ۇكىمەت شارت تالاپتارىن بۇزعان جەر قويناۋىن پايدالانۋشىلارمەن جاسالعان كەلىسىمشارتتار مەن ليتسەنزيالاردى قايتا قاراۋ بويىنشا جۇمىس جۇرگىزىپ جاتىر. وسىلايشا, جۇرگىزىلگەن تالداۋ ناتيجەلەرىنە سايكەس ۋاكىلەتتى ورگاندار 118 كەلىسىمشارتتى (2023 جىلدىڭ باسىنان بەرى – 19 كەلىسىمشارت) جانە قاتتى پايدالى قازبالار (پقق) بويىنشا 245 ليتسەنزيانى (2023 جىلدىڭ باسىنان بەرى – 42 ليتسەنزيا), سونداي-اق كومىرسۋتەك شيكىزاتى بويىنشا 27 كەلىسىمشارتتى (2023 جىلدىڭ باسىنان بەرى – 15 ليتسەنزيا) بۇزدى.
ناتيجەسىندە التىن, كومىر, تەمىر, مىس, كومىرسۋتەكتەر, بوكسيتتەر, پوليمەتالدار جانە ت. ب. كەن ورىندارى مەملەكەتتىك قورعا قايتارىلدى, ولار كەيىننەن جاڭا ينۆەستورلارعا بەرۋ ءۇشىن اشىق اۋكتسيونعا شىعارىلادى. بۇل جەر قويناۋىن پايدالانۋ سالاسىندا قوسىمشا ينۆەستيتسيالار اعىنىن قامتاماسىز ەتەدى.
قازىرگى تاڭنىڭ وزىندە 2023 جىلى وتكىزىلگەن اۋكتسيونداردىڭ قورىتىندىسى بويىنشا ەل بيۋدجەتىنە 1,5 ملرد تەڭگە كولەمىندە قول قويۋ بونۋسى تولەندى. بۇل رەتتە كومىرسۋتەگى شيكىزاتىن بارلاۋ بويىنشا جاڭا ينۆەستيتسيالار 15,7 ملرد تەڭگەدەن اسادى.
جەر قويناۋىن پايدالانۋ قۇقىعىن بەرۋ بويىنشا اۋكتسيونعا بارلىق مۇددەلى ينۆەستورلار قاتىسا الادى. ولاردى وتكىزۋ تۋرالى اقپارات مىندەتتى تۇردە رەسپۋبليكالىق مەرزىمدى باسىلىمداردا جانە مەملەكەتتىك ورگانداردىڭ ينتەرنەت-رەسۋرستارىنا ورنالاستىرىلادى.
بۇل رەتتە ۋاكىلەتتى ورگاندار قارجىلىق مىندەتتەمەلەردى بۇزعان جەر قويناۋىن پايدالانۋشىلارعا ايىپپۇل سانكتسيالارىن قولدانۋ بويىنشا جۇمىس جۇرگىزىپ جاتىر. وسىلايشا, مەملەكەت ەسەبىنە قاتتى پايدالى قازبالار بويىنشا 934 ملن تەڭگە ايىپپۇل ءوندىرىلدى (2023 جىلدىڭ باسىنان بەرى 603 ملن تەڭگە), سونداي-اق كومىرسۋتەك شيكىزاتى سالاسىنداعى 9 كەلىسىمشارت بويىنشا 1,94 ملرد تەڭگە بەرەشەك وتەلدى.
ۇكىمەتتىڭ جەر قويناۋىن پايدالانۋ سالاسىن ودان ءارى دامىتۋ جونىندەگى جۇمىسى جالعاسادى.
