ءبىزدىڭ بۇگىنگى اڭگىمەمىزگە ارقاۋ بولىپ وتىرعان پوليتسيا كاپيتانى باۋىرجان وماروۆ ىشكى ىستەر ورگاندارىنا وسى ءۇشىنشى توپتاعى ادامدار قاتارىندا كەلگەن. بالا كۇنىنەن ول ءتارتىپ ساقشىسى بولۋدى ارمان قىلماسا دا, ەسەيە كەلە بۇل سالاعا ءوزى سەكىلدى جىگەرلى دە تالاپتى, الدىنا ناقتى ماقسات قويا بىلەتىن جىگىتتەردىڭ كەرەكتىگىن سەزىنىپ, بەلدى بەكەم بۋعانىن ايتادى.
«ەڭ العاش ستۋدەنتتىك جىلدارى پوليتسيا قىزمەتكەرى بولسام دەگەن وي كەلگەن ەدى. بىرىنشىدەن, ءبىزدىڭ اۋلەتتەن ەشقاشان پوليتسيا قىزمەتكەرى شىقپاپتى. ناعىز مىقتىلار مەن بىلەكتىلەرگە ارنالعان بۇل سالادا اۋلەتىمىزدەن دە ءبىر ادامنىڭ بولعانى دۇرىس دەپ شەشتىم. ەكىنشىدەن, پوليتسيا – بيلىكتىڭ وكىلى ەكەنى راس. وقالى كيىم كيىپ, قوعام ءتارتىبىن قاداعالاپ, قۇقىق بۇزۋشىلىقتار مەن قىلمىستىڭ الدىن الۋ جولىندا ەڭبەك ەتۋدى شىنداپ قالادىم», دەيدى پوليتسيا كاپيتانى.
وسى ماقساتىنا جەتۋ ءۇشىن باۋىرجان وماروۆ وقۋدى بىتىرىسىمەن ءوز ەركىمەن وتان الدىنداعى بورىشىن وتەۋگە اتتاندى. بۇل 2006 جىل بولاتىن. ارقانىڭ جىگىتى كيەلى اقتوبە جەرىندە ءبىر جىل اسكەري مىندەتىن ورىنداپ, 2007 جىلى تۋعان جەرگە ورالا سالىسىمەن پوليتسياعا قىزمەتكە تۇرۋ قامىنا كىرىسىپ كەتەدى.
«2008 جىلدىڭ باسىندا قۇجاتتارىمدى جيناعان سوڭ, مەنى ىشكى ىستەر ورگاندارىنداعى العاشقى دايارلىق مەكتەبىنە 3 ايلىق وقۋعا جىبەردى. ونى اياقتاعاننان كەيىن بىردەن استانا قالالىق ىشكى ىستەر دەپارتامەنتى پاترۋلدىك پوليتسياسىنا قىزمەتكە الىندىم», دەيدى ءتارتىپ ساقشىسى. باۋىرجان كەنجەعالي ۇلى قىزمەت اتقارا ءجۇرىپ, 2012-2014 جىلدارى كوكشەتاۋ قالاسىنداعى كوكشە اكادەمياسىن زاڭتانۋشى ماماندىعى بويىنشا سىرتتاي وقىپ بىتىرەدى. 2015 جىلى ىشكى ىستەر ورگاندارىنداعى قۇرىلىمدىق وزگەرىستەردەن كەيىن جول جانە پاترۋلدىك پوليتسياسى قوسىلىپ, جول-پاترۋلدىك پوليتسياسى قۇرىلعان سوڭ, باۋىرجانعا «پوليتسيا لەيتەنانتى» دەگەن العاشقى وفيتسەرلىك شەن بەرىلدى.
ىشكى ىستەر سالاسىنا ەڭ العاش ءتاي-ءتاي باسقان سول ۋاقىتتاردان بەرى دە 15 جىل زۋلاپ وتە شىعىپتى. بۇل كۇندە استانا قالاسىنىڭ پد پاترۋلدىك پوليتسيا پولكىنىڭ قىزمەت اعا ينسپەكتورى, پوليتسيا كاپيتانى باۋىرجان وماروۆ وڭى مەن سولىن تانىعان, قىزمەتىنىڭ قىر-سىرىن مەڭگەرگەن, ىشكى ىستەر سالاسىنىڭ ۇڭعىل-شۇڭعىلىن جەتىك بىلەتىن تاجىريبەلى مامانعا اينالعان. ۋاقىتپەن ساناسپاي, كۇندىز دە, تۇندە دە قىزمەت ورنىنان تابىلىپ, تالاي قۇقىق بۇزۋشىلىقتار مەن قىلمىستاردىڭ الدىن الىپ, كۇرەسىپ جۇرگەن پوليتسيا قىزمەتكەرى ءۇشىن بۇل از ۋاقىت ەمەس, ارينە.
