«بۇگىن ساعات 13.54-تە 112 پۋلتىنە «ارتۋر» ساۋدا ءۇيىنىڭ شاتىرى قۇلاعانى تۋرالى حابارلاما ءتۇستى. جەرگىلىكتى اتقارۋشى ورگانداردىڭ اقپاراتى بويىنشا قيراندىنىڭ جالپى اۋدانى 300 شارشى مەتردى قۇرايدى. وقيعا ورنىندا پاۆلودار وبلىسى تجد جەدەل-قۇتقارۋ جاساعىنىڭ 8 قۇتقارۋشىسى مەن 2 بىرلىك تەحنيكاسى جانە اپاتتار مەديتسيناسى ورتالىعىنىڭ 3 مەديتسينا قىزمەتكەرى جۇمىس ىستەدى. قۇتقارۋشىلار كونسترۋكتسيانى بولشەكتەۋگە كىرىستى. ولار 1975 جىلى تۋعان ەر ادامدى ءۇيىندىنىڭ استىنان الىپ شىعىپ, جەدەل جاردەم بريگاداسىنا تاپسىردى», دەلىنگەن تجم حابارلاماسىندا.
قۇتقارۋشىلار زارداپ شەككەن ادامدى بلوكتان شىعارۋ ءۇشىن ارنايى گيدراۆليكالىق قۇتقارۋ قۇرالدارىن قولداندى. زارداپ شەككەن ادامدى الىپ شىققاننان سوڭ وقيعا ورنىنا بارلاۋ جۇرگىزىلدى, سونداي-اق جاقىن ماڭداعى 13 اۆتوموبيلدە زارداپ شەككەندەردىڭ بار-جوعى تەكسەرىلدى.
تاعى ءبىر ەر ادامدى جەدەل مەديتسينالىق جاردەم بريگاداسى قۇتقارۋشىلار كەلگەنگە دەيىن اۋرۋحاناعا جاتقىزدى.
