سارىارقا اۋدانىنداعى گۇلدەر ساياباعىندا ورنالاسقان الاڭنىڭ اشىلۋ سالتاناتىنا اۋدان اكىمى باۋىرجان ەرالى, پارلامەنت دەپۋتاتى ايداربەك قوجانازاروۆ, اسىق اتۋ فەدەراتسياسىنڭ وكىلدەرى مەن ويىن شەبەرلەرى قاتىستى.
ء«بارىمىز بالا كەزىمىزدە اسىق وينادىق. قازىر تەلەفون, گادجەت تۇرلەرى دامىعان زاماندا بالالاردى اسىق ويناۋعا ۇيرەتۋىمىز كەرەك. بۇل الاڭ «Respublica» پارتياسىنىڭ باستاماسىمەن اشىلىپ وتىر. اسىق بارلىق جاستاعى ادامعا قولجەتىمدى ويىن. جاڭا الاڭدار ارقىلى ەلوردادا اسىق وينايتىن جاستار قاۋىمى قالىپتاسادى دەپ ۇمىتتەنەمىن», دەدى سارىارقا اۋدانىنىڭ اكىمى باۋىرجان ەرالى.
بۇل الاڭنىڭ ەرەكشەلىگى – اسىق تاريحى جانە ويىن تۇرلەرى مەن ەرەجەلەرى تۋرالى ماعلۇماتتى ارنايى ەنگىزىلگەن QR-كود ارقىلى بىلۋگە بولادى.
اشىلۋ سالتاناتىندا قاتىسۋشىلار كەزەك-كەزەك اسىق وينادى. اسىق اتۋدان قازاقستان چەمپيونى 16 جاستاعى ارۋجان جاقىپبەك تە ءوز ونەرىن كورسەتتى.
«مەن اسىقتى 4-سىنىپتان بەرى وينايمىن. ۇيدە تەك مەن عانا وسى سپورت تۇرىنە قىزىقتىم. وسى ۋاقىتقا دەيىن ءتۇرلى جارىستارعا قاتىسىپ, جۇلدەلى ورىندارعا يە بولدىم», دەدى ەلوردالىق ارۋجان جاقىپبەك.