تالاي جىل تاجىريبە جيناقتاعان باۋىرجاننان «قازىرگى كۇنى ءوز قىزمەتىڭ ساعان نەسىمەن ۇنايدى؟» دەپ سۇرادىق. «پوليتسيا قىزمەتكەرى بولۋ – تەك پوگون تاعىپ ءجۇرۋ ەمەس. سەن ءاردايىم, ءار مينۋتتا اينالاڭنىڭ بارىنە ءجىتى قاراپ, زاڭ اياسىنان شىققان كەز كەلگەن ارەكەتتى قالت جىبەرمەي باقىلاۋدا ۇستاۋىڭ قاجەت. قۇقىققا قايشى ارەكەت ىستەگەن بۇزاقىمەن نەمەسە قىلمىسكەرمەن بەتپە-بەت كەلگەندە شەشىم قابىلداۋ ءۇشىن ءتارتىپ ساقشىسى فيزيكالىق تۇرعىدا قۋاتتى, شىنىققان بولۋى شارت. سول سەبەپتى ءبىز اپتاسىنا ءۇش مارتە جاتتىعۋ زالىنان تابىلامىز. ماعان ۇنايتىنى دا وسى. ءبىز ءاردايىم سپورتپەن شۇعىلدانامىز. كۇش-قۋاتىمىزدىڭ جەتكىلىكتى بولۋىن قاداعالايمىز. سپورتتىڭ ارقاسىندا ۇنەمى ءوزىمىزدى جەڭىل ءارى سەرگەك سەزىنەمىز. مۇنىڭ پوليتسيا قىزمەتكەرىنە, ءتىپتى كەز كەلگەن ادامعا پايداسى مول», دەپ جاۋاپ بەردى.
ءيا, راسىمەن دە, پوليتسيادا قىزمەت ەتۋ ءبىر جاعىنان ابىرويلى مىندەت بولسا, ەكىنشى جاعىنان, قاۋىپتى جۇمىس ەكەنى ءمالىم جايت. «كۇن سايىن قىزمەتتە جۇرگەندە بىزگە ءارتۇرلى شاقىرتۋ تۇسەدى, دەيدى پوليتسيا كاپيتانى. – اسىرەسە, وتباسىلىق جانجالدارعا ءجيى بارامىز. وكىنىشكە قاراي, وتباسىندا كۇيەۋى مەن ايەلى تۇسىنىسە الماي, جانجال تۋىنداپ, پوليتسيا شاقىرىپ جاتاتىندار از ەمەس. ۇرلىق-قارلىق, توبەلەس سەكىلدى قۇقىق بۇزۋشىلىق وقيعالارى ءوز الدىنا ءبىر توبە. وتباسىلىق جانجالداردا ەكى جاقتى تاتۋلاستىرىپ, سابىرعا شاقىرىپ, پروفيلاكتيكالىق جۇمىستار جۇرگىزەمىز. ءبىزدىڭ تاتۋلاستىرۋ شارالارىمىزدان كەيىن وتباسىنداعى ۇرىس-كەرىس باسىلىپ, ءوزارا تابىسىپ, ارتىنان حابارلاسىپ العىستارىن ايتىپ جاتاتىندار از ەمەس.
وسى ۇزاق جىلعى قىزمەتتەن مەنىڭ ويعا تۇيگەنىم: پوليتسيا قىزمەتكەرى ەڭ ءبىرىنشى پسيحولوگ بولۋى كەرەك ەكەن. ويتكەنى ءارتۇرلى شاقىرتۋعا بارعاندا ول جەردەگى ادامدى ءبىر كورگەننەن-اق ونىڭ پيعىلىن «تانىپ-ءبىلىپ», سايكەسىنشە ءوزىڭنىڭ قالاي ارەكەت جاسايتىنىڭدى تەز ارادا جوسپارلاپ ۇلگەرۋىڭ كەرەك. جاعدايدىڭ قالاي شەشىمىن تابۋى سەنىڭ جەدەل شىعارعان شەشىمىڭە تىكەلەي بايلانىستى».
