جەتىسۋ وڭىرىنە ارنايى ىسساپارمەن كەلگەن قحر شىڭجاڭ-ۇيعىر اۆتونوميالىق اۋدانىنا قاراستى ىلە قازاق اۆتونوميالىق وكرۋگىنەن دەلەگاتسيانى وكرۋگتىك پارتيا كوميتەتىنىڭ حاتشىسى يان سيۋلي باستادى. كەزدەسۋگە وبلىس اكىمىنىڭ ورىنباسارلارى, باسقارما باسشىلارى, «قورعاس – شىعىس قاقپاسى» ارنايى ەكونوميكالىق ايماعىنىڭ جەتەكشىلەرى قاتىسىپ, شەتەلدىك ارىپتەستەرىمەن كەلىسسوز جاسادى.
جيىندى اشىپ, جۇرگىزگەن وبلىس اكىمى بەيبىت يساباەۆ: «جەر جانناتى جەتىسۋ وبلىسىنا قوش كەلدىڭىزدەر! وزدەرىڭىزبەن جۇزدەسىپ وتىرعانىمىزعا قۋانىشتىمىن جانە العىس بىلدىرەمىن. بۇگىنگى كەزدەسۋدىڭ ماقساتى – ەكى تاراپتى بايلانىستى ودان ءارى جەتىلدىرۋ. جەتىسۋ وبلىسى – ينۆەستيتسيالىق مۇمكىندىگى زور ايماق. وڭىردە 5 ستراتەگيالىق باعىت بويىنشا جاڭا ينۆەستورلار تارتۋ, ءوڭىردىڭ ينۆەستيتسيالىق الەۋەتىن ارتتىرۋ جۇمىستارى جۇرگىزىلۋدە. اتاپ ايتقاندا, اگروونەركاسىپ كەشەنىن دامىتۋ, كولىك جانە لوگيستيكا, تۋريزم, بالامالى ەنەرگەتيكا جانە ونەركاسىپ, ونىڭ ىشىندە جەر قويناۋىن پايدالانۋدى دامىتۋ سالالارى بار», دەپ ايتىلعان سالالاردىڭ جۇمىسىن تانىستىرىپ ءوتتى. سونداي-اق ءوڭىر باسشىسى ەكى ەلدى بايلانىستىرىپ, شەكارادا تۇرعان «قورعاس – شىعىس قاقپاسى» ارنايى ەكونوميكالىق ايماعىنىڭ مۇمكىندىگىنە ەرەكشە توقتالدى. ء«بىزدىڭ ەڭ باستى پەرسپەكتيۆالى باعىتىمىز – ءوڭىرىمىزدىڭ ترانزيتتىك الەۋەتى. ياعني قىتايدان ەۋروپاعا جۇكتى 11 كۇندە جەتكىزۋگە مۇمكىندىك بەرەتىن «باتىس ەۋروپا – باتىس قىتاي» ترانسقۇرلىقتىق اۆتوموبيل جول ءدالىزى ءبىزدىڭ ايماق ارقىلى وتەدى», دەدى ب.يساباەۆ.
ءسوز بارىسىندا ءوڭىر باسشىسى قىتاي ەلىنە جاساعان جۇمىس ساپارىن ەسكە الدى. ايتا كەتەيىك, قازاقستانداعى «قورعاس – شىعىس قاقپاسى» ارنايى ەكونوميكالىق ايماعىن باسقارۋ كومپانياسى» اق, «قازاقستان-قىتاي حالىقارالىق ونەركاسىپتىك قالاسى» جشس جانە قىتاي حالىق رەسپۋبليكاسىنىڭ «حالىقارالىق شەكارا ماڭى ىنتىماقتاستىعى ورتالىعى» ىنتىماقتاستىق تۋرالى مەموراندۋم جاساسقان ەدى. بۇل ءوز كەزەگىندە لوگيستيكانى كەدەرگىسىز دامىتۋعا ىقپال ەتەتىن بولادى.
