ال وسى زاڭ ارقىلى ءبىز زاڭسىز ساتىپ الىنعان اكتيۆتەردى قايتارۋ بويىنشا جاڭا قۇرالدار جيناعىن الامىز. ياعني حالىقارالىق تاجىريبەگە ساي اكتيۆتەردى ازاماتتىق تارتىپپەن ەرىكتى نەمەسە ماجبۇرلەپ قايتارۋعا نەگىزدەلگەن جاڭا راسىمدەر پايدا بولدى.
زاڭدى ازىرلەۋ كەزىندە ۇلىبريتانيا, اقش, گەرمانيا, كانادا, اۋستراليا, باسقا دا ەلدەردىڭ قىلمىستىق ءىس جۇرگىزۋدەن تىس, ياعني ازاماتتىق سوت ءىسىن جۇرگىزۋ شەڭبەرىندە ازاماتتىق تاركىلەۋ ارقىلى مۇلىكتى تاركىلەۋ تەتىكتەرىن قولداناتىن تاجىريبەسى زەرتتەلدى.
ماڭىزدى ىستە, ياعني زاڭسىز اكتيۆتەردى قايتارۋ بارىسىندا اشىقتىق بولا ما دەگەن سۇراق كوپشىلىكتىڭ كوكەيىندە ءجۇر. ونىڭ اشىق بولۋىن قامتاماسىز ەتۋ ماقساتىندا تۇراقتى نەگىزدە جۇمىس ىستەيتىن كوميسسيا قۇرىلادى.
كوميسسيانىڭ نەگىزگى فۋنكتسياسى – زاڭسىز الىنعان اكتيۆتەردى قايتارۋ بويىنشا ۇسىنىستار ازىرلەۋ. بۇل ۇسىنىستاردى ۋاكىلەتتى ورگان قاراۋعا مىندەتتى. ەگەر ناقتى ءبىر ادامنىڭ اكتيۆتەرىنىڭ زاڭدىلىعىنا كۇمان تۋسا, كوميسسيانىڭ ۇسىنىسى بويىنشا ۋاكىلەتتى ورگان مۇنداي ادامدى تىزىلىمگە ەنگىزۋى مۇمكىن. تىزىلىمدە سۋبەكتىلەر جانە ولاردىڭ ۇلەستەس ادامدارى تۋرالى مالىمەتتەر بولادى.
ازاماتتىق تاركىلەۋ جونىندەگى بارلىق نەگىزگى شەشىمدەر كوميسسيا ارقىلى وتەدى. زاڭسىز اكتيۆتەردى تاركىلەۋ سوت شەشىمى بويىنشا عانا جۇزەگە اسىرىلادى. ادامدار ازاماتتىق سوت ءىسىن جۇرگىزۋ شەڭبەرىندە شەشىمدەرگە شاعىمدانا الادى.
وسىلايشا, اكتيۆتەردى قايتارۋعا قويىلاتىن حالىقارالىق ستاندارتتىڭ تالاپتارى قاراپايىم: ءبارى زاڭعا نەگىزدەلۋگە ءتيىس, ءتيىستى ۇدەرىس جۇزەگە اسىپ, سوت تاراپىنان باقىلاۋ جاسالىپ, قوعام ءۇشىن اشىق بولۋى كەرەك.
ماكسيم روجين,
ءماجىلىس دەپۋتاتى
