قۇسنيحات – بۇل كوركەم جازۋ ونەرى. «قۇشتارمىن قۇسنيحاتقا جانىم تۇنىپ, حاتكەرگە ءىشىم جىلىر, ءدىلىم ەرىپ, داريعا-اي, سودان ارتىق ءلاززات بار ما, حوش حاتپەن جازساڭ سوزدەن گاۋھار تەرىپ», دەپ قازاقتىڭ اتاقتى اقىنى اسەت نايمانباي ۇلى جىرلاعانداي جازۋدى قىلقالاممەن قۇبىلتىپ, ورنەكتەي ءبىلۋ ۇلكەن ونەر.
«تاريحقا كوز جۇگىرتەك, قۇسنيحات ۇلگىسىنىڭ تاريحى تىم تەرەڭ. ال قازاق دالاسىنا ء امىر تەمىر بيلىگىنىڭ تۇسىندا سامارقاند پەن بۇقارا ارقىلى XV عاسىردا يران ارقىلى كەلگەن. استانا قالاسىندا ورنالاسقان يۋنۋس ەمرە تۇرىك مادەني ورتالىعى 2016 جىلى ەلوردا تورىندە مۋحاررەم گوكچەننىڭ «استانادا قۇسنيحات جانە كالليگرافيا كۇندەرى» اتتى كورمەسىن وتكىزگەن بولاتىن. بۇگىنگى وتكىزىلىپ وتىرعان شارا وسىنىڭ جالعاسى ىستەتتەس» دەيدى اتالمىش مادەني ورتالىق وكىلى الماگۇل يسينا حانىم.
بۇل جولعى كورمە تورىنە قازاقتان شىققان تۇڭعىش ايەل كالليگراف مادينا قۇسايىننىڭ «قىلىش», «قىزعالداق», «تۇڭگى اي», «عالام», «ماحاببات», «كوڭىل گ ۇلى», «عالام» كومپوزيتسياسى, «كەمشىلىكسىز», «گۇلدى تاپقان كوبەلەك», «تاسبيىق» ت.ب. 30 شاقتى تۋىندىسى حالىق نازارىنا ۇسىنىلدى.
– مەن ارقالىق قالاسىنىڭ تۋماسىمىن. قازىر استانادا تۇرامىن. بالا كەزىمنەن سۋرەت سالۋعا قۇمارتتىم. اجەمنىڭ ۇشتاۋىمەن 12 جاسىمنان باستاپ يسلام الەمىنىڭ بايىرعى تۋىندىسى قۇسنيحات جازۋ ونەرىنە اڭسارىم اۋدى. قازىر بۇل ىسكە تولىقتاي بەت بۇردىم. وسى ارالىقتا رەسەيلىك, يراندىق كالليگرافتاردان ساباقتار الدىم. قۇسنيحات ءۇشىن قاجەتتى ماتەريالدار مەن بوياۋلاردى تۇركيادان الدىرتىپ وتىرامىن. بۇگىنگى تاڭدا 200-گە جۋىق تۋىندىم بار. وسى ونەردىڭ ارى قاراي دامۋىنا ءوز ۇلەسىمدى قوسقىم كەلەدى, - دەدى جاس كالليگراف ءمادينا قۇسايىن.
رەتى كەلگەندە ايتا كەتكەن ءجون. قۇسنيحات – سۇلۋلىق, كوركەمدىك دەگەن ماعىنانى بەرەتىن اراب تىلىندەگى «حۇسن» سوزىنەن شىققان. ياعني, يسلام جازۋ مادەنيەتىنىڭ نەگىزى. بۇل جازۋمەن قازىر ەلىمىزدە مەشىت عيماراتىن كوركەمدەۋ كەڭ ءورىس العان.
