حالىقارالىق قوعامداستىقتىڭ ىرگەلى, بەلسەندى قاتىسۋشىسى رەتىندە مەملەكەتىمىز شارتاراپتاعى ۇدەرىستەن تىس قالا المايتىنى تۇسىنىكتى. ءبىرىنشى كەزەكتە, سىرتقى ساياسات سالاسىنىڭ, ۇلتتىق مۇددەنى قورعاۋ جولىندا الەمنىڭ ءار تۇكپىرىندە قىزمەت ەتىپ جۇرگەن ديپلوماتيالىق مايدان وكىلدەرىنىڭ موينىنا جۇكتەلەر جۇكتىڭ سالماعى دا ەسەلەي ارتا تۇسپەك. بارشامىزدىڭ الدىمىزدا مەملەكەتىمىزدى ىمىراشىل, سىندارلى, بەيبىت جانە وركەنيەت جولىمەن ورلەۋىن قامتاماسىز ەتۋدىڭ ابىرويلى پارىزى تۇرعانى ايان.
ەلىمىزدىڭ سىرتقى ىستەر مينيسترلىگى وتىز جىلدىق بەلەستەن ءوتىپ, مەملەكەتتىلىگىمىزدى نىعايتۋ جولىندا جەمىستى قىزمەت ەتىپ كەلەدى. وتكەن كەزەڭ ارالىعىندا بىرنەشە بۋىن الماسۋى تابيعي تۇردە جۇزەگە استى. مۇلدە جاڭا مەكەمەنىڭ ىرگەسىن قالاپ, ونىڭ قىزمەتىن حالىقارالىق قالىپقا تۇسىرۋدە ولشەۋسىز ەڭبەك سىڭىرگەن ءىزاشار اعا بۋىن وكىلدەرىنىڭ ەسىمدەرىن ءاردايىم قۇرمەتپەن ەسكە الامىز.
بۇگىندە توپشىسى بەكىپ, قاناتى قاتايعان وتاندىق ديپلوماتيانىڭ كاسىبي ءھام زيالىلىق كەلبەتىنىڭ ورنىعىپ نىعايۋى كەزىندە وسى سالانى ەكى مارتە باسقارعان قاسىم-جومارت توقاەۆتىڭ ەسىمىمەن تىعىز بايلانىستى. قالامى قارىمدى ديپلوماتتىڭ قولىنان شىققان كۇردەلى دە قىزىقتى ەڭبەكتەرى ءىزباسار ماماندار ءۇشىن حالىقارالىق قاتىناستار سالاسىنىڭ تەرەڭ يىرىمدەرىنە بويلاۋعا مول مۇمكىندىك بەرەتىنى ءسوزسىز. قازىرگى ۋاقىتتا ەلىمىزدىڭ سىرتقى ساياسات سالاسىن باسقارۋ اتالعان سالانى ىشتەن بىلەتىن, ديپلوماتيالىق مەكتەپتىڭ قىر-سىرىن جان-جاقتى مەڭگەرگەن كاسىبي ديپلومات مۇرات نۇرتىلەۋگە سەنىپ تاپسىرىلۋى ارىپتەستەرى اراسىندا ۇلكەن ءۇمىت پەن سەنىم ۇيالاتادى.
الاشتىڭ ارداقتى پەرزەنتى مۇستافا شوقاي «جامان حالىق دەگەن جوق, جامان ادامدار بار; ادامگەرشىلىگى مول مەملەكەت دەگەن بولمايدى, ادامگەرشىلىگى مول ادامدار بولادى» دەپ ايتقانداي, ديپلوماتيانىڭ ءوزى وزگە مەملەكەتتەردەگى نيەتتەس ارىپتەستەردى تاني ءبىلىپ, ولارمەن ءتىل تابىسۋ امالدارىن مەڭگەرۋدە بولسا كەرەك. قادىر اقىن وسيەت ەتكەندەي, ء«وز ءتىلىڭدى قۇرمەتتەي وتىرىپ, وزگە ءتىلدىڭ ءبارىن ءبىلۋىڭ», ەندەشە, عۇمىر بويى وقۋ مەن ىزدەنۋىڭ لازىم, ارينە! انىعىندا, جوعارى وقۋ ورىندارىنان تەوريالىق بىلىممەن كەلگەن جاس مامانداردىڭ ناعىز ءومىر مەكتەبى, بىلىكتىلىككە توسەلۋى كۇندەلىكتى قىزمەت بارىسىندا, ۇجىمداعى, اينالاسىنداعى ارىپتەستەرىمەن قارىم-قاتىناس كەزىندە شىڭدالاتىنى تاعى تۇسىنىكتى.