ءبىز باۋىرجان وماروۆپەن سۇحباتتاسۋ بارىسىندا جالعىز ءوزى قىلمىسكەردى ءىزىن سۋىتپاي ۇستاپ, جابىرلەنۋشىگە جاردەمدەسكەنىن بىلدىك. بۇل وسىدان 4-5 جىل بۇرىن ورىن العان وقيعا. تۇنگى ساعات 00:00 شاماسىندا استانانىڭ ورتالىق ساياباعىندا قىزمەت اتقارىپ جۇرگەن ءتارتىپ ساقشىلارىنا جەدەل باقىلاۋ ورتالىعىنان «دۋمان» ويىن-ساۋىق كەشەنى ماڭىندا بەلگىسىز ءبىر جىگىت تەلەفونمەن سويلەسىپ تۇرعان قىزدىڭ سومكەسىن ج ۇلىپ الىپ, تۇران كوشەسىنە قاراي قاشتى» دەگەن جەدەل باعدارلاۋ كەلەدى. «سىرتقى بەلگىلەرى: ۇزىن بويلى, جىڭىشكە كەلگەن, قارا كۇرتەشە مەن سۇر تريكو كيگەن دەگەن مالىمەت بەرىلدى. مەن ورتالىق ساياباقتا ءجۇرىپ اعاشتاردىڭ اراسىنان ءتۇر-ءتۇسى سول ۇرىعا كەلەتىن ءبىر ادامدى كورىپ قالدىم. وعان ارتقى جاعىنان تاياپ كەلگەندە ۇرىنىڭ تۋرا ءوزى ەكەندىگىنە ەشقانداي كۇمانىم قالمادى. قاشىپ كەتپەۋى ءۇشىن الدىمەن ودان سىرىڭكە سۇرادىم. ول قالتاسىنا قولىن سالىپ, سىرىڭكە الا بەرگەندە تاپ بەرىپ, تىرپ ەتكىزبەي ۇستاي الدىم», دەيدى ب.وماروۆ.
العاشىندا جىگىت ءوزىنىڭ بۇل قىلمىسقا قاتىسى جوقتىعىن ايتىپ ازار دا بەزەر بولادى. الايدا باۋىرجان راديوبايلانىس ارقىلى جابىرلەنۋشىنى سول جەرگە الدىرىپ, ول ۇرىنى جازباي تانىعاننان كەيىن قارا كۇرتەشەلى جىگىت ءوزىنىڭ زاڭعا قايشى ءىسىن مويىندايدى. دەرەۋ جەتكەن روتا باسشىلارى, جەدەل تەرگەۋ توبى قىزمەتكەرلەرى جىگىتتىڭ سومكەنى لاقتىرىپ كەتتىم دەگەن جەرىنە بارادى. سول ورىندى جارتى ساعاتتاي تىنتكىلەپ, كەيىن كينولوگ يتتەردىڭ كومەگىمەن سومكە تابىلىپ, يەسىنە قايتارىلادى.
مىنە, بۇل – ءتارتىپ ساقشىلارىنىڭ كۇندەلىكتى قىزمەتىندە كەزدەسىپ جاتاتىن قاتارداعى وقيعالاردىڭ ءبىرى. دەگەنمەن قىلمىسكەردى جالاڭ قولمەن ۇستاۋدىڭ ءوزى كەز كەلگەن ادامنىڭ قولىنان كەلە بەرمەيتىن ءىس ەكەنى راس. ول بۇزاقىنىڭ قولىندا پىشاق سەكىلدى سۋىق قارۋى دا بولۋى مۇمكىن. سەنى ولتىرمەسە دە, جاراقاتتاپ كەتۋى عاجاپ ەمەس. بىراق ادامداردىڭ قاۋىپسىزدىگىن ويلاعان پوليتسيا قىزمەتكەرلەرى ەڭ الدىمەن ءوز ءومىرىن ەمەس, وزگەنىڭ تىنىشتىعىن ءبىرىنشى ورىنعا قوياتىنى بەلگىلى جايت. سول تاباندىلىعىمەن دە ولار ءاردايىم قۇرمەتكە لايىق.
