«Qazaqstan barysy» ءتۋرنيرىنىڭ بيىلعى فينالدىق كەزەڭىنە قاتىسقان بالۋاندار سانى بۇعان دەيىنگى جارىستارعا قاراعاندا رەكوردتىق ناتيجەگە جەتتى. ياعني بيىلعى دودادا ەلىمىزدىڭ تۇكپىر-تۇكپىرىنەن كەلگەن 41 بالۋان باس جۇلدە ءۇشىن بەلدەستى. فينالدىق كەزەڭگە جولداما العان بالۋانداردىڭ ەسىمدەرى بەلگىلى بولعان كەزدە-اق قازاق كۇرەسىنىڭ مايتالمان ماماندارى «Qazaqstan barysy-2023» ءتۋرنيرىنىڭ باستى فاۆوريتتەرىنىڭ ءبىرى رەتىندە عالىمجان قىرىقباي ەكەنىن ەرەكشە اتاپ وتكەن بولاتىن. ويتكەنى جامبىلدىق جامپوز وسىعان دەيىنگى تۋرنيرلەردە قاتارىنان ەكى مارتە جۇلدەگەرلەر ساناتىنان كورىنىپ, قولا جانە كۇمىس بەلبەۋدى قانجىعاسىنا بايلاعان ەدى. اتاپ ايتقاندا, 2021 جىلعى فينالدا شىعىس قازاقستان وبلىسىنىڭ بالۋانى داۋرەن نۇرالينوۆكە ەسە جىبەرگەن بولسا, بىلتىر جارتىلاي فينالدا قىزىلوردالىق ماقسات يساعابىلوۆتان جەڭىلىپ قالعان-دى. ءۇشىنشى ورىن ءۇشىن وتكەن بەلدەسۋدە ءنۇرسات تەمىرحانمەن كەزدەسۋى كەرەك ەدى, الايدا قارسىلاسى جاراقاتىنا بايلانىستى بوزكىلەمگە شىعا المادى. ءسويتىپ, عالىمجان قىرىقباي اۆتوماتتى تۇردە قولا جۇلدەگەر اتاندى.
بيىلعى باسەكەدە دە عالىمجان قىرىقباي مىقتىلىعىن دالەلدەپ, ءوز كارەراسىندا ەكىنشى مارتە جارىستىڭ فينالىنا القىنباي جەتتى. ونى فينالدىق باسەكەدە بىلتىرعى ءتۋرنيردىڭ كۇمىس جۇلدەگەرى ماڭعىستاۋلىق نۇرداۋلەت جارىلعاپوۆ قاسقايىپ كۇتىپ تۇرعان ەدى. قوس مىقتى اراسىنداعى كەزدەسۋدىڭ نەگىزگى كەزەڭىندە بالۋانداردىڭ كۇشى تەڭ ءتۇسىپ, جەڭىمپازدىڭ ەسىمى قوسىمشا ۋاقىتتا انىقتالدى. ءبىر مينۋتقا ەسەپتەلگەن بەلدەسۋدىڭ 9-سەكۋندىندا عالىمجان قىرىقباي قارسىلاسىنىڭ جاۋىرىنىن جەر يىسكەتىپ, «Qazaqstan barysy» اتاندى. سونداي-اق ول جارىس ۇيىمداستىرۋشىلارى تاراپىنان «التىن بەلبەۋ» مەن 25 ميلليون تەڭگە اقشالاي جۇلدەمەن ماراپاتتالدى. ال نۇرداۋلەت جارىلعاپوۆ وسىمەن ەكىنشى رەت فينالدا ەسە جىبەرىپ, «كۇمىس بەلبەۋ» مەن 5,5 ميلليون تەڭگە الدى.
ءتۋرنيردىڭ قولا جۇلدەسى پاۆلودار وبلىسىنىڭ وكىلى مۇحتار دالەلحان ۇلىنا بۇيىردى. ول ءۇشىنشى ورىن ءۇشىن وتكەن باسەكەدە تاعى ءبىر «اسكەر بارىسى» جەڭىمپازى مارات بايقامۇروۆتان باسىم ءتۇستى. پاۆلودار وبلىسىنان كەلگەن بالۋانعا «قولا بەلبەۋ» جانە جۇلدە رەتىندە 1,8 ميلليون تەڭگە تابىستالدى.
