سەناتورلار بۇگىن ەلەكتر سكۋتەرلەرىنە جولدىڭ وڭ جاق جولاعىندا, سونىڭ ىشىندە ءبىر جولاقتى اۆتوبۋس جولاعىندا جۇرۋگە مۇمكىندىك بەرەتىن سكۋتەرلەرگە قاتىستى زاڭ جوباسىن ماقۇلدادى. بۇل رەتتە, سكۋتەردىڭ جۇرگىزۋشىسى كەمىندە 18 جاستا بولۋى كەرەك, ول دۋلىعا جانە شاعىلىستىراتىن كيىم كيگەن بولۋى كەرەك, سونداي-اق كەز كەلگەن ساناتتاعى جۇرگىزۋشى كۋالىگى بولۋى كەرەك.
سەنات وتىرىسىندا جۋرناليستەر ەرەجەنىڭ ءبىرىن بۇزسا, سكۋتەر جۇرگىزۋشىسىن قانداي جازا كۇتىپ تۇرعانىن سۇرادى.
«ەندى ەلەكتروسكۋتەر جۇرگىزۋشىلەرى جولاۋشىلار مەن جۇكتەردى تاسىمالداۋ ەرەجەلەرىن ساقتاماعانى ءۇشىن ەكى باپ – اقبتك-ءنىڭ 593-بابى بويىنشا اكىمشىلىك جاۋاپكەرشىلىككە تارتىلىپ, 5 اەك (17 250 تەڭگە) كولەمىندە ايىپپۇل سالىنادى. سونداي-اق جول قوزعالىسىنا قاتىسۋشىلارعا قويىلاتىن باسقا تالاپتاردى بۇزعانى ءۇشىن 620-بابى بويىنشا (بارلىق باسقا قۇقىق بۇزۋشىلىقتار كىرەدى) جاۋاپكەرشىلىككە تارتىلادى. ايىپپۇل كولەمى - 5 اەك», دەدى قايسار سۇلتانباەۆ.
ەسكە سالايىق, زاڭنىڭ نەگىزگى ماقساتى - قالىپتاسقان قۇقىقتىق ولقىلىقتى جويۋ جانە شاعىن ەلەكترلى كولىكتەردىڭ, سونداي-اق ەلەكتر موتوروللەرلەرىنىڭ جۇمىسىن زاڭنامالىق رەتتەۋدى ەنگىزۋ. زاڭ «جول ءجۇرىسى تۋرالى» جانە «رۇقساتتار مەن حابارلامالار تۋرالى» ەكى زاڭعا وزگەرىستەر مەن تولىقتىرۋلار ەنگىزۋدى ۇسىنادى.