«قورعاس – شىعىس قاقپاسى» ارنايى ەكونوميكالىق ايماعى قىتاي مەن وڭتۇستىك-شىعىس ازيادان تمد ەلدەرى مەن ەۋروپاعا دەيىنگى ماڭىزدى مارشرۋتتاردىڭ توعىسىندا, گەوگرافيالىق تۇرعىدان ءتيىمدى ورنالاسقان. ارنايى ەكونوميكالىق ايماق اۋماعىنا قۇرعاق پورت, جالپى اۋدانى 5 مىڭ گەكتارعا جۋىق لوگيستيكالىق جانە يندۋستريالىق ايماقتار كىرەدى جانە ولار قاجەتتى ينجەنەرلىك ينفراقۇرىلىممەن قامتاماسىز ەتىلگەن.
جيىندا وبلىس باسشىسى قىتايلىق كومپانيالاردى ايماق ەكونوميكاسىنا ينۆەستيتسيا سالۋعا شاقىرىپ, ەكىجاقتى ارىپتەستىكتى نىعايتۋعا مۇمكىندىك بەرەتىن جانە تيىمدىلىگى جوعارى سالالاردى تانىستىردى.
ودان سوڭ ءسوز العان ىلە قازاق اۆتونوميالىق وكرۋگى پارتيا كوميتەتىنىڭ حاتشىسى يان سيۋلي جەتىسۋ جەرىندەگى جىلىجاي شارۋاشىلىعىنىڭ دامۋىنا, اۋىل شارۋاشىلىعىنا تەحنولوگيا ەنگىزۋ شارالارىنا, ونىڭ ىشىندە تامشىلاتىپ سۋارۋ تەحنولوگياسىن كەڭىنەن قولدانۋعا قىزىعۋشىلىق تانىتىپ, ءوندىرىس پەن تۋريزم سالاسىندا بىرلەسە جۇمىس ىستەۋدىڭ مۇمكىندىگىنە توقتالدى. سونداي-اق ەكى ءوڭىردىڭ اراسىنداعى بايلانىستى بەكىتۋگە قاجەتتى شەكارالىق بەكەتتەردەن ادام وتكىزۋ كولەمىن ۇلعايتۋ ماسەلەسىن قايتا قاراۋدى ۇسىنىس رەتىندە ورتاعا سالىپ, قولعا الىنعان شارالار ەكى تاراپتىڭ ەكونوميكالىق دامۋىنا سەرپىن بەرەرىنە سەنىم ارتتى.
كەزدەسۋ سوڭىندا ەكى تاراپ بىرقاتار قۇجاتقا قول قويىپ, اراداعى بايلانىستى نىعايتۋدىڭ العىشارتىن جاسادى. اتاپ ايتقاندا, وبلىس اكىمىنىڭ ورىنباسارى ەرنات ءبازىل مەن قحر ىلە قازاق اۆتونوميالىق وكرۋگى اكىمىنىڭ ورىنباسارى كەنجەحان دالەلبەك ساۋدا-ەكونوميكالىق ارىپتەستىك تۋرالى كەلىسىمگە, جەتىسۋ وبلىسىنان بارعان دەلەگاتسيانىڭ مامىر ايىنداعى ساپارىنىڭ وتىرىسىنداعى پروتوكولىنا قول قويىپ, قوس تاراپتىڭ ءتيىمدى ارىپتەستىگىنە قاجەتتى جۇمىس توبىنىڭ قۇرامى بەكىتىلدى. ەندى الداعى قارىم-قاتىناسقا قاجەتتى جوبالاردى جۇزەگە اسىرۋدى قۇرامى جاڭادان بەكىتىلگەن جۇمىس توبىن قولعا الىپ, ناقتى كومپانيالارمەن جۇمىس ىستەي باستايدى.
ىلە قازاق اۆتونوميالىق وبلىسىنان كەلگەن دەلەگاتسيا ەكى كۇننىڭ ىشىندە «نۇر جولى» اۆتوكولىك وتكىزۋ بەكەتىنە بارىپ, «قورعاس – شىعىس قاقپاسى» ارنايى ەكونوميكالىق ايماعىنىڭ جۇمىسىمەن, پانفيلوۆ اۋدانىنداعى اۋىلشارۋاشىلىق سالاسىنىڭ دامۋىمەن تانىستى.
جەتىسۋ وبلىسى
