ماسەلەنىڭ ءبارى جۇما كۇنى كەشقۇرىم باستالعان-دى. «ۆاگنەر» جەكە اسكەري كومپانيانىڭ جەتەكشىسى ەۆگەني پريگوجين تەلەگرامداعى ارناسىندا «ادىلدىك جورىعىنا» شىعاتىنىن جاريالادى. مۇنىڭ سەبەبى رەتىندە ول ۆاگنەرلىكتەر لاگەرىنە رەسەي قورعانىس ءمينيسترى سەرگەي شويگۋدىڭ بۇيرىعىمەن قارۋلى كۇشتەر راكەتالىق شابۋىل جاسالۋىن اتاپ ءوتتى. «ۆاگنەر جاك كومانديرلەرىنىڭ كەڭەسى شەشىم قابىلدادى. ەلدىڭ اسكەري باسشىلىعى جۇرگىزىپ وتىرعان ز ۇلىمدىقتى توقتاتۋ كەرەك», دەپ مالىمدەدى ە.پريگوجين.
وسىدان كەيىن ۆاگنەرلىكتەردىڭ اسكەري تەحنيكاسى روستوۆ قالاسىنا بەتتەگەنى حابارلاندى. فەدەرالدى قاۋىپسىزدىك قىزمەتى قارۋلى كوتەرىلىسكە شاقىرۋ بويىنشا قىلمىستىق ءىس قوزعاپ, «زاڭسىز ارەكەتتەردى دەرەۋ توقتاتۋدى» تالاپ ەتتى. رەسەي باس پروكۋراتۋراسى ب ۇلىك ۇيىمداستىرعانى ءۇشىن 12 جىلدان 20 جىلعا دەيىن باس بوستاندىعىنان ايىرۋ جازاسى بار ەكەنىن ەسكەرتتى.
كرەملدىڭ ءباسپاسوز حاتشىسى دميتري پەسكوۆ پرەزيدەنت پۋتين وقيعادان حاباردار ەكەنىن جەتكىزدى. سودان كەيىن ماسكەۋ, روستوۆ جانە بەلگورودتا ارنايى قاۋىپسىزدىك شارالارى قابىلداندى. ماسەلەن, «كرەپوست» جوسپارى جاريالاندى. ىشكى ىستەر مينيسترلىگى, فەدەرالدى قاۋىپسىزدىك قىزمەتى جانە فەدەرالدى جازانى اتقارۋ قىزمەتىنىڭ ماڭىزدى نىساندارى ەرەكشە قورعاۋعا الىندى. روستوۆتان باستاپ ماسكەۋگە دەيىنگى بىرنەشە قالاعا اسكەري تەحنيكا كىرگىزىلدى. ماسكەۋگە باراتىن ۇلكەن تراسسانىڭ بويىنا ارنايى بوگەتتەر ورناتىلدى.
«ۆاگنەر جاۋىنگەرلەرىن ورنى تولماس قاتەلىك جاساماۋعا, ورىس حالقىنا قارسى كەز كەلگەن زورلىق-زومبىلىق ارەكەتىن توقتاتۋعا, پريگوجيننىڭ قىلمىستىق جانە ساتقىندىق بۇيرىعىن ورىنداماۋعا, ونى ۇستاۋعا شاقىرامىز», دەپ مالىمدەدى فەدەرالدى قاۋىپسىزدىك قىزمەتى.
سونداي-اق روستوۆقا بەتتەگەن «ۆاگنەر» كولونناسىنا قورعانىس مينيسترلىگىنە تيەسىلى اسكەر تىكۇشاقتان وق جاۋدىرعانى تۋرالى حابار تارادى. قاقتىعىس كەزىندە جالدامالى اسكەريلەر بىرنەشە تىكۇشاقتى, سونىمەن قاتار ءبىر ۇشاقتى اتىپ قۇلاتقانى ايتىلادى. ساراپشىلاردىڭ ايتۋىنشا, قورعانىس مينيسترلىگى تاراپىنان شامامەن 20-عا جۋىق جاۋىنگەر قازا تاپقان. بۇدان بولەك, روستوۆتاعى جانارماي قويماسى دا وتقا وراندى.
