مەملەكەت باسشىسىنا كومپانيانىڭ بيىل ءبىرىنشى جارتىجىلدىقتا اتقارعان وپەراتسيالىق جانە قارجىلىق قىزمەتىنىڭ ناتيجەسى تۋرالى ەسەپ بەرىلدى. سونداي-اق «قازمۇنايگاز» كومپانياسى بىلتىرعى وسى كەزەڭمەن سالىستىرعاندا بارلىق نەگىزگى كورسەتكىش بويىنشا وسىمگە قول جەتكىزگەنى باياندالدى.
«ماعزۇم مىرزاعاليەۆ ءىرى ينۆەستيتسيالىق جوبالاردىڭ جۇزەگە اسىرىلۋ بارىسى, اتاپ ايتقاندا, اتىراۋ وبلىسىندا قۋاتى جىلىنا 1 250 مىڭ توننا پوليەتيلەن وندىرەتىن زاۋىتتىڭ جانە ماڭعىستاۋ وبلىسىنىڭ جاڭاوزەن قالاسىندا جاڭارتىلاتىن ەنەرگيا كوزدەرىن پايدالانۋ ارقىلى جۇمىس ىستەيتىن گيبريدتى ەلەكتر ستانتسياسىنىڭ قۇرىلىسى جونىندە ايتتى», دەلىنگەن اقوردا حابارلاماسىندا.
مەملەكەت باسشىسىنا مۇناي وڭدەۋ زاۋىتتارىنىڭ جۇمىسى, جانار-جاعارماي ماتەريالدارى ءوندىرىسىنىڭ قارقىنى جانە ولاردىڭ قورىن قالىپتاستىرۋ تۋرالى مالىمەت بەرىلدى. اتاپ ايتقاندا, «قازمۇنايگاز» فرانتسيانىڭ Air Liquide كومپانياسىمەن بىرلەسىپ, پاۆلودار مۇناي حيمياسى زاۋىتىندا 160 مىڭ تونناعا دەيىن قىسقى ديزەل وتىنىن وندىرۋگە مۇمكىندىك بەرەتىن جوبانى ىسكە اسىرۋعا نيەتتى.
كەزدەسۋ سوڭىندا قاسىم-جومارت توقاەۆ گەولوگيالىق بارلاۋ جۇمىستارىن دامىتۋ جانە پەرسپەكتيۆتى بارلاۋ ۋچاسكەلەرىن زەرتتەۋ ءۇشىن ءىرى ينۆەستورلار تارتۋ جونىندە بىرقاتار تاپسىرما بەردى.
