اسكەري كەڭەستە قر ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆ توراعالىق ءوتتى.
وتىرىسقا ۇلتتىق ۇلاننىڭ ءوڭىرلىك قولباسشىلىقتارىنىڭ قولباسشىلارى, اسكەري ءبولىم كومانديرلەرى مەن ولاردىڭ ورىنباسارلارى قاتىستى.
كۇن تارتىبىنە 2023 جىلدىڭ ءبىرىنشى جارتىجىلدىعىنداعى قىزمەتتىك-جاۋىنگەرلىك ءىس-ارەكەتىن قورىتىندىلاۋ جانە الداعى كەزەڭدەرگە ارنالعان مىندەتتەردى ايقىنداۋ ماسەلەلەرى قارالدى. باس قولباسشى ۇلتتىق ۇلاننىڭ اۋقىمدى جۇمىستارىنا توقتالىپ, بيىلعى مامىر ايىندا وتكەن بۇكىلارميالىق كەڭەس كەزىندە قر پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ بەكىتكەن تاپسىرمالاردىڭ ورىندالۋى جونىندە ءسوز قوزعادى.
ءىس-شارا بارىسىندا ۇلتتىق ۇلان باس قولباسشىسىنىڭ ءبىرىنشى ورىنباسارى – باس شتاب باستىعى گەنەرال-مايور قايرات اقتانوۆ ۇلتتىق ۇلاننىڭ اۆياتسياسى, قىزمەتتىك-جاۋىنگەرلىك ءىس-ارەكەتىن ۇيىمداستىرۋ, ارنايى ماقساتتاعى بولىمشەلەر, تەحنيكامەن قامتۋ, تىلدىق قامتاماسىز ەتۋ شارالارى, ستراتەگيالىق قۇجاتتار, كادرلىق جۇمىستار, سپورتتىق جەتىستىكتەر سەكىلدى جۇمىستار جونىندە بايانداما جاسادى. ونىڭ ايتۋىنشا, ۇلاندىق جاۋىنگەرلەردىڭ پاترۋلدىك-بەكەتتىك قىزمەتى بارىسىندا بارلىعى 978 تاپسىرما ورىندالعان. سونىمەن قاتار ساربازدار اۋقىمدى دەڭگەيدەگى 96 ءىس-شارانىڭ وتۋىنە اتسالىسىپ, 2 742 قۇقىقبۇزۋشىنى قۇرىقتاعان.
سونداي-اق اسكەري كەڭەس اياسىندا «ورتالىق» وڭىرلىك قوبلاسشىلىعى ۇيىمداستىرعان جەدەل دايارلىق بويىنشا ۇلتتىق ۇلان باس قولباسشىسىنىڭ ورىنباسارى گەنەرال-مايور باۋىرجان ءابجانوۆ ءسوز سويلەدى. ال ۇلتتىق ۇلان باس تاربيەشىسى گەنەرال-مايور قايرات ۇمبەتوۆ 6506 اسكەري بولىمىندە وتكىزىلگەن كەشەندى توپتىڭ جۇمىس ناتيجەلەرى بويىنشا بايانداما جاسادى. سونىمەن قاتار وڭىرلىك قولباسشىلىق قولباسشىلارى مەن كەيبىر اسكەري ءبولىم باسشىلارىنا ء سوز بەرىلدى.
جيىن بارىسىندا باس قولباسشى باعىنىستاعى بولىنىستەرىندەگى كەمشىلىكتەرى ءۇشىن كەي كومانديرلەرگە اۋىزشا ەسكەرتۋ جاساسا, ەندى ءبىرىن ۇزدىك ناتيجەلەرى ءۇشىن جوعارى كومانديرلىك لاۋازىمعا تاعايىندادى. اسىرەسە, قىزمەتتىك-جاۋىنگەرلىك ارەكەتتە جوعارى ناتيجە كورسەتكەن كومانديرلەرگە شەكسىز العىسىن ءبىلدىردى. سونىمەن قاتار اسكەري قىزمەتشىلەردىڭ مورالدىق-پسيحولوگيالىق جاي-كۇيىنە, سونداي-اق اسكەري ورتادا زاڭدىلىق پەن قۇقىقتىق ءتارتىپتى ساقتاۋ بويىنشا شارالارعا ەرەكشە نازار اۋداردى.
«جارتى جىلدا اتقارىلعان جۇمىستاردىڭ ناتيجەسى جامان ەمەس. بارلىق جاۋىنگەرلىك قىزمەتتىڭ تاپسىرمالارى ويداعىداي ورىندالدى. جۇمىستار ساپالى اتقارىلعان. جاۋىنگەرلىكقىزمەت پەن اسكەري دايارلىقتار دا ۇدايى جۇرگىزىلىپ وتىر. تىلدىق قامتاماسىز ەتۋ, قارۋ-جاراق پەن تەحنيكا جاعىنان الىپ قاراساق تا ەلەۋلى وزگەرىس بار. مۇنداي وڭ وزگەرىستەر ءالى دە بولادى. سوندىقتان وزدەرىڭىزگە جۇكتەلگەن تاپسىرمالاردى اسقان جاۋاپكەرشىلىكپەن ورىندايسىزدار دەپ سەنەمى», دەدى ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆ.
اسكەري كەڭەستىڭ سوڭىندا جاۋىنگەرلىك قىزمەت پەن جاۋىنگەرلىك دايارلىقتىڭ جانە اسكەري بولىمدەگى زاڭدىلىق پەن تءارتىپتىڭ ناتيجەسى بويىنشا ۇزدىك دەپ تانىلعان اسكەري بولىمدەرءدىڭ كومانديرلەرى ماراپاتتالدى.
ال شاعىن فۋتبول مەن 100 مەتر قاشىقتىقتا سۋعا ءجۇزۋدەن ۇيىمداستىرىلعان سپورتتىق سايىستا جەڭىسكە جەتكەن وفيتسەرلەرگە ماداقتاما كاعازى مەن مەدالدار, كۋبوكتار تابىستالدى.
اسكەري كەڭەس وتىرىسىنىڭ قورىتىندىسى بويىنشا باسشىلىق ەتۋ جانە ورىنداۋ ءۇشىن وڭىرلىك قولباسشىلىقتار مەن اسكەري بولىمدەرگە جىبەرىلەتىن قاۋلى قابىلداندى.
ايتا كەتەيىك, اسكەري كەڭەستىڭ كەزەكتى كەڭەيتىلگەن كوشپەلى وتىرىسى «وڭتۇستىك» وڭىرلىك قوبلاسشىلىعىندا وتەدى دەپ جوسپارلانعان.