ۆاگنەرلىكتەر روستوۆقا كىرگەننەن كەيىن قالاداعى بىرقاتار ماڭىزدى اسكەري نىساندى باقىلاۋىنا الدى. ە.پريگوجيندى جاقتايتىن بىرنەشە تەلەگرام كانال اسكەريلەر كوتەرىلىسشىلەرگە قارسىلىق كورسەتپەگەنىن, قۇشاق جايا قارسى العانىن حابارلادى. ماسكەۋ قالاسى, ماسكەۋ وبلىسى, ۆورونەج وبلىسىندا تەرروريزمگە قارسى ءىس-قيمىل وپەراتسياسى جاريالاندى.
وسى وقيعادان كەيىن رەسەي پرەزيدەنتى ۆلاديمير پۋتين توتەنشە ۇندەۋ جاساپ, ۆاگنەرلىكتەردىڭ ارەكەتىن تەرروريزمگە بالادى. كرەمل باسشىسى ءوز ءسوزىن «ورىستارعا, اسكەريلەر مەن قۇقىق قورعاۋ ورگاندارىنا, الاياقتىق پەن قوقان-لوققىمەن قارۋلى كوتەرىلىس جولىنا تۇسكەندەرگە» ۇندەيتىنىن اتاپ ءوتتى. «ادەيى ساتقىندىق جولىنا تۇسكەن, قارۋلى ب ۇلىك دايىنداپ, ب ۇلىك جاساعان جانە لاڭكەستىك ءادىستى قولدانعانداردىڭ بارلىعى ءسوزسىز جازاعا تارتىلادى, زاڭ الدىندا جانە حالقىمىزدىڭ الدىندا جاۋاپ بەرەدى», دەدى رەسەي پرەزيدەنتى.
ول جالدامالى جاساقتىڭ ارەكەتىن «تۋ سىرتىنان پىشاق سىلتەگەن» ساتقىندىققا تەڭەپ, جاعدايدى 1917 جىلعى قازانداعى وقيعامەن سالىستىردى. ء«بىز ونىڭ قايتالانۋىنا جول بەرمەيمىز, حالقىمىزدى دا, مەملەكەتتىگىمىزدى دە كەز كەلگەن قاۋىپ-قاتەردەن قورعايمىز», دەدى ۆ.پۋتين.
سونىمەن قاتار كرەمل باسشىسى بىرقاتار مەملەكەتتىڭ پرەزيدەنتتەرىمەن تەلەفون ارقىلى سويلەستى. اتاپ ايتقاندا, قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير پۋتينمەن تىلدەسىپ, سول ەلدەگى احۋال تۋرالى اڭگىمەلەستى. قاسىم-جومارت توقاەۆ قازىر بولىپ جاتقان وقيعا رەسەيدىڭ ىشكى ماسەلەسى ەكەنىن اتاپ ءوتتى. كونستيتۋتسيالىق ءتارتىپ پەن زاڭ ۇستەمدىگى – ەلدەگى قۇقىقتىق ءتارتىپتى ساقتاۋدىڭ باستى شارتى. بۇل – قوعامنىڭ قاۋىپسىزدىگى مەن ونىڭ تابىستى دامۋىنىڭ نەگىزى ەكەنىن جەتكىزدى. ۆلاديمير پۋتين رەسەي فەدەراتسياسىنداعى قالىپتاسقان جاعدايعا قازاقستاننىڭ تۇسىنىستىك تانىتقانى ءۇشىن العىس ايتتى.
بۇدان كەيىن رەسەيدىڭ كوپتەگەن قوعام جانە مەملەكەت قايراتكەرى ەلدى, اسىرەسە جالدامالى جاساق وكىلدەرىن سابىرعا شاقىردى. الايدا ە.پريگوجين توقتامايتىنىن مالىمدەدى. سونداي-اق الەۋمەتتىك جەلىلەردە ۆاگنەرلىكتەر ماسكەۋگە قاراي بەتتەگەنى تۋرالى اقپارات تارادى.
