وسكەمەندە ونەرلى بالالاردى باۋليتىن ونداعان سۋرەت ۇيىرمەسى بار. سونىڭ ءبىرى – «جۇلدىز» ونەر مەكتەبى. اتالعان مەكتەپ وقۋشىلارى استانا كۇنىنە وراي وتەتىن كورمەگە اپتا بۇرىن دايىندالا باستاعان. وقۋشىلاردىڭ ءبىرى استانا قالاسىنداعى كورىكتى عيماراتتاردى بەينەلەسە, ەندى ءبىرى قيالعا ەرىك بەرگەن.
– كىتاپحانامىز قاي مەرەكەنى بولسىن, ەرەكشە دايىندىقپەن وتكىزەدى. بۇگىنگى مەرەكەلىك باعدارلامادا سۋرەت كورمەسى دە ۇيىمداستىرىلىپ وتىر. بۇعان ءبىز «جۇلدىز» ونەر مەكتەبىنىڭ وقۋشىلارىمەن قاتار «گورنىي رەۋچەي» سۋرەت ۇيىرمەسىنىڭ قىلقالام شەبەرلەرىن تارتتىق. كورمەگە قويىلعان جۇمىستارى تەرەڭ ماعىناعا يە. استانا كۇنىنە وراي وتكىزىلىپ جاتقان كىتاپحانا فويەسىندەگى بۇل كورمە ءبىر اپتاعا سوزىلادى, – دەيدى كىتاپحانا قىزمەتكەرى نازگۇل قىدىروۆا.
ءيا, استانا – حالقىمىزدى بىرىكتىرگەن وتانىمىزدىڭ جۇرەگى جانە ۇلت ماقتانىشى. سونى كورە بىلگەن كىشكەنتاي سۋرەتشىلەر قىلقالام, قارىنداشتىڭ كومەگىمەن ەل استاناسىنا دەگەن سۇيىسپەنشىلىكتەرىن جانە اسەم قالادان العان اسەرلەرىن سۋرەتتەر ارقىلى بەينەلەگەن. سۋرەتشىلەردىڭ ءبىرى استانا ءالى دە قارىشتاي دامي تۇسەدى دەگەندى مەڭزەسە كەرەك, عارىش كەڭىستىگىن بەينەلەگەن. قاراپ تۇرساق, بالالاردىڭ قيالى ۇشقىر, سەزىمى تازا. ايتا كەتەرلىگى, ءدال وسىنداي كورمە وبلىستىڭ وزگە دە كىتاپحانالارىندا ءوتىپ جاتتى.
شىعىس قازاقستان وبلىسى
