– بۇرىن نەگىزىنەن حات-حابار جانە سالەمدەمەلەر جەتكىزۋمەن اينالىسقان پوشتا قىزمەتى بۇگىندە زاماناۋي باعىتتا قىزمەتىن دامىتىپ جاتىر. «قازپوشتا» اق-نىڭ قازىرگى اياق الىسى قالاي؟
– قازىر الەم بويىنشا پوشتا ارقىلى حات-حابارلار مەن مەرزىمدى باسىلىمدى جەتكىزۋ قىزمەتىنە سۇرانىس تومەندەگەن. بۇل جاعداي ءبىزدى دە اينالىپ وتكەن جوق. ول ءوز كەزەگىندە قارجىلىق الەۋەتىمىزگە اسەر ەتەتىندىكتەن, ءبىز قىزمەتتى ءارتاراپتاندىرۋ بويىنشا جۇمىستى قولعا الىپ جاتىرمىز جانە وسى جولدا ءار كليەنتتىڭ سۇرانىسىنا قۇلاق اسۋعا دايىنبىز. وتكەن جىلعى جۇمىس ناتيجەسىنە توقتالار بولسام, «قازپوشتا»
62 ملن-نان استام گازەت-جۋرنالدى, 38 ملن دانا حات-حابار, 12 ملن-عا جۋىق سالەمدەمەنى جەتكىزدى. 2022 جىلى ءبىز ورتالىق ازياداعى ەڭ ءىرى پوشتا قىزمەتىنىڭ وپەراتورى مارتەبەسىن ساقتاپ قالا الدىق. ايتا كەتەيىك, «قازپوشتا» – 20 مىڭنان استام قىزمەتكەرى بار ۇلكەن كوماندا. ءبىز پوشتا قىزمەتىنەن بولەك قارجىلىق, بروكەرلىك, تسيفرلىق جانە لوگيستيكالىق قىزمەتتى ۇسىنامىز. بۇگىندە 300 مىڭنان استام زاڭدى تۇلعا ءبىزدىڭ قىزمەتىمىزگە جۇگىنەدى. جەكە تۇلعالارعا كەلسەك, شامامەن 7 ملن تۇراقتى كليەنتىمىز بار.
جاڭا قىزمەتتەر سپەكترى تۋرالى ايتساق, وسى جىلى ءبىز گازەتتەر مەن جۋرنالدارعا ونلاين جازىلۋ سەرۆيسىن ىسكە قوستىق. ەندى Post.kz ءموبيلدى قوسىمشاسى ارقىلى كەز كەلگەن ادام مەرزىمدى باسىلىمعا جازىلىپ, پوشتا بولىمشەسىنە كەلمەي-اق تولەم جاساي الادى. سوسىن سالەمدەمەلەر مەن حاتتاردى «كۇنبە-كۇن» جەتكىزۋ سەرۆيسى ىسكە قوسىلدى. بۇل سەرۆيستىڭ سۇرانىسقا يە ەكەنىن اتاپ وتكىم كەلەدى. ازىرگە ول استانادان الماتىعا جانە كەرىسىنشە باعىتتا قولجەتىمدى. تىكەلەي كۋرەرلىك قىزمەتتى قايتا قۇرۋ دا جوسپارىمىزدا بار. تاعى ءبىر جاعىمدى جاڭالىقپەن بولىسكىم كەلەدى. ءبىز «V-Post» ۆيرتۋالدى مەكەنجايلار قىزمەتىن «KazPost Keruen» جاڭا برەندى بويىنشا قايتا قۇرعالى وتىرمىز. ول تۇرعىندارعا ءتۇرلى ەلدىڭ تاۋارلارىنا تاپسىرىس جاساۋعا مۇمكىندىك بەرەدى.
