بۇل بيىل كونگو-قىرىم گەمورراگيالىق قىزباسى دەپ اتالاتىن دەرتتەن كوز جۇمعان ەكىنشى ادام بولىپ وتىر. وسىنىڭ الدىندا شيەلىگە كورشىلەس جاڭاقورعان اۋدانىنان تاعى ءبىر ادام وسىنداي دياگنوزبەن جانساقتاۋ بولىمىندە تىلگە كەلمەي كەتكەن ەدى.
جالپى, جىل باسىنان بەرى وبلىستىڭ مەديتسينالىق مەكەمەلەرىنە كەنە شاققان 600-دەن استام ادام كەلىپتى. ولاردىڭ 23-ءى اۋرۋحاناعا جاتقىزىلىپ, سەگىزىنىڭ دياگنوزى راستالدى. قىزىلوردا وبلىسى بويىنشا سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ابدىقايىموۆانىڭ ايتۋىنشا, ولاردى تىركەگەن ساتتەن باستاپ 12 ساعات ىشىندە جەكە اۋماقتار, مالدار مەن قورالارى دەزينفەكتسيالانادى. بارلىق بايلانىستا بولعان ادامداردى 14 كۇن بويى دارىگەرلەر باقىلاۋىندا ۇستايدى.
جالپى, بيىل كەنە كوپ. اسىرەسە, ءتورت ت ۇلىكتىڭ قاراسى مول جاڭاقورعان مەن شيەلىدەن «قانسورعىش بالە بۋىپ بارادى», دەگەن حابار وقتىن-وقتىن كەلىپ جاتىر. ونى جاقىندا ارىپتەسىمىز داۋرەن سەيىتجان ۇلىنىڭ الەۋمەتتىك جەلىدەگى پاراقشاسىنا جاريالاعان ۆيدەولارىنان دا بايقادىق. شيەلى اۋدانىنداعى قارعالى اۋىلىنىڭ تۇرعىندارى اق ادال مالىنىڭ جاعدايىنا الاڭداپ, جان-جاقتان جانۇشىرىپ كومەك سۇراپ وتىر. «ورىستەن جەلىنىنە قاپتاعان قانسورعىش جاپسىرىپ ورالاتىن سيىردىڭ جايى ابدەن كەتتى» دەسەدى ولار. كەنە بۋعان مالدىڭ جارىتىپ جايىلمايتىنى دا انىق قوي.
تاعى ءبىر ۆيدەوداعى كەنەلەگەن جىلقىنىڭ جاعدايى, ءتىپتى ايارلىق. جارىقتىق قامبار اتا تۇقىمى ادامداردان كومەك سۇراعانداي جانارى جاۋدىرەي قارايدى.
– جىلدا كوكتەم مەن جازدا كەنە ازداپ كەزدەسىپ, ۋلاعان سوڭ بايقالمايتىن. بىراق بيىلعىداي قاپتاپ كەتكەن كەزى ەسىمىزدە جوق. قازىر القاپپەن ءبىر ءجۇرىپ وتسەڭىز, ۇستىڭىزدەن كەمى 20-30 شاقتى كەنە تاباسىز. ورىستەن كەلگەن سيىردىڭ بويىنداعى قانسورعىشتى كرەولين جاعىپ قۇرتامىز. بىراق ەرتەسى قوراعا ءدال سونداي جاعدايدا جەتەدى. ەكى اي بويى كورەسىنى وسى جاندىكتەن كورىپ كەلەمىز, دەيدى قارعالى اۋىلىنىڭ تۇرعىنى اسىلبەك دۇيسەنباەۆ.
