بيىل وسى دەرت شىعۋى مۇمكىن دەگەن 106 ەلدى مەكەن انىقتالىپ, قازىر ولارداعى تۇرعىن ءۇي اۋماقتارى مەن مال قورالارىنا كەنەگە قارسى «كرەولين ح» ەرىتىندىسى قولدانىلىپ وتىر. وبلىس اكىمى اپپاراتىنىڭ «جۇمىلدىرۋ جانە شۇعىل جۇمىستار ورتالىعى» كمم ديرەكتورىنىڭ مىندەتىن اتقارۋشى باۋىرجان سادىقوۆتىڭ ايتۋىنشا, كوكتەمگى زالالسىزداندىرۋ جۇمىستارىنىڭ ورتاشا تيىمدىلىك كورسەتكىشى 97,2 پايىزدى قۇراعان.
جاڭاعى ەلدى مەكەندەردە 556 مىڭ مال باسى بار. ونىڭ 117 مىڭىنا پرەپاراتتار ەگىلىپ, اۋرۋعا قارسى زالالسىزداندىرۋ جۇمىستارى جۇرگىزىلدى. وبلىستىق ۆەتەريناريا باسقارماسى جۇمسالاتىن پرەپاراتتاردى جوسپارعا سايكەس الدىرتىپ, كەزەڭ-كەزەڭىمەن اۋداندارعا جونەلتىپ جاتىر.
وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ابدىقايىموۆانىڭ ايتۋىنشا, ۋلاۋدان ادا-كۇدە كەتە قويمايتىن كەنەنىڭ ءورشيتىن ۋاقىتى ماۋسىم مەن شىلدە. قازىر قولايسىز دەپ تانىلعان ەلدى مەكەندەردەن باسقا اۋماقتاردا دا قاۋىپتى اۋرۋدىڭ الدىن الۋ شارالارى تۇراقتى جۇرگىزىلۋدە. ۇلتتىق ساراپتاما ورتالىعى وبلىستىق فيليالىنىڭ زەرتحاناسىندا 2 917 كەنە سىناماسى زەرتتەلىپ, جۇقپالىلىق كورسەتكىشى 6,5% بولدى.
بريفينگتە زيانكەستەردى بولدىرماۋدا كەسە كولدەنەڭ تۇراتىن ماسەلەلەر دە ايتىلماي قالمادى. مىسالى, جاندىكتەردى ۋلاۋ ءۇشىن تەندەردى جۇمىلدىرۋ باسقارماسى وتكىزەدى. ارنايى قۇرىلعان جۇمىس توبى مەردىگەر جۇمىسىنا دەزينفەكتسيا كەزىندە تەك مونيتورينگ جاساي الادى. تەكسەرۋ جاساۋعا ەشقايسىسىنىڭ قۇزىرەتى جوق. ال ونىڭ زاردابىن بۇگىنگىدەي جاعداي ۋشىعا قالعاندا جاۋاپكەرشىلىكتى كىمنەن سۇرارىن بىلمەگەن ەل تارتىپ جاتادى.
سوڭعى جىلدارى وسى ماسەلەنى كوتەرىپ كەلە جاتقان ماماندار پروبلەمانىڭ شەشىمى زيانكەستەردى ۋلاۋدى جەرگىلىكتى ۆەتەريناريا باسقارماسىنا بەرۋ ەكەندىگىن ايتادى. بۇل جۇمىستى وڭاي ءارى جەدەل ۇيىمداستىرۋعا مۇمكىندىك بەرەتىن ەدى. بىراق بۇل ۇكىمەتتىك دەڭگەيدە شەشىلەتىن ماسەلە.
ايتەۋىر, بيىل سىردىڭ بويىن وسى قانسورعىش الابوتەن بۋىپ تۇر. توعىزىنشى شىلدە كۇنى كەنە شاققان تاعى ءبىر تۇرعىن كوز جۇمدى. وتىز ەكى جاستاعى بۇل ازامات تا شيەلى اۋدانىنىڭ تۇرعىنى. بۇل – وسى جىلى وبلىستا ۋلى جاندىكتىڭ قۇربانىنا اينالعان ءۇشىنشى ادام.
وسىمەن توقتاسا ەكەن...
قىزىلوردا