– ورتالىق ازيانىڭ ەڭ ءىرى پوشتا وپەراتورى رەتىندە ايماقتىق لوگيستيكا تىزبەگىندەگى ءرولى قانداي؟
– بىرىنشىدەن, «قازپوشتا» كوپكە سوزىلعان كارانتيننەن كەيىن «قورعاس» شمحو اۋماعىندا بوندتىق قويمانى دامىتۋ باعىتىندا جۇمىس ىستەپ جاتىر. وسى باعىتتا ءبىز سينگاپۋر جانە دۋباي تاجىريبەسىنە سۇيەنەمىز. جالپى, وسىنداي الاڭنىڭ اشىلۋىنىڭ ارقاسىندا ەلىمىزدىڭ ترانزيتتىك الەۋەتىن دامىتىپ, ينۆەستيتسيا تارتۋعا قولايلى جاعداي جاساي الامىز. ال بۇل ءوز كەزەگىندە جاڭا جۇمىس ورىندارىنىڭ اشىلۋىنا مۇمكىندىك بەرەدى. ەكىنشىدەن, ءبىز كومپانيانىڭ دامۋ ۆەكتورىن كۋرەرلىك جانە سالەمدەمەلەردى جەتكىزۋ كولەمىن ارتتىرۋعا باعىتتايمىز. بيىل نەگىزگى ستراتەگيالىق باستامالار ەلەكتروندىق كوممەرتسيانى دامىتۋ سالاسىنا ارنالادى. وسى ورايدا ساپانىڭ جاڭا ستاندارتتارىن ەنگىزىپ, ونى سىناقتان وتكىزەمىز. سودان كەيىن سالىنعان ءار تەڭگەنىڭ تيىمدىلىگىن باعالايمىز.
مەن «قازپوشتانى» ورتالىق ازيا وڭىرىندەگى بارلىق سالەمدەمەگە «قاقپا» رەتىندە كورەمىن. ەگەر قاراپايىم تىلمەن ايتساق, ءبىز «ەسىكتى ايقارا اشىپ», ەل تۇرعىندارىنا الەمنىڭ كەز كەلگەن ماركەتپلەيسىنەن تاۋار ساتىپ الۋ مۇمكىندىگىن ۇسىنىپ, قىسقا مەرزىمدە قولجەتىمدى باعامەن جەتكىزىلىمدى قامتاماسىز ەتۋىمىز قاجەت. بۇل ماقساتتا «قازپوشتا» حالىقارالىق پوشتا بيزنەسىنە باسا ءمان بەرىپ وتىر. ماسەلەن, الەمنىڭ جەتەكشى حالىقارالىق الاڭدارى – «Amazon», «Aliexpress», «Iherb», تاعى باسقالارمەن كەلىسسوز جۇرگىزىپ جاتىرمىز. قازىر قولايلى ينتەرفەيسى بار «QazPost» قوسىمشاسىن ازىرلەۋگە ەڭ ۇزدىك IT ماماندارى ەڭبەكتەنىپ جاتىر. ول كليەنتتەرگە ىڭعايلى سەرۆيستەرى بار قوسىمشاعا اينالادى دەپ سەنەمىن.
– كوپ جاعدايدا قالا تۇرعىندارى ينتەرنەت ارقىلى ساۋدا جاساپ جاتادى, ال اۋىل تۇرعىندارىنا نە ىستەۋ كەرەك؟ وسى رەتتە, اۋىلداعى پوشتا بولىمشەلەرىن قالاي دامىتۋدى كوزدەپ وتىرسىزدار؟
– ەلىمىز بويىنشا بۇگىندە «قازپوشتانىڭ» 2940 بولىمشەسى جۇمىس ىستەيدى. ولاردىڭ ىشىندە 196 بولىمشە سەرىكتەستىك نەگىزدە قىزمەت كورسەتەدى. وسىلايشا, كومپانيا ءوز قىزمەتىمەن بارلىق ەل تۇرعىنىن قامتاماسىز ەتەدى. بولىمشەلەردە ازاماتتار پوشتا جانە قارجىلىق قىزمەتتەردەن بولەك, لوگيستيكالىق, بروكەرلىك, اگەنتتىك جانە e-commerce قىزمەت تەرىن الا الادى.
