دەپۋتات بۇل سۋرەتتەرگە قاتىستى تۇسىنىكتەمە بەرىپ, حالىقتى تەك وبەكتيۆتى اقپاراتقا سەنۋگە شاقىردى.
«كازينوداعى سۋرەتتەرىمە قاتىستى پىكىر بىلدىرگىم كەلىپ وتىر. وبەكتيۆتى اقپاراتقا سەنۋگە جانە جالعان اقپاراتقا بەرىلمەۋگە كەڭەس بەرەمىن. فوتو 7 اي بۇرىن, دالىرەك ايتساق, 2022 جىلدىڭ 24 جەلتوقسانىندا قوناەۆ قالاسىنداعى كازينودا ءتۇسىرىلدى, وندا جۇبايىم ەكەۋمىز ءبىر تانىمال توپتىڭ كونتسەرتىنە بارعان ەدىك. ول كەزدە مەن ءماجىلىس دەپۋتاتى ەمەس ەدىم. سۋرەتتەگى فونعا نازار اۋدارساڭىزدار, شىرشا تۇرعانىن بايقاۋعا بولادى, مەنىڭ ۇستىمدە دە قىسقى جەمپىر. دوستار, مەن لۋدومان ەمەسپىن, ەشقاشان كازينودا ويناعان ەمەسپىن», دەپ جازدى باقىتجان بازاربەك Facebook پاراقشاسىندا.
دەپۋتاتتىڭ ويىنشا, بۇل سۋرەتتەر ونىڭ اتىنا, دەپۋتاتتىق مانسابىنا داق كەلتىرۋ ماقساتىندا تاراپ كەتكەن.
«پارلامەنت ماجىلىسىنە دەيىن مەن كاسىبي كوممەرتسيالىق جەر زاڭگەرى بولعان ەدىم, ومىرىمدە ەشقاشان مەملەكەتتىك قىزمەتتە جۇمىس ىستەپ كورمەگەنمىن جانە كوممەرتسيالىق زاڭگەر رەتىندە ۋاقىتىمدى قالاي جانە قايدا وتكىزگەنىم جەكە ءىسىم دەپ سانايمىن. بىراق مەنىڭ پارلامەنت ماجىلىسىندەگى بەلسەندى ارەكەتتەرىمنەن كەيىن 7 ايدان سوڭ بىرەۋدىڭ وسى جەكە سۋرەتتەردى جاريالاۋى كەزدەيسوق ەمەس جانە ونىڭ وزىندىك سەبەپتەرى بار. ءماجىلىس تريبۋناسىنان ەلىمىزدەگى جەر قاتىناستارىنا قاتىستى ماسەلە كوتەرگەنىم بەلگىلى. 8 وبلىس اكىمدىگىنىڭ جەكە تۇرعىن ءۇي قۇرىلىسىنا ينجەنەرلىك جەلىلەردى جۇرگىزۋگە بولىنگەن 26 ميلليارد تەڭگەنى يگەرمەۋ جانە ماقساتسىز پايدالانۋ ماسەلەسىن كوپشىلىك الدىنا شىعاردىم. پارلامەنت تريبۋناسىندا ۇكىمەتتەن مەملەكەتتىك جەر كاداسترىن اشىپ, بارلىق جەر يەلەرى مەن جەر پايدالانۋشىلاردىڭ ەسىمدەرىن جاريالاۋدى تالاپ ەتتىم. ۇكىمەتتىڭ قارسىلىعىنا قاراماستان, بۇل ۇسىنىستى زاڭسىز شىعارىلعان اكتيۆتەردى قايتارۋ تۋرالى زاڭ جوبالارىنا جانە جايىلىم ماسەلەلەرى بويىنشا ەنگىزدىم
مەنىڭ دەپۋتات رەتىندە كازينودا بولعانىم تۋرالى جالعان اقپاراتتى تاراتۋشىلاردىڭ باستى كوزدەگەن ماقساتى - حالىق الدىندا بەدەلىمدى ءتۇسىرۋ, مەنى قارالاۋ جانە وسىلايشا جەر قاتىناستارىنداعى سىبايلاس جەمقورلىققا قارسى كۇش-جىگەرىمدى ازايتۋ. بۇل - تازا ارانداتۋشىلىق», دەپ جازدى دەپۋتات.
