– وسى جىلى «اۋىل ەل بەسىگى» اياسىندا 488,7 ملن تەڭگە بولاتىن 12 جوبا باستالدى, وبلىستىق بيۋدجەتتەن 335,2 ملن تەڭگەلىك تاعى 19 جوباعا قارجى قارالعان. وسىلايشا, «قىزىلوردا – ايدارلى – تارتوعاي» جانە «شىمكەنت – سامارا – تەرەڭوزەك» اۆتوموبيل جولى قايتا جوندەلەدى. اۋدانداعى توزىعى جەتكەن ەلەكتر جەلىلەرىن جاڭعىرتۋ دا باستالىپ كەتتى. ايدارلى, امانكەلدى, جەتىكول, قوعالىكول, شاعان ەلدى مەكەندەرىنىڭ ەلەكتر باعانالارى مەن جەلىلەرى جانە ترانسفورماتورلارى تولىق جاڭارتىلادى. ال تەرەڭوزەك كەنتى, قالجان احۋن, ا.توقماعامبەتوۆ, س.سەيفۋللين ەلدى مەكەندەرىنە جاڭا ەلەكتر جەلىلەرىن ورناتۋعا دەمەۋشىلەر كومەك قولىن سوزادى, – دەيدى اۋدان اكىمى بەرىك سارمەنباەۆ.
ىسكەر ازاماتتار اۋىز سۋ قۇبىرىن جاڭارتۋعا دا كومەك بەرەدى. وسىنىڭ ناتيجەسىندە شاعان جانە قوعالىكول ەلدى مەكەندەرى اۋىز سۋمەن تولىق قامتىلماق.
بيىل اۋداندا ونەركاسىپ ءوندىرىسى 68,5 پايىزعا ۇلعايىپ, وڭدەۋ ونەركاسىبى 3,4 پايىزعا, اۋىل, ورمان جانە بالىق شارۋاشىلىعىنىڭ ءونىمى 1,4 پايىزعا ارتقان. ينۆەستيتسيا تارتۋ 72,4 پايىزعا ءوسىپتى. جىل سوڭىنا دەيىن قۇنى 1,9 ملرد تەڭگە بولاتىن 10 ينۆەستيتسيالىق جوبانى جۇزەگە اسىرۋ جوسپارلانىپ وتىر. ءتۇرلى قارجى ۇيىمدارى جەڭىلدەتىلگەن نەسيە الۋ ءۇشىن بەرىلگەن 49 جوبانىڭ قۇجاتتارىن قاراۋدا.
سىرداريالىقتار, اسىرەسە «اۋىل اماناتى» باعدارلاماسىنا بەلسەنە قاتىسىپ وتىر. وسى كۇنى 3 ملرد تەڭگەنى قۇرايتىن 489 جوبانىڭ قۇجاتى دايىندالىپ, «بايقوڭىر» الەۋمەتتىك كاسىپكەرلىك كورپوراتسياسى» اكتسيونەرلىك قوعامىنا ۇسىنىلعان.
قازىر اۋداندا 3 247 شاعىن جانە ورتا كاسىپكەرلىك سۋبەكتىسى جۇمىس ىستەپ تۇر. بيىلعى جارتى جىلدا مەملەكەتتىك جانە وڭىرلىك باعدارلامالار اياسىندا 184 جوباعا قارجىلاي قولداۋ كورسەتىلگەن.
سىرداريانىڭ نەگىزگى تىرشىلىگى – اۋىل شارۋاشىلىعى. اۋدانداعى ەگىس كولەمى جىل سايىن ارتىپ كەلەدى. بيىل ونىڭ اۋماعى 7,8 پايىزعا ۇلعايعان. اۋدان ديقاندارى كوكتەمدە ەككەن 35 مىڭ 732 گەكتاردىڭ 23 مىڭ 500 گەكتارى – كۇرىش.
– بىرنەشە جىلعا سوزىلىپ كەلە جاتقان سۋ تاپشىلىعى اگرارلىق سالانىڭ الدىنا كەسەكولدەنەڭ تۇرعان ماسەلەگە اينالعانىن بىلەسىزدەر. وسىعان بايلانىستى وبلىس اكىمىنىڭ قولداۋىمەن بىلتىر شارۋاشىلىقتارعا 22 ناسوس الىندى. بيىل قوسىمشا تاعى تورتەۋى اكەلىندى. بۇرىننان قولدا باردى قوسقاندا قازىر اۋداندا وسىنداي 32 قوندىرعىمەن ەگىنگە سۋ جەتكىزىلىپ جاتىر. وتكەن جىلدان بەرى وبلىستا ايماق باسشىسىنىڭ تاپسىرماسىمەن ازىق-ت ۇلىك قاۋىپسىزدىگىن قامتاماسىز ەتۋ ءۇشىن تۇرعىندارعا باقشا داقىلدارىن ەگۋگە مۇمكىندىك جاسالعانى بەلگىلى. بىلتىر اۋداندا 210 گەكتار قوسىمشا جەر اشىلىپ, 865 وتباسى باقشا داقىلدارىن ەككەن بولاتىن. بيىل جەر كولەمى 359 گەكتارعا دەيىن ۇلعايىپ, 1 105 ۇيەلمەن الەۋمەتتىك ماڭىزى بار كارتوپ, كوكونىس, باقشا ونىمدەرىن ەگىپ الدى. اسىرەسە بۇل باعىتتا جاستاردىڭ ەرەكشە قۇلشىنىس تانىتىپ وتىرعانىن ايتا كەتكەنىمىز ورىندى بولار. بىلتىر 2 اۋىلدا جاستار بريگاداسى 20 گەكتارعا ەگىن ەكسە, وسى جىلى تاعى 4 ەلدى مەكەندە بريگادالار قۇرىلىپ, باقشا داقىلدارى ەگىلگەن القاپ كولەمى ۇلعايدى, – دەيدى اۋدان اكىمى.
سىرداعى اۋىلدارعا دا تابيعي گاز جەتكىزىلە باستاعالى ءبىراز بولدى. ەندى وت جاعىپ, كۇل شىعارۋدان قۇتىلاتىن ەلدى مەكەندەر قاتارىنا سىرداريا اۋدانىنداعى قالجان احۋن, س.سەيفۋللين, ا.توقماعامبەتوۆ, شاعان ەلدى مەكەندەرى قوسىلادى. بۇل ءۇشىن رەسپۋبليكالىق بيۋدجەتتەن قارجى ءبولىنىپ, گاز جەلىلەرى جۇرگىزىلەدى.
اۋدانداعىلار دەمەۋشىلىك ەسەبىنەن جاسالعان ن.ءىلياسوۆ اۋىلىن گازداندىرۋ جوباسىنا بيۋدجەتتىك ءوتىنىم ۇسىنىپتى, كوپ ۇزاماي بەسارىق, اقجارما ەلدى مەكەندەرىن كوگىلدىر وتىنمەن قامتۋ جوبالارى قولعا الىنباق.
