قارجىلىق مونيتورينگ اگەنتتىگى اتىراۋ وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ شتاب باستىعى بەكبولات انەسوۆتىڭ ايتۋىنشا, جىل باسىنان بەرى قارجى پيراميداسىن قۇرۋعا بايلانىستى 3 دەرەك انىقتالعان.
«دەپارتامەنت قىزمەتكەرلەرى تۇرعىنداردى الداپ-ارباۋدىڭ الدىن الۋ ءۇشىن مونيتورينگ جۇرگىزىپ كەلەدى. مونيتورينگتىڭ ناتيجەسىندە بيىلعى بەس ايدا قارجى پيراميداسىنا قاتىستى 3 دەرەك اشكەرەلەنىپ وتىر. قازىر «Chia Tai Tianging» جانە «InCruises» جشس-عا قاتىستى قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ دەرەگىمەن قوزعالعان قىلمىستىق ءىس تەرگەلىپ جاتىر», دەپ ءمالىم ەتتى بەكبولات انەسوۆ.
ونىڭ ايتۋىنا قاراعاندا, قارجىلىق مونيتورينگ اگەنتتىگى قارجى پيراميداسى رەتىندە ارەكەت ەتۋ كۇدىگىنە ىلىنگەن, سونداي-اق سوت ۇكىمى شىققان ۇيىمداردىڭ كەڭەيتىلگەن ءتىزىمىن جاريا ەتكەن.
«وسىعان بايلانىستى وبلىس تۇرعىندارى مەن قوناقتارىنان تۋىسقاندارى, نە جاقىن تانىستارى قارجى پيراميداسىنىڭ ارەكەتىنەن زارداپ شەكسە, اتىراۋ وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنە حابارلاسۋ سۇرالادى. ازاماتتاردى قىراعى بولۋعا, اقشالاي جيناعىن كۇماندى قارجى ينستيتۋتتارىنا سالماۋعا شاقىرامىز», دەدى ب. انەسوۆ.
