ءىس-شارا باستالعالى 3 كۇننىڭ ىشىندە كوشى-قون زاڭناماسىن بۇزعان 159 قۇقىق بۇزۋشىلىق انىقتالدى. ونىڭ ىشىندە 85 شەتەلدىك ازامات رەسپۋبليكا اۋماعىندا بولۋى ەرەجەسىن بۇزعان, ال 63 قازاقستان ازاماتى شەتەلدىكتەردى قابىلداپ, ۋاقىتىندا پوليتسيا قىزمەتكەرلەرىنە حابارلاما تۇسىرمەگەن.
قازاقستان رەسپۋبليكاسىنىڭ 63 ازاماتى قر اقبتك-ءنىڭ 518-بابى 1-بولىگى بويىنشا, سونىمەن قاتار, شەتەلدىك جۇمىس كۇشىن زاڭسىز جۇمىسقا تارتقانى ءۇشىن 11 وبلىس ازاماتى انىقتالىپ, قر اقبتك-ءنىڭ 519-بابى 1-بولىگى بويىنشا اكىمشىلىك جاۋاپكەرشىلىككە تارتىلدى.
جەكە باسىن كۋالاندىراتىن قۇجاتتارى بولماعان 22 شەتەلدىك ازاماتتار قابىلداپ-تاراتۋ ورتالىعىنا ورنالاستىرىلدى. سوت شەشىمىمەن, ەلدەن تىس جەرگە تىركەۋ مەرزىمى ءوتىپ كەتكەن 9 شەتەلدىك ازامات ءماجبۇرلى تۇردە شىعارىلدى.
ءىس-شارانى وتكىزۋ بارىسىندا بقو پد پوليتسيا قىزمەتكەرلەرى مۇددەلى مەملەكەتتىك ورگاندارمەن بىرلەسە وتىرىپ 2 جىلدان استام ۋاقىتتان بەرى اتىراۋ وبلىسىندا ۆيزاسىز تۇرعان جانە قۇرىلىس الاڭدارىندا جۇمىس ىستەگەن تۇركيا ەلىنىڭ 48 جاستاعى ازاماتىن انىقتادى. ول بىرنەشە كۇن بۇرىن ورال قالاسىنا تويعا كەلگەن كەزدە ۇستالدى. وعان قاتىستى اكىمشىلىك حاتتاما تولتىرىلىپ, ەل اۋماعىنان شىعارۋ تۋرالى سوتتىڭ شەشىمى شىعارىلدى.
ورال قالاسىندا ىشىمدىككە ماساڭ كۇيدە بولعان رەسەي فەدەراتسياسى ازاماتتارىنىڭ باسقارۋىنداعى 2 اۆتوكولىك توقتاتىلدى. ولارعا قاتىستى اكىمشىلىك شارالار قابىلداندى.
