شاراعا 9500 تۇلەك قاتىستى. سونىڭ ىشىندە 286 تۇلەك التىن بەلگىگە, 607 تۇلەك ۇزدىك اتتەستاتقا ءبىتىرىپ جاتىر.
«جالپى مەكتەپ تۇلەكتەرىنە ارنالعان بۇنداي اۋقىمدى شارا تۇڭعىش رەت وتكىزىلىپ جاتىر. بۇل ەڭ بىرىنشىدەن ەلوردانىڭ تۋعان كۇنىنە ارنالادى. شاراعا ارنايى سپيكەرلەر شاقىرىلدى. ءارى تانىمال انشىلەردىڭ قاتىسۋىمەن تۇلەكتەرگە ارنالعان كونتسەرتتىك باعدارلاما جوسپارلاندى. ال بيىلعى وقۋ جىلىنا كەلەتىن بولساق, جىل تابىستى اياقتالدى. وتكەن جىلعا قاراعاندا وقۋ ساپاسى جوعارى. ماسەلەن, بيىل ءبىتىرىپ جاتقان 80 تۇلەك حالىقارالىق دەڭگەيدەگى وليمپيادانىڭ جەڭىمپازى اتاندى. التىن بەلگىگە ۇمىتكەرلەر ءبىلىمىن ابىرويمەن دالەلدەپ شىقتى», دەدى ءبىلىم باسقارماسى باسشىسى قاسىمحان سەنگازيەۆ.
ءىس-شاراعا پارلامەنت سەناتىنىڭ توراعاسى ماۋلەن اشىمباەۆ قاتىسىپ, تۇلەكتەردى ارنايى قۇتتىقتادى.
«قۇرمەتتى جاستار, بۇگىن سىزدەر ءۇشىن وتە ەرەكشە كۇن. سەبەبى سىزدەر ۇلكەن ومىرگە قادام باسىپ جاتىرسىزدار. بۇل كوڭىل تولقىتاتىن, بولاشاققا زور ۇمىتپەن قارايتىن ماڭىزدى ءسات. سىزدەر ۇستازدارىڭىز بەن اتا-انالارىڭىزدىڭ ءۇمىتىن اقتاپ, بيىك بەلەستەردى باعىندىراسىزدار دەپ سەنەمىز», دەدى ماۋلەن اشىمباەۆ.
سونداي-اق سەنات توراعاسى مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىدى.
سونىمەن قاتار بارشا تۇلەك اتىنان سەرىك بەكسۇلتان پەن ادەمى امىرەەۆا قۇتتىقتاۋ ءسوز سويلەپ, العىستارىن ءبىلدىردى.
مەكتەپ تۇلەكتەرىن ارنايى قۇتتىقتاۋعا كەلگەن استانا قالاسىنىڭ اكىمى جەڭىس قاسىمبەك تۇلەكتەرگە ءسات-ساپار تىلەدى.
«ومىرلەرىڭىزدى ەڭ تاماشا, ەڭ ماڭىزدى كەزەڭ - مەكتەپ بىتىرۋلەرىڭىزبەن شىن جۇرەكتەن قۇتتىقتايمىن. بۇگىن مەكتەپ بىتىرسەڭىزدەر, ەرتەڭ ەلدىڭ بولاشاعىن قۇراسىزدار. ءبىز سىزدەردى ماقتانىشپەن «ەلوردا تۇلەكتەرى» دەپ ايتا الامىز», دەدى ول.
شارا بارىسىنداعى ەرەكشە جايت, مەكتەپ تۇلەكتەرى 2050 جىلعى تۇلەكتەرگە ارناپ امانات قالدىردى. تۇلەكتەر جازعان جولداۋ وقۋشىلار سارايىنا تابىستالىپ, 25 جىلدان كەيىن عانا اشىلادى. بۇنى تۇلەكتەر «تاريحي ەستافەتا» دەپ اتادى.
«ەلوردا ماقتانىشى» فورۋم-كونتسەرتىنە عىلىم جانە جوعارى ءبىلىم ءمينيسترى ساياسات نۇربەك تە قاتىستى.
مينيستر ەلىمىزدىڭ عىلىمي باعىتى جايلى ءسوز قوزعاپ, جوعارى ءبىلىم سالاسىنداعى جاڭالىقتاردى ءبولىسىپ, ءىرى سەرىكتەستىكتەر تۋرالى ايتىپ بەردى.
«مەملەكەت باسشىسى گەرمانيا پرەزيدەنتىمەن كەزدەسكەن كەزدە قازاقستاندى ۇلكەن عىلىمي زەرتتەۋ ورتالىققا اينالدىرعىسى كەلەتىن ارمانى بار ەكەنىن ايتتى. سىزدەردىڭ ورتالارىڭىزدا مىقتى ماماندار, عالىمدار وتىرعانىنا سەنىمدىمىن», دەدى ساياسات نۇربەك.
سونداي-اق عىلىم جانە جوعارى ءبىلىم ءمينيسترى تۇلەكتەردى قۇتتىقتاپ, ءوز كەڭەسىن بەردى.
«سىزدەرگە ايتار كەڭەسىم, ءبىرىنشى - ارماندارىڭىز بيىك بولسىن. ادامنىڭ ارمانى بيىك بولماسا, كۇندەلىكتى ومىردە جوعالىپ كەتەدى. ەكىنشى - اعىلشىن ءتىلىن ۇيرەنىڭىزدەر. ويتكەنى بارلىق اقپارات اعىلشىن تىلىندە», دەدى مينيستر.
مەكتەپ تۇلەكتەرى وسىنداي اۋقىمدى شارا ۇيىمداستىرىلعانى ءۇشىن العىستارىن ءبىلدىردى. اباي قۇنانباي ۇلى اتىنداعى 87 مەكتەپ گيمنازياسىنىڭ تۇلەگى, «التىن بەلگى» يەگەرى الماس ايتجانوۆ بۇگىنگى شارا تۋرالى تولقىنىسپەن ايتىپ بەردى.
«بۇگىن مەنىڭ تۋعان كۇنىم. تۋعان كۇنىممەن قاتار كەلىپ جاتقان وسى ۇلكەن تويدىڭ, مەرەكەنىڭ ماڭىزى ەرەكشە. وتە ەرەكشە كەش بولدى. لاۋازىمدى تۇلعالار قۇتتىقتادى. ايگىلى جۇلدىزدار قوناقتا بولدى. سپيكەرلەر كەلىپ, موتيۆاتسيالىق سوزدەرىن ارنادى. بۇل ءبىز ءۇشىن ۇلكەن قۋانىش. ۇلكەن ومىرگە قادام باستىق. جاۋاپكەرشىلىك كوپ. مەن ءوزىم كاسىپكەرلىك باعىتىن تاڭداپ وتىرمىن. شەتەلدە ءبىلىم الىپ, ەلىمە پايدامدى تيگىزگىم كەلەدى», دەدى ول.
