نيدەرلاند تاراپىنىڭ باستاماسىمەن مەملەكەت باسشىسى قاسىم-جومارت توقاەۆ نيدەرلاند پرەمەر-ءمينيسترىنىڭ مىندەتىن اتقارۋشى مارك ريۋتتەمەن تەلەفون ارقىلى سويلەستى.
اڭگىمەلەسۋ بارىسىندا قازاقستان مەن نيدەرلاند اراسىنداعى ينۆەستيتسيالىق جانە ساۋدا-ەكونوميكالىق ىنتىماقتاستىقتىڭ قازىرگى جاي-كۇيى مەن پەرسپەكتيۆالارىنا باسا ءمان بەرە وتىرىپ, ەكىجاقتى كۇن ءتارتىبىنىڭ وزەكتى ماسەلەلەرى قاراستىرىلدى.
نيدەرلاند ەلىمىزدىڭ ەكونوميكاسىنا تىكەلەي ينۆەستيتسيا قۇيۋ جونىنەن ءبىرىنشى ورىندا تۇر. 2022 جىلدىڭ قورىتىندىسى بويىنشا ءوزارا ساۋدا-ساتتىق 26 پايىزعا ارتىپ, 6 ميلليارد دوللارعا جاقىندادى.
مارك ريۋتتە ەكى ەلدىڭ اراسىنداعى قارىم-قاتىناستارعا جوعارى باعا بەردى. ونىڭ ايتۋىنشا, نيدەرلاند قازاقستاندى ورتالىق ازيا ايماعىنداعى نەگىزگى ساۋدا-ەكونوميكالىق جانە ينۆەستيتسيالىق سەرىكتەس رەتىندە قاراستىرادى.
حالىقارالىق كۇن ءتارتىبىن تالقىلاۋ اياسىندا مەملەكەت باسشىسى بەيبىتشىلىك پەن كەلىسىم ءۇشىن بارلىق ەلدىڭ جان-جاقتى ىنتىماقتاستىعىن بۇۇ جارعىسىنىڭ قاعيداتتارىنا ساي جولعا قويۋ ماڭىزدى ەكەنىن ايتتى.
