«كەلەشەك» جاستار كەڭەسى – كاسىپوداق بىرلەستىگىنىڭ قۇرامىنداعى جاستار ساياساتىن ۇيلەستىرۋشى ۇيىم. وعان ەڭبەكشى جاستاردىڭ الەۋمەتتىك, ەڭبەك قاتىناستارىنداعى قۇقىقتارى مەن مۇددەلەرىن زاڭ اياسىندا قورعاۋ, جاستاردىڭ كۇندەلىكتى تۇرمىستاعى وزەكتى ماسەلەلەرىن شەشۋ, جاستاردىڭ ستارت-اپ جوبالارىن ىسكە اسىرۋ, سونىمەن قاتار ولاردى كاسىپوداق قۇرامىنا تارتۋ, ت.ب. مىندەتتەر جۇكتەلگەن.
– ءبىزدىڭ ەڭ باستى ماقساتىمىز جۇمىسشى جاستارعا قولايلى جاعداي جاساۋ. الەۋمەتتىك ەڭبەك سالاسىندا پروبلەمالار بار, سونىڭ ىشىندە جالاقىنىڭ ءوسۋى, ەڭ تومەنگى جالاقىنى كوتەرۋ, قاۋىپتى جانە قيىن ەڭبەك جاعدايلارىندا جۇمىس ىستەيتىن ادامدار ءۇشىن زەينەتكەرلىك جاستى تومەندەتۋ جانە باسقالارى. بۇل ماسەلەلەردى شەشۋدىڭ مىسالدارى فەدەراتسيانىڭ 2025 جىلعا دەيىنگى ستراتەگياسىندا كورسەتىلگەن جانە ءبىز ءۇشىن جاستاردىڭ بەلسەندى قاتىسۋى العا قويىلعان ماقساتتار ءۇشىن ماڭىزدى. پروگرەسس ەسكى ماسەلەلەردى شەشۋدە جاڭا تاسىلدەر پايدا بولعان كەزدە مۇمكىن بولادى. ياعني جاستاردىڭ قۇقىعىن قورعاۋ, مۇددەسىن قورعاۋ. قانداي دا ءبىر ۇسىنىستارى بولسا, قانداي دا ءبىر جوبا ۇيىمداستىرعىسى كەلسە, ءبىز وسى مەموراندۋمنىڭ اياسىندا ولارعا كومەك كورسەتە الامىز, – دەدى كاسىپوداقتار فەدەراتسياسى جانىنداعى «كەلەشەك» جاستار كەڭەسىنىڭ توراعاسى ايان سالىمگەرەەۆ.
بۇگىندە تاراپتار ەڭبەك قۇندىلىقتارىن ناسيحاتتاپ, جاستاردىڭ ءوزىن ءوزى جۇمىسپەن قامتۋىنا جاعداي جاساماق. اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى روللان قۇسپاننىڭ ايتۋىنشا, قازىر 35 جاسقا دەيىنگى ازاماتتارعا ۆەدومستۆو تاراپىنان جۇيەلى قولداۋ جاسالادى.
– قازىر ەلىمىزدە 15-كە جۋىق رەسپۋبليكالىق جاستار ۇيىمى جۇمىس ىستەپ تۇر. ولارعا ءبىز ءوزىمىزدىڭ تاراپىمىزدان قولداۋ كورسەتىپ وتىرامىز. بۇگىندە ازاماتتىق باستامالاردى قولداۋ ورتالىعى ارقىلى وسى ۇيىمداردى قارجىلاندىرۋ, گرانتتار ءبولۋ جۇمىستارى ۇيلەستىرىلەدى, – دەدى ول.
بيىل كاسىپوداقتار فەدەراتسياسىنىڭ جاستار كەڭەسىنىڭ الدىندا تەك ۇلتتىق ەمەس, حالىقارالىق دەڭگەيدەگى مىندەتتەر تۇر. «كەلەشەك» ۇيىمى ەلىمىزدىڭ اتىنان ورتالىق ازيا ەلدەرىنىڭ كاسىپوداقتارى جانىنان جاستار كەڭەسىن قۇرىپ, توراعالىق ەتپەك.
