بۇل بۇيىم وتىراردىڭ قىش شەبەرحاناسىندا جاسالعان. قاي عاسىرعا ءتان ەكەنى بەلگىسىز. بىراق ونىڭ سىرتقى بەينەسىنەن كونە جادىگەر ەكەنىن بايقايسىز. شىراعداننىڭ سىرتى اق ءتۇستى انگوبپەن كومكەرىلىپ, كوك ءتۇستى بوياۋمەن ورنەكتەلگەن. تۇعىردىڭ تومەنگى جانە جوعارعى بولىگىندە كولدەنەڭىنەن ەكى قاتار قىتاي يەروگليفىنە ۇقساس ورنەكتەر, ورتاڭعى بولىگىندە ەكى ايداھار بەينەلەنگەن. تۇعىرى تراپەتسيا ءپىشىندى, قيماسى دوڭگەلەك, تابانىنىڭ ىشكى جاعى قۋىس, ەرنەۋى ىشكە, سىرتقا قاراي دوعالدانا قايىرىلعان, جيەگى تولقىن ءتارىزدى. استىڭعى بولىگىنىڭ ديامەترى – 19 سم, بيىكتىگى – 27 سم. تۇعىردىڭ ۇستىڭگى ورتالىق الاڭىندا شىراق ورنالاسقان.
وتىرار – قازاق جەرىندەگى عانا ەمەس, ورتالىق ازياداعى بايىرعى شاھارلاردىڭ ءبىرى. تاريحي دەرەكتەردە ادامدار وندا V عاسىردان باستاپ تۇرعاندىعى ايتىلادى. بۇل كەزەڭدە قالا «فاراب» دەپ اتالعان. ول دا تەگىن ەمەس. ايگىلى عالىم, ويشىل ءابۋ ناسىر ءال-فارابي بابامىز وسىندا ومىرگە كەلگەن. سونداي-اق ۇلى جىبەك جولىنىڭ كەرۋەندەرى وسى قالانى باسىپ وتكەن. اراب عالىمدارى ءوز ەڭبەكتەرىندە وتىراردى ورتالىق ازياداعى ساۋدا مەن مادەنيەتى دامىعان شاھار دەپ باعالاعان.
