17 شىلدە كۇنى ۇلانبەل – سوزاق – شولاققورعان – ەكپىندى تاس جولىنىڭ شىبىت – شايان ەلدى مەكەنىنىڭ ارالىعىندا 3 كولىك سوقتىعىسقان ءىرى جول اپاتى بولىپ, سالدارىنان 10 ادام مەزگىلسىز قازا تاۋىپ, 12 ادام جاراقات العانى ءمالىم. ومىردەن وتكەندەر سانى كوپ بولۋى مۇمكىن بە ەدى, وقيعا كەزىندە ەگەر وزگەلەردىڭ جانىن اراشالاي بىلگەن قايسار جاندار بولماعاندا. ولاي دەيتىنىمىز, سول كۇنى اپاتقا ۇشىراعان كولىكتەردە بولعان مۇرات ەسەنقابىلوۆ پەن باقىتجان كوكسۋباي قاسىنداعى جۇرگىزۋشىلەر مەن جولاۋشىلاردى قۇتقارۋدا باتىرلىق تانىتقان.
ولاردىڭ ادام ءومىرىن اراشالاۋداعى باتىلدىعى مەن جانقيارلىعىن قوعام جوعارى باعالادى.
تۇركىستان وبلىسى پد باستىعىنىڭ مىندەتىن اتقارۋشى باعلانبەك ايتپاەۆ ءوز باستارىن قاتەرگە تىگە وتىرىپ, وزگەگە جاردەم بەرگەن ەكى تۇرعىندى ارنايى قابىلداپ, ماراپاتتاۋ شاراسىن وتكىزدى. باسقالارعا ۇلگى بولارلىق باتىلدىق تانىتقان ۇلكەن جۇرەكتى ازاماتتارعا بارشا پوليتسەيلەر اتىنان ريزاشىلىق ءبىلدىرىپ, العىس حات پەن باعالى سىيلىقتارىن تابىستادى.
ءىرى جول-كولىك وقيعاسىن ءوز كوزدەرىمەن كورىپ, كۋاگەر بولعان ازاماتتار وقيعانىڭ ءمان-جايىنا توقتالدى. سول ساتتە تەك زارداپ شەككەن ازاماتتارعا كومەكتەسۋدى ويلاعاندارىن جەتكىزدى. ەلىمىزدە مۇنداي جول اپاتى بولماۋىن تىلەپ, جۇرگىزۋشىلەردەن جول ەرەجەسىن ساقتاۋدى ءوتىندى.
