازاقستان – يوردانيا
17-18-19 تامىز: پلەي-وفف كەزەڭى
