حالىقارالىق اۋديت قورىتىندىسى بويىنشا ۋنيۆەرسيتەت العاش رەت جوعارى باعاعا يە بولدى. «QS Stars» حالىقارالىق رەيتينگىندە جوعارى وقۋ ورنىنا «4 جۇلدىز» تاعايىندالعان. بۇل رەيتينگ ۋنيۆەرسيتەتتى 50 ءتۇرلى كورسەتكىش بويىنشا باعالايدى ەكەن. سونىمەن قاتار شقتۋ وقىتۋ, جۇمىسقا ورنالاستىرۋ, تۇراقتى دامۋ ساناتتارى بويىنشا «وتە جاقسى» دەگەن باعا الدى.
بۇدان بولەك, ۋنيۆەرسيتەت العاش رەت «The Times Higher Education Impact» رەيتينگىنە الەمدىك دەڭگەيدەگى 850 ۇزدىكتەر قاتارىنا, قازاقستان بويىنشا ۇزدىك ەكى ۋنيۆەرسيتەت قاتارىنا كىردى. جىلدىڭ تاعى ءبىر تابىسى د.سەرىكباەۆ اتىنداعى شقتۋ CDIO (conceive, design, implement, operate) باستاماسىنىڭ وا-داعى ءبىرىنشى تولىققاندى مۇشەسى بولىپ قابىلداندى. بۇل – MIT باستاماشى بولىپ وتىرعان تاجىريبەگە باعدارلانعان كادرلاردى دايارلاۋ ستاندارتتارى. قازىر وسىنىڭ نەگىزىندە ينجەنەرلىك ءبىلىم بەرۋدىڭ ۇلتتىق مودەلى ازىرلەنىپ جاتىر.
ءيا, ۋنيۆەرسيتەت حالىقارالىق ستاندارتتار بويىنشا دامىپ كەلەدى. بيىل قاڭتاردا 12 ءبىلىم بەرۋ باعدارلاماسى گەرمانيانىڭ ASIIN اگەنتتىگىندە حالىقارالىق اككرەديتتەۋدەن ءوتىپ, حالىقارالىق دەڭگەيدە ساپاسىن راستادى.
جوو-دا 13 ءبىلىم بەرۋ باعدارلاماسى اعىلشىن تىلىندە جۇرگىزىلەدى. 2023 جىلدىڭ شىلدەسىنەن باستاپ شقتۋ IDP IELTS Kazakhstan ەمتيحان ورتالىعىنىڭ رەسمي اككرەديتتەلگەن سەرىكتەسى اتانىپ, بارلىق تىلەك بىلدىرۋشىلەرگە اعىلشىن ءتىلى دەڭگەيىن رەسمي راستاۋعا مۇمكىندىك بەرەدى.
وقۋ ورنىنىڭ ون عالىمى امەريكانىڭ, ۇلىبريتانيانىڭ, رەسەيدىڭ, تۇركيانىڭ جوعارى وقۋ ورىندارىندا «بولاشاق» باعدارلاماسى بويىنشا عىلىمي تاعىلىمدامادان ءوتتى.
– عالىمدارىمىز شەتەلدە بىلىمدەرىن ارتتىرىپ جاتىر. جالپى, 2022-2023 جىلعى وقۋ جىلىندا شقتۋ-دا 12 مەملەكەتتەن شاقىرىلعان 48 عالىم جۇمىس ىستەدى. ستۋدەنتتەرىمىز نەگىزگى ينجەنەرلىك بىلىكتىلىكتىڭ 1-كۋرسىن تامامداعان سوڭ, 651 ستۋدەنت باكالاۆريات دارەجەسىن الدى. جاستارىمىزعا تاجىريبەسىمەن ءبولىسىپ, وقىتۋدا Huawei, Amazon سياقتى كومپانيالار تارتىلادى, – دەيدى ۋنيۆەرسيتەت رەكتورى ساۋلە جادىگەرقىزى.
ەسەپتى كەزەڭدە ۋنيۆەرسيتەت open EDX جەكە پلاتفورماسىندا 21 ونلاين كۋرس ازىرلەدى. 2023 جىلى شقتۋ الەمدەگى وزىق ۋنيۆەرسيتەتتەر كۋرستارىندا شەكسىز ءبىلىم الۋ ءۇشىن «Coursera»-عا 500 ليتسەنزيا الدى.
ايتقانداي, ء«ىROS – زەرتتەۋ قۇزىرەتتەرى» جوباسى ازىرلەنىپ, بۇل وقۋ كۋرستارىنا ناقتى كەزەڭدەر كەيسى, زەرتتەۋ ادىستەرى, جوبالىق جانە پروبلەمالىق-باعدارلانعان وقىتۋ, ەمپيريكالىق زەرتتەۋلەر, ءبىلىم الۋشىلاردىڭ زەرتتەۋ قۇزىرەتتەرىن قالىپتاستىرۋعا مۇمكىندىك بەرەتىن اكادەميالىق جازۋ ەرەجەلەرى كىرەدى.