سانكت-پەتەربۋرگ قالاسىندا «ۆاگنەر» ۇيىمىنىڭ وفيسىنە ءتىنتۋ جۇرگىزىلىپ, عيمارات ماڭىنان مول كولەمدە اقشا تيەلگەن جۇك كولىگى, التىن قۇيمالار, ەۆگەني پريگوجينگە تيەسىلى دەلىنەتىن بىرنەشە جالعان قۇجات تاركىلەندى. «Reuters» اگەنتتىگى ۇيىمنىڭ نەگىزىن قالاۋشىلاردىڭ ءبىرى دميتري ۋتكين باستاعان 5 مىڭعا جۋىق جالدامالى سارباز مىنگەن «ۆاگنەر» كولونناسى ماسكەۋدىڭ شەتىنە جاقىنداپ قالعانىن حابارلادى. وسىلايشا, بۇكىل الەم رەسەيدەگى احۋال قالاي وزگەرەتىنىن اسىعا كۇتىپ وتىرعاندا, ە.پريگوجين تەلەگرامدا كەزەكتى اۋديوسىن جاريالادى. وندا ۇيىم باسشىسى كولوننا «ماسكەۋگە جەتپەي, ءبىر كۇندە 200 شاقىرىم جول ءجۇرىپ وتكەنىن», وسى ۋاقىت ىشىندە «جاۋىنگەرلەردىڭ ءبىر تامشى دا قانىن توكپەگەنىن» ايتقان. سونىمەن قاتار جاعدايدى ۋشىقتىرماۋ ءۇشىن «ۆاگنەر» اسكەرى كەرى قايتاتىنىن اتاپ ءوتتى.
كوپ ۇزاماي-اق بەلارۋس پرەزيدەنتى الەكساندر لۋكاشەنكونىڭ ءباسپاسوز قىزمەتى ارنايى مالىمدەمە تاراتىپ, پريگوجينمەن كەلىسىم جاسالعانىن حابارلادى. «كۇنى بويىنا سوزىلعان كەلىسسوزدەر ناتيجەسىندە ەۆگەني پريگوجين الەكساندر لۋكاشەنكونىڭ رەسەي اۋماعىندا «ۆاگنەر» جاساعىنىڭ قوزعالىسىن توقتاتۋ جانە شيەلەنىستى ازايتۋ, ودان ءارى شارالار قابىلداۋ تۋرالى ۇسىنىسىن قابىلدادى», دەلىنگەن. سونداي-اق مالىمدەمەدە جالدامالى جاساققا تاعىلعان بۇكىل ايىپ الىناتىنى, ال ە.پريگوجين بەلارۋسكە باراتىنى ايتىلدى.
ريا نوۆوستي اگەنتتىگىنىڭ حابارلاۋىنشا, رەسەي پرەزيدەنتىنىڭ ءباسپاسوز حاتشىسى دميتري پەسكوۆ ەۆگەني پريگوجينگە قاتىستى قىلمىستىق ءىس توقتاتىلاتىنىن مالىمدەگەن. ال «ۆاگنەر» باسشىسى بەلارۋسكە كەتەتىنىن حابارلادى. «پريگوجيننىڭ بەلارۋسكە كەتە الاتىنىنا رەسەي پرەزيدەنتىنىڭ ءسوزى كەپىل», دەدى د.پەسكوۆ.
بۇدان كەيىن بىرقاتار قالادا اسكەري نىساندى كۇزەتىپ تۇرعان «ۆاگنەر» جالدامالى جاساعىنىڭ جاۋىنگەرلەرى اسكەري تەحنيكاسىنا ءمىنىپ, كەتە باستادى. سونىمەن قاتار جاريالانعان اسكەري جاعداي الىنىپ تاستالدى.
