قۇرىلتايعا قاتىسۋشىلار اراسىندا قازاقستاننان كەلگەن ديپلوماتيا ارداگەرلەرى, زيالى قاۋىم وكىلدەرى, قوعام قايراتكەرلەرى مەن تۇركيا جانە رەسەيدەن كەلگەن قانداستار بار.
ارنايى ساپارمەن كەلگەن قوناقتاردى بايان-ولگي ايماعىنىڭ اكىمى كامەليات احماديا ۇلى مەن بايان-ولگي حالقى اۋەجايدان شاشۋ شاشىپ قارسى الدى.
ايماق گۋبەرناتورى كامەليات احماديا ۇلى, ءماسليحات توراعاسى حابىل ءشاريۆ ۇلى باستاعان دەلەگاتسيالار اراسىنداعى كەزدەسۋدە ابزال ساپاربەك ۇلى قازاقستاندىق دەلەگاتسيا قۇرامىن تانىستىرىپ, الداعى 2 كۇندىك كىشى قۇرىلتايدىڭ جەمىستى بولۋىن تىلەدى.
ءوز كەزەگىندە كامەليات احماديا ۇلى «بەرمەسەڭ المايسىڭ! بارماساڭ الىستايسىڭ!» دەمەكشى 10 جىلدان اسا ءۇزىلىپ قالعان موڭعوليا قازاقتارىنىڭ كىشى قۇرىلتايىنىڭ قايتا جالعاسىن تاپقانىنا قۋانىشتى ەكەنىن ايتتى. قازاقستاندىق دەلەگاتسيا قۇرامىندا قر پرەزيدەنتى كەڭەسشىسى مەن سەناتور, دەپۋتاتتاردىڭ بولۋى بۇل ءىس-شاراعا دەگەن ماڭىز بەرۋدىڭ دالەلى دەپ اتاپ ءوتتى. ايماق گۋبەرناتورى ايماقتىڭ ەكونوميكالىق-الەۋمەتتىك جانە حالىقتىڭ تىنىس-تىرشىلىگى تۋرالى كەڭىنەن مالىمەت بەردى.
قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ پرەزيدەنت قاسىم-جومارت كەمەل ۇلىنىڭ ىستىق سالەمىن جەتكىزۋگە ارنايى كەلگەنىن ايتىپ, قازاقستان قاشان دا ىشكى تىنىشتىقپەن قاتار سىرتقى بايلانىستى ۇزبەۋ ساياساتىن نىق ۇستاناتىنىن, سونىمەن قاتار پرەزيدەنتىمىز قاشان دا شەتتە جۇرگەن قانداستارىمىزدىڭ ماسەلەسىن نازاردا ۇستايتىنىن, ولارمەن بايلانىستى نىعايتا تۇسۋگە اسا ءمان بەرەتىنىن ايتتى.
قر ءماجىلىس دەپۋتاتتارى ءۇنزيلا شاپاك, نۇرگۇل تاۋ, جارقىنبەك امانتاي ءوز سوزدەرىندە ەكى ەلدىڭ پارلامەنتارالىق بايلانىستارىندا كۇن تارتىبىندەگى ماسەلەلەر, ەلىمىزدەگى قۇقىقتىق-دەموكراتيالىق رەفورمالار تۋرالى باياندادى.
بايان-ولگي ايماقتىق ءماسليحاتىنىڭ توراعاسى اتا-بابامىز وسى ەلدىڭ وركەندەپ وسۋىنە ۇلكەن ۇلەس قوسىپ, بۇگىندە بايان-ولگي ايماعىنداعى قازاقتاردىڭ ەمىن-ەركىن ءومىر سۇرۋىنە جاعداي جاسادى, سول ءىستى ءارى قاراي جالعاستىرىپ كەلە جاتقانىن ايتىپ, مەملەكەتتەر اراسىنداعى دوستىقتىڭ ماڭىزدىلىعىنا توقتالدى.
سونىمەن قاتار بايان-ولگيدەگى قانداستارمەن رۋحاني-مادەني بايلانىستى ارتتىرۋ ماسەلەلەرى دە تاقىرىپقا وزەك بولدى.
