قاسىم-جومارت توقاەۆ نۋرلانبەك شاكيەۆكە ءىلتيپات بىلدىرە وتىرىپ, ەكى ەل اراسىنداعى قاتىناستاردى دامىتۋ جانە پارلامەنتارالىق بايلانىستاردى نىعايتۋ ماڭىزدى ەكەنىن اتاپ ءوتتى. ونىڭ ايتۋىنشا, قىرعىزستان – قازاقستان ءۇشىن تاتۋ كورشى, باۋىرلاس مەملەكەت جانە ستراتەگيالىق سەرىكتەس.
كەزدەسۋ بارىسىندا مەملەكەت باسشىسى بۇگىندە قازاق-قىرعىز قارىم-قاتىناسى قارقىندى دامىپ كەلە جاتقانىن, وعان ۇكىمەتارالىق جانە پارلامەنتارالىق دەڭگەيدەگى ءوزارا ءىس-ارەكەت ىقپال ەتەتىنىن اتاپ ءوتتى. سونداي-اق ەكىجاقتى ساۋدا-ەكونوميكالىق ىنتىماقتاستىق جىلدان-جىلعا نىعايىپ كەلە جاتقانىن جانە ەلدەرىمىز اراسىنداعى تاۋار اينالىمىن 2 ميلليارد دوللارعا دەيىن جەتكىزۋ كوزدەلىپ وتىرعانىن ايتتى.
پرەزيدەنت قول جەتكىزىلگەن ۋاعدالاستىقتار ەلدەرىمىز اراسىنداعى ىنتىماقتاستىقتىڭ كوپتەگەن باعىتىنىڭ دامۋىنا تىڭ سەرپىن بەرەتىنىنە سەنىم ءبىلدىردى. سونداي-اق قازاقستان باۋىرلاس قىرعىزستانمەن وداقتاستىق قاتىناستاردى جان-جاقتى نىعايتۋعا نيەتتى ەكەنىنە نازار اۋداردى.
ءوز كەزەگىندە نۋرلانبەك شاكيەۆ كەزدەسكەنى جانە قازاق حالقىنا ءتان قوناقجايلىق كورسەتكەنى ءۇشىن قاسىم-جومارت توقاەۆقا العىس ايتىپ, قىرعىزستان پرەزيدەنتى سادىر جاپاروۆتىڭ ىزگى تىلەگى مەن سالەمىن جەتكىزدى. سپيكەردىڭ ايتۋىنشا, قازاقستان مەن قىرعىزستان بارلىق جاعىنان ەڭ جاقىن ەلدەر سانالادى جانە ءوزارا تۇسىنىستىك پەن قولداۋعا نەگىزدەلگەن جان-جاقتى ىنتىماقتاستىق تەرەڭدەپ كەلەدى. سونىمەن قاتار ول قازاقستاندا جۇرگىزىلىپ جاتقان رەفورمالارعا قولداۋ ءبىلدىردى.
كەزدەسۋدە قازاقستان مەن قىرعىزستان اراسىنداعى مادەني-گۋمانيتارلىق بايلانىستاردى ودان ءارى دامىتۋ ماسەلەلەرى تالقىلاندى.
كەزدەسۋ سوڭىندا مەملەكەت باسشىسى قىرعىزستان پرەزيدەنتىنە ىزگى تىلەگى مەن سالەمىن جولدادى.