ەگەمەندىكتىڭ العاشقى ساتتەرىنەن باستاپ قازاقستاننىڭ شەت ەلدەردەگى ديپلوماتيالىق مەكەمەلەرىن بىرنەشە قۇرىلىقتا ونداعان جىل ۇزدىكسىز باسقارىپ, وراسان تاجىريبە جيناقتاعان ايتۋلى تۇلعالار بۇگىندە كورنەكتى مەملەكەت جانە قوعام قايراتكەرلىگى دەڭگەيىنە جەتكەنى حاق. وسىناۋ الەۋەتى اسا زور, بىلىكتىلىگى مەن قابىلەتى جان-جاقتى ءبىر شوعىر ارىپتەسىمىز قازىرگىدەي كۇردەلى كەزەڭدە ەلگە ورالىپ, الەۋمەتتىك, ەكونوميكالىق, ءتىپتى مادەني-عىلىمي ماڭىزدى سالالاردا مەملەكەت باسشىسى ۇسىنىپ وتىرعان كەشەندى رەفورمالاردى جۇزەگە اسىرۋعا سەپتىگىن تيگىزىپ كەلەدى.
مەملەكەت باسشىسى جاقىندا وتكەن ۇلتتىق قۇرىلتايدا سويلەگەن سوزىندە ءاربىر ازاماتتىڭ سانا-سەزىمى جاڭعىرىپ, نيەتى, پيعىلى وزگەرمەسە, جاسالىپ جاتقان رەفورمانىڭ ءبارى بەكەر ەكەنىن تايعا تاڭبا باسقانداي ايقىنداپ بەرگەنى ءمالىم. ۇلتتىڭ رۋحىن جاڭعىرتۋ جولىندا جۇرگەن ۇرپاقتى, ازاماتتاردى قولداۋ تۇبىندە قازاقتىڭ رەنەسسانس داۋىرىنە, ياعني تۇبەگەيلى وزگەرىستەر زامانىنا اكەلەدى. ادىلەتتى قازاقستاندى وتانشىلدىق, ادامگەرشىلىك قاسيەتى جوعارى, كاسىبي مامان, ەل مەن جەرگە جاناشىرلىق سياقتى اسىل قاسيەتتەردى بويىنا سىڭىرگەن ادال ازاماتتار قۇراتىنى, ولاي بولماعاندا, دامۋ كوشىنىڭ سوڭىندا قالىپ, اقىرىندا قۇردىمعا كەتۋىمىز قاۋپىن دە اشىق مالىمدەدى پرەزيدەنت.
ۇلت مۇددەسى جولىنا باستارىن بايگەگە تىككەن الاش قايراتكەرلەرىنىڭ قاسيەتتى ءىسىن ديپلوماتيالىق باعىتتا جالعاستىرىپ, ەلدىگىمىزدىڭ تۇعىرىن نىعايتۋعا ۇلەس قوسقان ايتۋلى تۇلعالار از ەمەس. سىرتقى ساياسات سالاسىنداعى قايىسپاس قارا نارلار شىداس بەرەتىن سالماقتى جۇكتى ابىرويمەن كوتەرىسىپ كەلە جاتقان ارىپتەستەرىم ەريك سۇگىربەكوۆ, ىرىسقالي داۋرەنبەك, تاۋبولدى ۇمبەتباەۆ, ارداق ماديەۆ, بەرىك سادىقوۆ, ءالمۇرات تۇرعانبەكوۆ, دانيار بايتۋرين, گۇلميرا ءسۇلتانالى, سونداي-اق ارابتانۋشى بابىر داۋرەنبەك, پارسى الەمىنىڭ بىلگىرى وڭتالاپ وڭالباەۆ, المانيانى اقتارعان ساكەن حاميدۋللين, قىتايتانۋشى جوشىحان قىراۋباەۆ, وزگە دە بىلىكتى ديپلوماتتار قازاق ەلىنىڭ سىرتقى ساياساتتاعى بەدەلىن اسقاقتاتۋعا ۇلەس قوسىپ كەلەدى.
كەيدە عاسىردان دا ۇزاق كورىنەتىندەي قىسقا مەرزىمدە ەلىمىزدىڭ ىرگەسى بەكىپ, دۇنيەجۇزىلىك قوعامداستىقتىڭ قابىرعالى مۇشەسىنە اينالىپ, ەڭسەسى بيىكتەپ, ابىرويى ارتا ءتۇسۋىنىڭ القالى ىسىنە قوماقتى ۇلەس قوسىپ كەلە جاتقان سىرتقى ىستەر مينيسترلىگىنىڭ بارشا ۇجىمىنىڭ جاۋاپتى دا ابىرويلى قىزمەتىنىڭ كەمەل ناتيجەسىندە وتاندىق ديپلوماتيانىڭ كوكجيەكتەرى ۋاقىت وتكەن سايىن كەڭەيىپ كەلە جاتقانى قۋانتادى.
مۇحتار كارىباي,
ديپلومات