شىنىندا, اۋىلدىق جەرلەردەگى بولىمشەلەردى ۇستاپ تۇرۋدىڭ پايداسىنان گورى شىعىنى كوپ. ءبىز ءتيىمسىز بولسا دا, اۋىلعا جەتكىزىلىم مارشرۋتتارىن ساقتاپ قالۋعا ءماجبۇرمىز. سەبەبى اۋىل-ايماقتارىندا شامامەن 7 ملن-عا جۋىق ادام تۇرادى. ولارعا دا ساپالى پوشتا, قارجىلىق, اگەنتتىك جانە مەملەكەتتىك قىزمەتتەر ۇسىنىلۋعا ءتيىس. بۇل باعىتتا تەلەمەديتسينانى, وقىتۋ باعدارلامالارىن دامىتۋ, ءتۇرلى سالا بويىنشا كەڭەس بەرۋ, ت.ب. قىزمەتتەردى ىسكە قوسۋ يدەياسى بار. وسى جىلى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قولداۋىمەن, «One Web» كومپانياسى ارقىلى باتىس وڭىرلەردەگى اۋىلدارعا سپۋتنيكتىك ينتەرنەت ورناتۋ بويىنشا العاشقى قاناتقاقتى جوبانى ىسكە قوسامىز. جالپى, ەلەكتروندىق ساۋدا تەك قالالاردا ەمەس, بارلىق جەردە دامۋى كەرەك. كليەنتتە تاۋاردى ەلدىڭ كەز كەلگەن نۇكتەسىنەن 48 ساعات ىشىندە ساتىپ الىپ, قول جەتكىزۋ مۇمكىندىگى بولۋعا ءتيىس.
– سوعان كەڭىرەك توقتالا كەتسەڭىز؟ ماسەلەن, ەلىمىزدىڭ اۋماعىندا عانا ەمەس, الەمنىڭ كەز كەلگەن مەملەكەتىنەن زات ساتىپ الساق, ونى جەتكىزە الاسىزدار ما؟
– قازىرگى كۇنى تانىمال الەمدىك دۇكەندەردىڭ بارلىعى بىردەي ەلىمىزگە جەتكىزىلىم جاسامايدى. سەبەبى ورتالىق ازيا ەلدەرىنىڭ نارىعى شاعىن. جاھاندىق بيزنەسپەن ينتەگراتسياعا ءتۇسۋ ءۇشىن بۇكىل ەل كولەمىندە بەلسەندىلىك تانىتۋىمىز قاجەت. «قازپوشتا» ازاماتتاردىڭ الەمنىڭ كەز كەلگەن نۇكتەسىنەن تاۋارعا تاپسىرىس بەرۋىنە وڭتايلى مارشرۋت جاساي الادى. قازىر شەتەلدەن زاتتى جەتكىزۋ مەرزىمى 45 كۇنگە دەيىن سوزىلسا, بولاشاقتا ءبىز ونى 10-12 كۇنگە دەيىن قىسقارتۋدى كوزدەپ وتىرمىز, ياعني جەتكىزۋ ۋاقىتىن 70%-عا قىسقارتامىز. بۇل تۇرعىدا ءبىز ءوزىمىزدىڭ گەوگرافيالىق ارتىقشىلىعىمىزدى پايدالانامىز – «قازپوشتا» الەمدىك ماركەتپلەيستەر ءۇشىن سۇرىپتاۋ-قويما حابىنا اينالىپ, باتىس پەن شىعىستى بايلانىستىراتىن بولادى.
