«گەوگرافيالىق تۇرعىدا مەملەكەتتەردىڭ بايلانىسى, كولىك-ترانزيت الەۋەتى, نارىقتىڭ اۋقىمدىلىعى مەن ەكونوميكالاردىڭ ءبىرىن-ءبىرى تولىقتىرۋى شىۇ-نىڭ باسىمدىعى سانالادى. وسىعان قاراماستان, شىۇ اياسىندا 20 جىلدان استام ۋاقىتتان بەرى بىردە-ءبىر ءىرى ەكونوميكالىق جوبانى جۇزەگە اسىرۋ مۇمكىن بولمادى. جوبانى قارجىلىق قولداۋ مەحانيزمدەرىنىڭ بولماۋى – مۇنىڭ ايقىن فاكتورى.
وسىعان بايلانىستى ۇكىمەتتەر باسشىلارىنىڭ كەڭەسىنە بىرلەسكەن ينۆەستيتسيالىق قور قۇرۋ مۇمكىندىگىن قاراستىرۋدى تاپسىرۋدى جانە وسى ماڭىزدى جوبا بويىنشا ۇسىنىستار ايتۋدى ۇسىنامىن. الەمدەگى قارجى ينستيتۋتتارىنىڭ ۇزدىك تاجىريبەلەرىن مەڭگەرگەن «استانا» حالىقارالىق قارجى ورتالىعى شىۇ-نىڭ ايماقتىق جوبالارىنا تىكەلەي جانە پورتفەلدى ينۆەستيتسيا قۇيۋدى ىنتالاندىرۋ ءۇشىن ءتيىمدى پلاتفورما بولا الادى», دەدى مەملەكەت باسشىسى.
سونىمەن قاتار پرەزيدەنت ەكونوميكالىق كووپەراتسيا كوبىنە كولىك-ترانزيت الەۋەتىن ءتيىمدى پايدالانۋعا بايلانىستى بولاتىنىن قوسا ايتتى. مەملەكەت باسشىسىنىڭ ايتۋىنشا, جۇك جەتكىزۋدىڭ ءداستۇرلى تىزبەگىنىڭ ۇزىلۋىنە بايلانىستى زاماناۋي كولىك ينفراقۇرىلىمىن قۇرۋدىڭ جانە جاڭا باسەكەلى باعىتتار اشۋدىڭ ستراتەگيالىق ماڭىزى ارتا ءتۇستى.
- ء«بىر بەلدەۋ, ءبىر جول» مەگا جوباسى مەن ترانسكاسپي حالىقارالىق كولىك باعدارىن جۇزەگە اسىرۋعا بىرلەسە كۇش سالۋ ارقىلى ءبىز «سولتۇستىك – وڭتۇستىك» جانە «شىعىس – باتىس» دالىزدەرىنىڭ مۇمكىندىگىن اشۋدىڭ بارلىق العىشارتىن قالىپتاستىرامىز. ءىس جۇزىندەگى شارا رەتىندە ءىرى ستراتەگيالىق پورتتار مەن لوگيستيكالىق ورتالىقتاردىڭ سەرىكتەستىك جەلىسىن قۇرۋدى ۇسىنامىز. اتالعان مەحانيزمنىڭ ناقتى مودالدىلىعىن ەلدەرىمىزدىڭ ۇكىمەتتەرى قاراستىرا الادى. بۇل ىسكە كولىك جانە تەمىر جول اكىمشىلىكتەرىنىڭ باسشىلارىن قاتىستىرۋ قاجەت», دەدى قاسىم-جومارت توقاەۆ.