قاي ت ۇلىك تۇرىنە دە جايلى جەر سانالاتىن اۋىل تۇرعىندارى كەنەنىڭ كوبەيۋىنە قۇرعاقشىلىق تا اسەر ەتىپ وتىر دەگەندى ايتادى. بۇرىن وسىنداي مەرزىمدە سۋ جاعالايتىن مال ەندى كەنە ۇيالايتىن جىڭعىل مەن شەڭگەلدىڭ, جيدەنىڭ تۇبىنەن پانا تاپقان. شيەلى اۋدانى اكىمدىگى وسى جاعدايدى الەۋمەتتىك جەلىدە جاريالاعان ارىپتەسىمىزگە جاۋابىندا بۇل ماسەلە اۋدان اكىمىنىڭ اۋىل تۇرعىندارىمەن كەزدەسۋى كەزىندە كوتەرىلگەنىن ايتادى. جىل باسىندا ارنايى ماماندار تاراپىنان بارلىق اۋىلدىق وكرۋگتەردە كەنە سىنامالارى الىنىپ, تەك 17 ەلدى مەكەندە ۋلى كەنە انىقتالىپتى. قارعالى مەن قاۋىپتى جاندىكتىڭ جەمىنە اينالعان باسقا دا اۋىلدار بۇل تىزىمدە جوق بولعاندىقتان بۇلاردا زالالسىزداندىرۋ جۇرگىزىلمەگەن.
بىراق كەنەسى قۇرعىر مامانداردىڭ بولجامىن بىت-شىت قىلىپ, اۋىلداعىلاردىڭ اپشىسىن قۋىرىپ بارادى. ەندى اۋدان اكىمدىگى الداعى ۋاقىتتا ءتيىستى باسقارمالارمەن حابارلاسىپ, مامانداردى قايتا جىبەرمەك. ال جاڭاعى 17 ەلدى مەكەندەگى 93 214 باس مال مەن اۋماعى 231 831 شارشى مەتر بولاتىن 6 836 مال قورانى, 285 سۋات پەن شاڭلاقتى «Satti tulik» جشس «كرەولين-ح 5%» پرەپاراتىمەن 2 رەت زالالسىزداندىرىپتى.
ءبىر تاڭعالارلىعى, ماسەلەگە بايلانىستى ءتيىستى ورىنداردىڭ ەشقايسىسى ءالى رەسمي مالىمدەمە جاساعان جوق. يەگىنىڭ استىنداعى اۋىلدىڭ احۋالىن الەۋمەتتىك جەلى ارقىلى باقىلاپ, ەكى ايدان بەرى ات ءىزىن سالماعان اۋدان اكىمدىگىندەگىلەردىڭ نە ويلاعانى بار؟!
ايتپاقشى ارىپتەسىمىزدىڭ جازباسىنا قايتارعان جاۋاپتا «قازاقستان رەسپۋبليكاسىنىڭ «ۆەتەريناريا تۋرالى» زاڭىنىڭ 35-بابىنا سايكەس ءتورت ت ۇلىكتىڭ ەندو-ەكتو پارازيتتەرىنە ۆەتەريناريالىق پرەپاراتتار مال يەسىنىڭ ءوز قاراجاتى ەسەبىنەن جۇرگىزىلەدى, شارۋالار بۇل ءۇشىن اۋداندىق ۆەتەريناريالىق ستانسا مەن ۆەتەريناريالىق پۋنكتتەردىڭ كومەگىنە جۇگىنە الادى» دەگەن دە جولدار بار.
ءوز مالىنان اقشا اياپ وتىرعان اۋىلداعىلار جوق. ولارعا ءدال قازىر قاعازداعى قۇر كەڭەس ەمەس, ماسەلەنىڭ ءمان-جايىن ءتۇسىندىرىپ, باعىت-باعدار بەرەتىن مامان كەرەك. امالى تاۋسىلعان جۇرت, Whats App توپتارى ارقىلى ءبىر-بىرىمەن حابار الىسىپ, ۋلى جاندىككە قارسى جۇمىلا قيمىلداپ جاتىر. وسىدان بولار, ازىرگە مال ءولىمى جوق.
بىراق بۇدان قانسورعىشتىڭ بەتى قايتار ەمەس. بۇل بالەكەت وسى اۋدانداعى جاقاەۆ اۋىلىن دا جاۋلاپ الدى دەگەن حابار جەتتى. ال اۋىلداعىلار ءۇمىت ارتقان ءتيىستى ورىندار سىرعىتپا جاۋاپتان ءارى اسپاي وتىر.
سوندا كەنە بۋعان اۋىلدار كىمنەن كومەك كۇتەدى؟
قىزىلوردا وبلىسى