– «قازپوشتا» جۇمىسىنا قاتىستى گازەت-جۋرنالدار رەداكتسيالارىنىڭ, وقىرمانداردىڭ شاعىمى كوپ. باسىلىمداردىڭ ۋاقىتىندا جەتكىزىلمەيتىنى ايتىلادى. وسىنىڭ سەبەبى نەدە؟ بۇل پروبلەمانى تۇبەگەيلى شەشۋگە بولماي ما؟
– ۋاقتىلى جەتكىزىلمەۋ سەبەبىنىڭ ءبىرى – پوشتاشىلار مەن كۋرەرلەر جالاقىسىنىڭ تومەندىگى, وسىعان بايلانىستى كەيبىر ۋچاسكەلەردە ول ورىندار بوس تۇر. سونىمەن قاتار رەداكتسيالار تاراپىنان باسىلىمداردىڭ باسپادان شىعۋ كەستەسىن بۇزۋ نەمەسە قارجىلىق قيىندىققا بايلانىستى نومىرلەردى بىرىكتىرۋ جاعدايى جيىلەپ كەتتى. ودان بولەك, كەيبىر مەكەنجايلاردا, اسىرەسە جاڭا ۇيلەردە پوشتا جاشىكتەرىنىڭ بولماۋى, ءۇي نومىرلەرىنىڭ دۇرىس كورسەتىلمەۋى, كوپقاباتتى ۇيلەرگە كىرۋگە مۇمكىندىك بولماۋى دا باسىلىمداردىڭ دەر كەزىندە جەتكىزىلمەۋىنە اسەر ەتەدى. بۇل پروبلەمالاردى شەشۋ ءۇشىن جەرگىلىكتى اتقارۋشى ورگاندار م ۇلىك يەلەرىنىڭ بىرلەستىكتەرىمەن بىرلەسىپ, ابونەنتتىك پوشتا جاشىكتەرىن تۇگەندەۋ, كوپقاباتتى تۇرعىن ۇيلەردىڭ كىرەبەرىستەرىنە پوشتاشىلاردىڭ كىرۋى ءۇشىن دوموفوندارعا امبەباپ كىلت بەرۋ جاعىن قاراستىرۋى قاجەت.
– «قازپوشتا» باسپاسوزگە جازىلۋ ناۋقانىن ۇيىمداستىرۋعا نەگە بەلسەنە اتسالىسپايدى؟ بۇرىن جازىلىم ناۋقانىندا گازەتتەرمەن بىرلەسكەن ءىس-شارالار ءجيى وتەتىن. قازىر ونداي ءىس-شارالار نەگە ۇيىمداستىرىلمايدى؟
– «قازپوشتا» ءوز تاراپىنان گازەت-جۋرنالعا جازىلۋ ىسىنە اتسالىسىپ كەلەدى. اتاپ ايتقاندا, جىل سايىن جىلدىق نەمەسە جارتىجىلدىق جازىلۋ ناۋقانى كەزەڭىندە رەسپۋبليكالىق جانە جەرگىلىكتى باسىلىمداردىڭ رەداكتسيالارىمەن بىرلەسىپ, «جازىلۋشىلار كۇنى» سياقتى ءىس-شارالار وتكىزەدى, وندا اكتسيالار, جازىلۋشىلار اراسىندا ۇتىس ويىندارى, باسىلىمدارمەن تانىستىرۋ ءىس-شارالارى قولعا الىنادى. ودان بولەك, جوعارىدا ايتقانىمداي, گازەت-جۋرنالعا ونلاين جازىلۋ تەتىگى ىسكە قوسىلدى. ول «قازپوشتا» سايتى جانە كەز كەلگەن سمارتفونمەن ءموبيلدى قوسىمشا ارقىلى قولجەتىمدى. سونىمەن قاتار جازىلىم تيراجدارىن ۇلعايتۋ ماقساتىندا «قازپوشتا» قىزمەتكەرلەرىن ىنتالاندىرۋ جۇيەسى ازىرلەندى. وسى شارالار الداعى ۋاقىتتا باسپاسوزگە جازىلۋ كولەمىن ارتتىرادى دەپ سەنەمىز.
– اڭگىمەڭىزگە راحمەت.
اڭگىمەلەسكەن
ەسكەندىر زۇلقارناي,
«Egemen Qazaqstan»
