ءبىر اپتادان استام ۋاقىتقا سوزىلعان ءىرى ورتتەر بولعان قوستاناي وبلىسىنىڭ اۋليەكول اۋدانىندا قاراعايلى ورمانداردى تابيعي قالپىنا كەلتىرۋ جۇمىستارى 2022 جىلدىڭ كۇزىندە باستالعان ەدى.
جەرگىلىكتى اقپارات پورتالىنىڭ حابارلاۋىنشا, قاراعايدىڭ العاشقى وسكىندەرى جەر بەتىنە ەندى عانا شىقتى.
«ەگىس القاپتارى ىلعالدىلىعى جوعارى, جازىق جەرلەردە ورنالاسادى. ولار رەلەفتىڭ بيىك ايماقتارىندا ءالى جوق, بۇل تابيعي, بۇل جەردەگى توپىراق قۇرعاق, (وركەندەر) ءسال كەيىنىرەك شىعادى», دەدى «رەسپۋبليكالىق ورمان سەلەكتسيالىق تۇقىم ورتالىعى» مەملەكەتتىك كاسىپورنىنىڭ ينجەنەر-ورمان پاتولوگى ۆيتالي ۆاگنەر.
ماماندار كوپ ۇزاماي ورتەنگەن ورماننىڭ باسقا جەرلەرىندە قاراعايلار پايدا بولاتىنىنا سەنىمدى. ەندى مۇنداعى ورمانشىلاردىڭ مىندەتى – جاس وسكىندەردى اجالدان اراشالاپ, ورماندى ساقتاپ قالۋ.
ەسكە سالا كەتسەك, ءىرى ءورت 2 قىركۇيەكتە باسامان جانە سەميوزەرنىي ورمان شارۋاشىلىعى بولىمدەرىنىڭ اۋماعىندا باستالعان. 3 قىركۇيەكتە ورتكە بايلانىستى اۋليەكول اۋدانىنداعى بىرنەشە اۋىلدىڭ تۇرعىندارى قاۋىپسىز جەرگە كوشىرىلدى. 10 قىركۇيەكتە ءورتتىڭ تولىق سوندىرىلگەنى بەلگىلى بولدى. وسى ۋاقىت ىشىندە جالىن 43 مىڭ گەكتار ورماندى جويدى.
ءورت وشاقتارىنا جاس اعاشتار وتىرعىزىلعان ەدى, بىراق وسى جىلدىڭ ماۋسىم ايىندا ەگىلگەن قاراعايلاردىڭ قۋراپ جاتقانى بەلگىلى بولدى.
