«دارىن» جاستار مەملەكەتتىك سىيلىعىن بەرۋ ەرەجەسى وزگەرەدى

اتاپ ايتقاندا, «دارىن» مەملەكەتتىك جاستار سىيلىعىنىڭ نوميناتسياسىنا «شىعارماشىلىق باستامالار» قوسىلدى.

ەندى سىيلىق كەلەسى نوميناتسيالار بويىنشا بەرىلەدى:

1. ادەبيەت;

2. عىلىم;

3. ديزاين جانە بەينەلەۋ ونەرى;

4. جۋرناليستيكا;

5. كلاسسيكالىق مۋزىكا;

6. شىعارماشىلىق باستامالار

7. سپورت;

8. تەاتر جانە كينو;

9. ترەند;

10. حالىق ونەرى.

بۇعان دەيىن تىزىمدە «قوعامدىق قىزمەت» بولعان.

سونداي-اق ءبىرىنشى كەزەڭدە جان-جاقتى قاراستىرۋ ماقساتىندا كوميسسيا مۇشەلەرى اراسىنان «ەسترادا, كلاسسيكالىق مۋزىكا, حالىق شىعارماشىلىعى», «ادەبيەت, تەاتر جانە كينو», «جۋرناليستيكا جانە شىعارماشىلىق باستامالار», «سپورت», «ديزاين جانە بەينەلەۋ ونەرى», «عىلىم» باعىتتارى بويىنشا التى سەكتسيا قۇرىلاتىنى ايتىلدى.

ودان بولەك, مەملەكەتتىك سىيلىقتى بەرۋ شارتتارى دا وزگەرەتىنى قوسا حابارلاندى. دالىرەك ايتقاندا, ۋاكىلەتتى ورگان كوميسسيا شەشىمى نەگىزىندە جىلدىڭ 10 جەلتوقسانىنا دەيىن (بۇرىن 15 قازانعا دەيىن) سىيلىقاقى تاعايىنداۋ تۋرالى بۇيرىق شىعارادى.

جۇلدەنى بەرۋ تۋرالى بۇيرىق تاۋەلسىزدىك كۇنىنە (16 جەلتوقسان) دەيىن بۇقارالىق اقپارات قۇرالدارىندا جانە ۋاكىلەتتى ورگاننىڭ ينتەرنەت-رەسۋرسىندا جاريالانادى دەپ كوزدەلۋدە. بۇعان دەيىن ول رەسپۋبليكا كۇنى (25 قازان) جاريالانعان بولاتىن.

ماراپاتتار تاۋەلسىزدىك كۇنىنە ارنالعان سالتاناتتى جاعدايدا تابىس ەتىلەدى.

ۋاكىلەتتى ورگان اقشالاي سىيلىقتى ءتيىستى جىلدىڭ 20 جەلتوقسانىنان كەشىكتىرمەي جۇلدە يەگەرىنىڭ بانكتىك شوتىنا اۋدارادى.

قۇجات 17 تامىزعا دەيىن قوعامدىق تالقىلاۋ ءۇشىن اشىق نقا ۆەب-سايتىندا ورنالاستىرىلعان.