بۇل تۋرالى ولار Samruk-Kazyna Construction باسقارما توراعاسى ماۋلەن ايمانبەتوۆتىڭ جۇمىس ساپارى اياسىندا وتكەن جەكە كەزدەسۋلەردە ايتتى. ەسكە سالا كەتسەك, وتكەن اپتادا SK Construction باسشىسى قاراعاندى, پاۆلودار, اباي جانە شىعىس قازاقستان وبلىستارىنا ات باسىن بۇردى.
شقو-عا جۇمىس ساپارى كەزىندە ايمانبەتوۆ ءوڭىر باسشىسى ەرمەك كوشەرباەۆپەن كەزدەستى. وبلىس اكىمى پروبلەمالىق ماسەلەلەردى شەشۋدە كومەگىن ايامايتىنىن ايتىپ, سەندىردى.
ۇلتتىق جوبانى ىسكە اسىرۋعا جەتەكشىلىك ەتەتىن وبلىس اكىمىنىڭ ورىنباسارى اپتا سايىن SK Construction شىعىس قازاقستان وڭىرىندەگى وكىلى جانە مەردىگەرلىك ۇيىمداردىڭ وكىلدەرىمەن جينالىس وتكىزىپ وتىرادى. بۇل جاڭا مەكتەپتەردى جوبالاۋ جانە سالۋ بارىسىندا تۋىندايتىن بارلىق ماسەلەلەردى جەدەل جانە ساپالى شەشۋگە مۇمكىندىك بەرمەك.
سونداي-اق ايمانبەتوۆ ءوڭىر باسشىسىنا جايلى مەكتەپتەرگە جيھاز تاڭداۋ بويىنشا ارنايى كوميسسيا قۇرۋدى ۇسىندى. كوميسسيا قۇرامىنا وبلىس اكىمىنىڭ جاۋاپتى ورىنباسارىنان بولەك ءبىلىم باسقارماسىنىڭ قىزمەتكەرلەرى, مەكتەپ ديرەكتورلارى جانە ولاردىڭ اكىمشىلىك-شارۋاشىلىق جۇمىس جونىندەگى ورىنباسارلارى كىرۋى ءتيىس. كوميسسيا مەكتەپ جيھازىنىڭ ديزاينىن, ءتۇسىن جانە باسقا سىرتقى پارامەترلەرىن انىقتايدى. ەرمەك كوشەرباەۆ كەزدەسۋ بارىسىندا قاراماعىنداعىلارعا وسىنداي كوميسسيا قۇرۋدى تاپسىردى.
شقو-عا جۇمىس ساپارى بارىسىندا Samruk-Kazyna Construction باسشىسى جايلى مەكتەپتەر سالىناتىن بىرنەشە جەر ۋچاسكەسىن ارالادى. ءبىرىنشى كەزەكتە ول ريددەر قالاسىنا باردى. مۇندا مەردىگەر «AN Groups» جشس كەلەسى جىلدىڭ كۇزىنە دەيىن 600 ورىندىق مەكتەپ تۇرعىزادى.
ريددەر تاۋلى جەردە شامامەن 700 مەتر بيىكتىكتە ورنالاسقان, سوندىقتان مەكتەپ سالۋعا بولىنگەن ۋچاسكەنىڭ رەلەفى وتە كۇردەلى. سونىمەن قاتار, جەر تەلىمى ورمان القابىنىڭ اۋماعىندا ورنالاسقان. بۇل نىساندى ورنالاستىرۋدا قوسىمشا قيىندىقتار تۋعىزىپ جاتىر.
«مەن اعاشتاردىڭ ەسكى ەكەنىن كورىپ تۇرمىن, سوندىقتان سانيتارلىق كەسۋ جۇمىستارىن قولعا الۋ قاجەت. ريددەر قالاسىنىڭ اكىمى دارحان قوسانتاەۆقا جانە باسقا دا جاۋاپتى تۇلعالارعا جاسىل جەلەكتى وتاۋ بويىنشا قوعامدىق تىڭدالىم وتكىزۋدى ۇسىنامىن. تەحنيكانى جۇمىلدىرۋ مەن قۇرىلىسقا دايىندىقتى ۋاقىتىلى باستاۋ ءۇشىن اۋماقتى تەز ارادا تازارتۋ قاجەت», دەپ اتاپ ءوتتى ايمانبەتوۆ.
Samruk-Kazyna Construction باسشىسى گلۋبوكوە اۋدانىنداعى بەلوۋسوۆكا اۋىلىنا دا باردى. مۇندا 300 ورىندىق جايلى مەكتەپ سالىنادى. اۋماقتا بىرنەشە ەسكى نىسان تۇر, ولاردى بۇزۋ كەرەك. سونىمەن قاتار ەسكى ينجەنەرلىك جەلىلەردى شىعارىپ تاستاپ, جاڭالان تارتۋ قاجەت. وسى ماسەلەلەردىڭ بارلىعىن مەردىگەر «فيرما ازيا» جشس جوبالاۋشى ۇيىممەن بىرلەسىپ تەز ءارى ۇيىمداسقان تۇردە شەشىپ جاتىر. ايمانبەتوۆ مۇنى كونسورتسيۋمنىڭ جاۋاپتى جانە ۇيلەسىمدى جۇمىسىنىڭ ايقىن مىسالى دەپ اتادى.
سونداي-اق باسقارما توراعاسى وپىتنوە پولە اۋىلىنداعى 300 ورىندىق مەكتەپ سالىناتىن جەر ۋچاسكەسى مەن وسكەمەندەگى بىرنەشە قۇرىلىس الاڭىن كورىپ, جاعدايدى باعامداپ قايتتى. ءبىر اپتا بويى وڭىرلەردى ارالاعان SK Construction باسشىسىنىڭ جۇمىس ساپارى وسىمەن ءتامامدالدى.
ىستىق اۋا-رايىنا قاراماستان ايمانبەتوۆ جايلى مەكتەپتەردىڭ قۇرىلىسىنا بولىنگەن بارلىق ۋچاسكەلەردە بولىپ, دايىندىق بارىسىمەن تانىستى. بولاشاقتا باسقارما توراعاسى ۇلتتىق جوبانىڭ ىسكە اسىرىلۋ بارىسىن باقىلاۋ ءۇشىن وڭىرلەردى ارالاۋدى جالعاستىرماق نيەتتە.
ايتا كەتەيىك, «جايلى مەكتەپ» ۇلتتىق جوباسى اياسىندا شىعىس قازاقستان وبلىسىندا 10 مەكتەپ سالۋ جوسپارلانعان. ولاردىڭ جەتەۋى 2024 جىلدىڭ سوڭىنا دەيىن, ال قالعان ۇشەۋى 2025 جىلدىڭ اياعىنا دەيىن تاپسىرىلادى. ۇلتتىق جوبانىڭ ارقاسىندا ءوڭىر بويىنشا 4,2 مىڭ جاڭا وقۋشى ورنى قۇرىلادى.