كوممەرتسيالاندىرۋ ەكوجۇيەسى جاسالدى. «Bi ANGAR» بيزنەس-ينكۋباتورى قۇرىلدى. تەحنولوگيالاردى كوممەرتسيالاندىرۋ كەڭسەسى اشىلدى. استانا حابىمەن جانە شقو اكىمدىگىمەن بىرلەسىپ, It حاب جۇمىسىن باستادى. عىلىمي زەرتتەۋ جۇمىستارى دا ناتيجەلى بولدى. جالپى, 2022-2023 وقۋ جىلىندا 200 جوبا ىسكە اسىرىلدى. ونىڭ 181-ءى كاسىپورىنداردىڭ تاپسىرىسى بويىنشا, 3 بنق, 16 گرانتتىق. عىلىم بيۋدجەتى دە ءوستى. شقتۋ باسىلىمدارىنىڭ دايەكسوزدەرى مولايدى. ۋنيۆەرسيتەت بارلىق جوسپارلاردى ءساتتى جۇزەگە اسىرىپ, جوعارى ناتيجەلەرگە, حالىقارالىق تانىمالدىققا قول جەتكىزدى.
جاعىمدى جاڭالىقتاردىڭ ءبىرى – د.سەرىكباەۆ اتىنداعى شقتۋ حالىقارالىق ىنتىماقتاستىقتى دامىتۋ ماقساتىندا تيانتسزين ۋنيۆەرسيتەتىمەن بىرلەسىپ, قازاقستاندا لۋ بان شەبەرحاناسىن اشادى. مۇنداي شەبەرحانالار الەمنىڭ 20 ەلىندە اشىلعان. جوبانى اياقتاۋ جانە لۋ بان شەبەرحاناسىن اشۋ 2023 جىلدىڭ قازان ايىندا جوسپارلانعان.
شەتەلمەن تىعىز بايلانىستا جۇمىس ىستەسىپ كەلە جاتقان شقتۋ بازاسىندا مەتاللۋرگيا جانە پايدالى قازبالاردى ءوندىرۋ سالاسىنداعى قازاقستان-نەمىس عىلىم جانە تەحنولوگيالار ينستيتۋتى قۇرىلىپ جاتىر. بۇل تۋرالى ەكى ەلدىڭ پرەزيدەنتى قاسىم-جومارت توقاەۆ پەن فرانك-ۆالتەر شتاينماەردىڭ قاتىسۋىمەن وتكەن قازاقستان – گەرمانيا ۋنيۆەرسيتەتتەرىنىڭ فورۋمى شەڭبەرىندە كەلىسىمگە قول قويىلدى. مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان تاعى ءبىر جوبا – شقتۋ بازاسىندا تاۋ-كەن مەتاللۋرگيا سالاسىنداعى اكادەميالىق ارتىقشىلىق ورتالىعىن قۇرۋ كوزدەلگەن.
سونداي-اق اتالعان وقۋ ورىن ساتپاەۆ ۋنيۆەرسيتەتىمەن بىرگە پيلوتتىق رەجىمدە تسيفرلىق ۋنيۆەرسيتەت جوباسىن ىسكە اسىرۋ ءۇشىن تاڭدالدى. جوبا ماقساتى – تسيفرلىق ۋنيۆەرسيتەتتىڭ ەتالوندىق مودەلىن قۇرۋ جانە ونى ەلىمىزدىڭ ۋنيۆەرسيتەتتەرىنە ودان ءارى تاراتۋ.
د.سەرىكباەۆ اتىنداعى شقتۋ رەكتورى ساۋلە راحمەتۋللينانىڭ ايتۋىنشا, ءبىلىمىن عىلىممەن بايلانىستىراتىن تۇلەكتەر ءبىر جىلدا ون دوكتورلىق ديسسەرتاتسيا قورعاپ, بۇل ايتۋلى جەتىستىك دەپ تانىلدى. سەبەبى عىلىمي زەرتتەۋلەرگە دە ءجىتى ءمان بەرىلەتىن جوعارى وقۋ ورنىنىڭ جاستارى بولاشاقتا اۋىل شارۋاشىلىعىنان باستاپ, ءتۇرلى سالاعا وزگەرىستەر اكەلەتىن جوبالار ويلاپ تابادى.
– Smart Engineering ورتالىعىنىڭ مەڭگەرۋشىسى تۇقىم سەپكىنىڭ سۇلباسىن انىقتاپ, ازىرلەپ جاتىر. ول دايىن بولعان جاعدايدا ەگىستىك القابىنا اپارىپ, تىڭايتقىش رەتىندە قولدانادى. بۇل جەردە تىڭايتقىشتىڭ تولىقتاي داقىلدىڭ تامىرىنا باراتىنىن ەسكەرگەن ءجون. وبلىستا مايلى داقىل ەگىستىگى ورلەپ تۇرعاندىقتان, ۋنيۆەرسيتەت عالىمدارى ازىرلەپ جاتقان تۇقىم سەپكى وڭ جاڭالىق اكەلەدى دەۋگە بولادى. كۇزدە تاجىريبەدەن وتكىزۋ جوسپاردا بار, – دەدى رەكتور س.راحمەتۋللينا.
