بۇگىنگى تاڭدا ۇلتتىق ەكونوميكا مينيسترلىگى تۇرعىن ءۇي-كوممۋنالدىق شارۋاشىلىق كاسىپورىندارىنىڭ تاريفتەر مەن ينۆەستيتسيالىق باعدارلامالاردى وزگەرتۋگە قاتىستى (جوندەۋ جۇمىستارى مەن قىزمەتكەرلەردىڭ جالاقىسىن ءوسىرۋ, قاراۋسىز جاتقان جەلىلەردى قاراۋ جانە ت.ب.) 212 ءوتىنىمىن بەكىتتى. سونىڭ ناتيجەسىندە كوممۋنالدىق قىزمەتتەر تاريفتەرىنىڭ وزگەرۋى 10-30%-دى قۇرادى, مۇندا تۇتىنۋشىلار مەن كوممۋنالدىق قىزمەتتەر مۇددەلەرىنىڭ تەڭگەرىمى ەسكەرىلگەن. وسىعان وراي حالىقتىڭ الەۋمەتتىك جاعىنان از قامتىلعان توپتارىنىڭ كوممۋنالدىق قىزمەتتەرگە جۇمسالاتىن شىعىنداردىڭ ءبىر بولىگى وتەلەتىن بولادى. مۇنداي تەتىك مەملەكەتتىك تۇرعىن ءۇي كومەگىن كورسەتۋ اياسىندا كوزدەلىپ وتىر. ول از قامتىلعان وتباسىلارعا نەمەسە ازاماتتارعا كوممۋنالدىق قىزمەتتەر (جىلۋ, ەلەكتر جانە سۋمەن جابدىقتاۋ, بايلانىس, ليفت قىزمەتى جانە ت.ب.) شىعىندارىن وتەۋ ءۇشىن توقسان سايىن تولەنەدى. باستى شارت – تولەم الۋشىنىڭ مەنشىگىندە قازاقستان اۋماعىندا ءبىر عانا باسپانا بولۋى كەرەك نەمەسە ول مەملەكەتتىك تۇرعىن ءۇي قورىنان, جەكە مەنشىك تۇرعىن ءۇي قورىنان جەرگىلىكتى اتقارۋشى ورگان جالداعان باسپانانى جالعا الۋشى (تەڭ جالعا الۋشى) بولۋعا ءتيىس.
تۇرعىن ءۇي كومەگى دەگەنىمىز – از قامتىلعان وتباسىلارعا (ازاماتتارعا) جەكە تۇرعىن ءۇيدى نەمەسە ونىڭ مەملەكەتتىك تۇرعىن ءۇي قورىنان الىنعان نەمەسە جەرگىلىكتى اتقارۋشى ورگان جالداعان ونىڭ ءبىر بولىگىن ۇستاۋعا كەتكەن شىعىندار اراسىنداعى ايىرماشىلىقتى وتەۋ ءۇشىن بەرىلەتىن تولەم جانە قازاقستان رەسپۋبليكاسىنىڭ «تۇرعىن ءۇي قاتىناستارى تۋرالى» زاڭىندا بەلگىلەنگەن تارتىپپەن جەرگىلىكتى وكىلدى ورگاندار بەلگىلەگەن, از قامتىلعان وتباسىلاردىڭ (ازاماتتاردىڭ) وسى ماقساتتارعا ارنالعان شىعىستارىنىڭ شەكتى دەڭگەيى.
يندۋستريا جانە ينفراقۇرىلىمدىق دامۋ مينيسترلىگىنىڭ تۇرعىن ءۇي قاتىناستارى باسقارماسىنىڭ باسشىسى س.ن.جالقۇلدىڭ مالىمدەۋىنشە: «بيىل ۇكىمەت ەنگىزگەن وزگەرىستەرگە سايكەس ەگەر كوممۋنالدىق قىزمەتتەرگە جۇمسالاتىن سوما وتباسىنىڭ نەمەسە ازاماتتىڭ ءبىر ايداعى جيىنتىق تابىسىنىڭ 10%-نان اساتىن بولسا, تۇرعىن ءۇي كومەگى بەرىلەدى. بۇرىن بۇل كورسەتكىش ءار وڭىرگە بايلانىستى 2-20% ارالىعىندا بولعان. بۇل رەتتە جەرگىلىكتى اكىمدىكتەر رۇقسات ەتىلگەن شەكتى دەڭگەيدى 10%-دان تومەندەتۋگە قۇقىلى».
مىسالى, ەگەر وتباسىنىڭ نەمەسە ازاماتتىڭ ءبىر ايداعى جيىنتىق تابىسى 100 مىڭ تەڭگەنى, ال كوممۋنالدىق قىزمەتتەرگە جۇمسالاتىن شىعىنى 15 مىڭ تەڭگەنى (تابىستىڭ 10%-دان استامىن) قۇراسا, وندا ازاماتتىڭ جەرگىلىكتى بيۋدجەت قاراجاتى ەسەبىنەن وتەم الۋعا قۇقىعى بار.
ۇكىمەت بەكىتكەن تۇزەتۋ بولاشاق تۇرعىن ءۇي كومەگىن الۋشىلاردى قامتۋدى ۇلعايتۋعا جانە از قامتىلعان ازاماتتارعا قارجىلىق جۇكتەمەنى ازايتۋعا باعىتتالعان.
جالپى, كەيىنگى 4 جىلدا 174 مىڭنان استام ابونەنتكە تۇرعىن ءۇي كومەگى ءۇشىن جالپى سوماسى 5 ملرد تەڭگە تولەندى. ال وسى جىلدىڭ 6 ايىندا 31 مىڭ وتباسىنا 630,5 ملن تەڭگەگە كومەك كورسەتىلدى.
وسىلايشا, كوممۋنالدىق قىزمەتتەر تاريفتەرى كوتەرىلگەن جاعدايدا وتەماقى ۇلعايادى دا, از قامتىلعان ازاماتتاردىڭ شىعىندارى ۇلعايمايدى. تۇرعىن ءۇي كومەگىن تاعايىنداۋ ءۇشىن ازاماتتار قاجەتتى قۇجاتتار جيىنتىعىن تۇگەندەپ, تۇرعىلىقتى جەرى بويىنشا اكىمدىككە جۇگىنۋى كەرەك. تۇرعىن ءۇي كومەگىن ونلاين-قىزمەت ارقىلى دا, حالىققا قىزمەت كورسەتۋ ورتالىعى ارقىلى دا الۋعا بولادى.
