الماتى قالاسى اكىمدىگى جوبالىق كەڭسەسىنىڭ مالىمەتىنشە, قۇرىلىس مەكتەپكە ءزارۋ ەلدى مەكەندەردە جۇرگىزىلەدى. قازىرگى ۋاقىتتا جوبالىق-سمەتالىق قۇجاتتاردى ازىرلەۋ جۇمىستارى باستالدى. مەكتەپتەردىڭ قۇرىلىسى بيىل قاراشا ايىندا ساراپتامادان وتكەننەن كەيىن قولعا الىنباق. قالا اكىمدىگى مەن بىرقاتار اۋدانداعى جەر تەلىمدەرىنىڭ يەلەرى سەگىز مەكتەپتىڭ قۇرىلىسى تۋرالى مەموراندۋمعا قول قويۋ جۇمىستارىن ىسكە اسىرىپ جاتىر. جاڭا فورماتتاعى مەكتەپتەر بويىنشا الاتاۋ, ناۋرىزباي اۋداندارىندا – 5 مەكتەپتەن, بوستاندىق اۋدانىندا – 4, تۇركسىب اۋدانىندا – 3, اۋەزوۆ اۋدانىندا – 2, ال قالعان اۋدانداردا ءبىر-بىردەن سالۋ جوسپارلانىپ وتىر.
جۋىردا الماتى قالاسىنىڭ اكىمى ەربولات دوساەۆ «الماتىباسجوسپار» عزي» جشس, «Samruk-Kazyna Construction» اق جانە وزگە دە جاۋاپتى ورىندار وكىلدەردىڭ قاتىسۋىمەن وتكەن جيىندا مەكتەپتەردىڭ قۇرىلىسىن ساپالى جۇرگىزۋ جانە ۋاقىتىلى پايدالانۋعا بەرۋ جونىندەگى باسقارمالاردىڭ جۇمىسىن جەدەلدەتۋدى تاپسىرعان بولاتىن.
اكىمدىك قالانى ءبىلىم بەرۋ مەكەمەلەرىمەن قامتاماسىز ەتۋدىڭ مەملەكەتتىك تاپسىرىس, جەر تەلىمى يەلەرى سالعان مەكتەپتى دايىن بولعاندا ساتىپ الۋ جانە مەملەكەتتىك-جەكەمەنشىك ارىپتەستىك اياسىنداعى قۇرىلىسى سياقتى 3 تەتىگىن پايدالانباق. جوبانى ىسكە اسىرۋعا جاۋاپتى «Samruk-Kazyna Construction» اق بالانسىنداعى 10 جەر ۋچاسكەسىن قالا اكىمدىگى تاپسىرىستى ورىنداۋشىعا بەردى. ەكى ۋچاسكە قولدانىستاعى ەسكى مەكتەپ عيماراتتارىن (№97 جانە №154 ليتسەي) بۇزعاننان كەيىن پايدالانىلادى. قازىرگى كەزدە روزىباكيەۆ-لەۆيتان كوشەلەرىنىڭ قيىلىسىنداعى تاعى ءبىر ۋچاسكەنى ساتىپ الۋ قۇنى بويىنشا مەنشىك يەسىمەن كەلىسسوزدەر جۇرگىزىلىپ جاتىر.
جوسپارعا سايكەس جايلى مەكتەپتەردە ەرەكشە ءبىلىم بەرۋ قاجەتتىلىكتەرى بار بالالارعا قولايلى جاعداي جاساۋ كوزدەلىپ وتىر. سونىمەن قاتار جوعارى جىلدامدىقتى ينتەرنەتپەن قامتاماسىز ەتىلىپ, باستاۋىش سىنىپ وقۋشىلارى مەن جوعارى سىنىپ وقۋشىلارىنىڭ مەكتەپكە كىرىپ-شىعۋىنا بولەك كىرەبەرىستەر قاراستىرىلعان. ليفت, ەلەكتروندى كىتاپحانالار جانە حوككەي كورتى, جەكە بۇيىمدارىن قويۋعا ارنالعان شكافتار دا وقۋشىلاردىڭ قولايلى ءبىلىم الۋىنا لايىقتالىپ جاسالادى. پايدالى دەمالىس ۇيىمداستىرۋ ءۇشىن ءار قاباتتا كوۆوركينگ الاڭدار, Face ID جانە QR-كودتار قويىلىپ, اۆتوماتتى تۇردە ق ۇلىپتالاتىن جانە اكىمشىلىك مەكتەپ عيماراتى مەن اۋلاسىنداعى جاعدايدى ناقتى رەجىمدە قاداعالاپ وتىرۋى ءۇشىن بەينەباقىلاۋ جۇيەلەرى دە ورناتىلاتىنى ءبىلىم الۋ مەكەمەلەرىندەگى قاۋىپسىزدىكتى كۇشەيتۋگە باعىتتالماق.
