وتكەن جىلى اتالعان وبلىستىڭ 117 تۇلەگى وقۋ ءبىتىرىپ, اۋىلدارعا 86 دارىگەر بولىنگەن ەكەن. دارىگەرلەردىڭ قاجەتتىلىگىن قامتاماسىز ەتۋ ءۇشىن الماتى وبلىسىنا 32 رەزيدەنتۋرا گرانتى دا بولىنگەن. سونداي-اق 2023 جىلى «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ اياسىندا مينيسترلىك اكىمدىكپەن بىرلەسىپ, الماتى وبلىسىنىڭ دەنساۋلىق ساقتاۋ جۇيەسىن دامىتۋدىڭ 2023-2025 جىلدارعا ارنالعان كەشەندى جوسپارىن ازىرلەگەن. جوسپار ينفراقۇرىلىمدى دامىتۋ, مەديتسينالىق ۇيىمداردىڭ ماتەريالدىق-تەحنيكالىق بازاسىن نىعايتۋ, ءوڭىردىڭ كادرلىق الەۋەتىن ارتتىرۋ شارالارىن قاراستىرادى.
كادر جەتىسپەۋشىلىگى مەن مەديتسينالىق قۇرىلعىلاردىڭ تاپشىلىعىن شالعايداعى شەكارالى رايىمبەك اۋدانىنىڭ دارىگەرلەرى ايقىن سەزىنىپ وتىر.
«كادر جەتىسپەۋشىلىگى ەشۋاقىتتا شەشىمىن تاپپايتىن ءتارىزدى. سەبەبى مەديتسينالىق ينستيتۋتقا ءبارىنىڭ قولى جەتە بەرمەيدى. وقۋ بىتىرگەندەر كوپ جاعدايدا قالادا قالۋعا تىرىسادى. اۋىلعا اتا-انا جاعدايىنا قاراپ كەلەتىن ءبىرلى-جارىمى بولماسا, وزدىگىنەن كەلۋى وتە سيرەك. اۋدان اكىمىنىڭ كۆوتاسى تۇرمىس جاعدايى تومەن وتباسىنىڭ بالالارىنا بولىنەدى. بىراق ولاردىڭ اۋىلعا قايتىپ كەلۋىنە تالاپ قويىلمايدى. سوندىقتان بولىنگەن كۆوتا بويىنشا وقۋ بىتىرگەن مامان اۋىلعا كەلىپ, جۇمىس ىستەۋىن مىندەتتەسە عانا كادر ماسەلەسى شەشىم تابۋى مۇمكىن. بۇعان قوسا وسى ۋاقىتتا ونلاين وقىتۋلار كوبەيىپ كەتتى. دارىگەرلەرگە ودان كەلەر پايدا شامالى, سەبەبى اۋداندا ساپالى ينتەرنەت جوق. ەكىنشىدەن, مامان تاپشىلىعىنا بايلانىستى دارىگەرلەردىڭ ۋاقىتى دا جەتە بەرمەيدى. سوندىقتان فورمالدى وقىتۋدى دوعارۋ كەرەك. دارىگەرلەردىڭ بىلىكتىلىگىن ارتتىرۋ ءۇشىن وفلاين وقىتىپ, ءىس-تاجىريبە الماسۋدىڭ ارتىقشىلىعى اناعۇرلىم ءتيىمدى بولار ەدى», دەيدى پەرزەنتحانا ءبولىمىنىڭ مەڭگەرۋشىسى, جوعارى ساناتتى دارىگەر نازگۇل بوتباەۆا.
بۇگىندە شەكارالى ايماقتاعى رايىمبەك اۋدانىنداعى اۋرۋحانادا 30 مىڭداي حالىق تىركەۋدە. ولاردىڭ ىشىندە تۋىت جاسىنداعى ايەلدەر سانى – 5 260, بيىلعى بەس ايدا 159 ءسابي ومىرگە كەلگەن. وتكەن جىلى اۋداندا 403 نارەستە دۇنيەگە كەلدى. پەرزەنتحانادا 1 نەوناتولوگ, 3 گينەكولوگ-دارىگەر, 4 اكۋشەر مەن 5 مەيىربيكە جانە 7 سانيتار ەڭبەك ەتەدى.
«اۋدانىمىزدا تۋ كورسەتكىشى ارتىپ كەلەدى. جۇكتىلىك كەزىندە ايەلدەردىڭ دەنساۋلىعىن قاداعالاپ, دەنى ساۋ بالانىڭ ومىرگە كەلۋىن باستى نازارعا الىپ, بارىنشا كومەك كورسەتەمىز. قازىرگى كەزدە جۇكتى ايەلدەر اراسىندا ەكستراگەنيتالدى اۋرۋلار بار. اسىرەسە ارتەريالىق قان قىسىمىنىڭ كوتەرىلۋى, قانت ديابەتى, بۇيرەك پەن قالقانشا بەز اۋرۋلارى ءجيى كەزدەسەدى. پەرزەنتحانادا تۋىت قابىلدايتىن توسەك (ترانسفورمەر), توسەك جانىنداعى مونيتور, جاڭا تۋىلعان نارەستەلەردىڭ ەستۋ قابىلەتىن تەكسەرۋگە ارنالعان اۋديوسكرينينگ اپپاراتى جەتىسپەيدى. سونداي-اق شالعاي اۋدان بولعاندىقتان, شالا تۋعان نارەستەلەردى تاسىمالداۋعا ارنالعان ترانسپورتتىق كۋۆەز بولسا, ارتىق ەتپەس ەدى», دەيدى اكۋشەر-گينەكولوگ باعداگۇل بايعاراەۆا.
ء«بىر قوزى تۋسا, ءبىر ءتۇپ جۋسان ارتىق شىعادى» دەيتىن كەڭ پەيىل سالتىمىزعا ساي ۇلتتىق دەموگرافيانىڭ وسىمىنە ولشەۋسىز ۇلەس قوسىپ كەلە جاتقان ايەلدەردىڭ دەنساۋلىعىن قاداعالاپ, امان-ەسەن بوسانۋىنا تىلەكشى دارىگەرلەردىڭ ەڭبەگىنە ەل ريزا. ءوز ءىسىن جەتىك مەڭگەرگەن اق حالاتتى ابزال جانداردىڭ بىلىكتىلىگى مەن مەيىرىمى جۇكتى ايەلدەردىڭ كوڭىلىن جايلاندىرىپ, جۇزىنە قۋانىش سىيلايدى.
جالپى, 120 توسەككە ارنالعان اۋداندىق اۋرۋحاناعا كوپ جىلدان بەرى كۇردەلى جوندەۋ جاسالماعان. ۋاقىتپەن ساناسپاي قىزمەت ەتەتىن شەتكەرى اۋدانداعى مەديتسينا ماماندارى ءۇشىن ەڭبەكاقىنىڭ ازدىعى ءالى دە وزەكتى ماسەلە ەكەنىن ايتۋ ارتىق ەتپەس.
