جۋىردا عانا اتالعان جارىستىڭ كاردى تاعى ءبىر قىزىقتى باسەكەمەن تولىقتى. اتاپ ايتساق, سۋپەر جەڭىل سالماقتىڭ (53 كيلو) التىن بەلبەۋىن قازاقتىڭ قوس قىرانى – قازىبەك ساعىن مەن باعدات جۇبانىش ءوزارا ساراپقا سالادى. بۇل ەسىمدەر سپورتسۇيەر قاۋىمعا جاقسى تانىس. 29 جاستاعى قازىبەك الماتىدا ىرگەتاسى قالانعان DAR Pro Team كلۋبىنىڭ نامىسىن قورعايدى. كەزىندە ول – قويان-قولتىق ايقاستان الەمنىڭ ءۇش دۇركىن چەمپيونى اتاندى. ارالاس جەكپە-جەكتەن ءتورت كەزدەسۋ وتكىزىپ, بارلىعىندا ايقىن باسىمدىق تانىتتى. بىلتىرعى جىلدىڭ قاراشا ايىندا اقتوبەدە وتكەن تۋرنيردە ساعىن اعىلشىن فايتەرى دجون شينكتى قىلقىندىرىپ تاستاپ, Naiza ليگاسىنىڭ چەمپيوندىق بەلبەۋىن يەلەندى.
باعدات قازىبەكتەن ەكى جاس كىشى. ول – اقتوبەنىڭ «ەركىن كۇش» كلۋبىنىڭ مۇشەسى. وسىعان دەيىن قازاق سپورتشىسى اۋەسقويلار اراسىندا تابىستى ونەر كورسەتىپ, 10 كەزدەسۋدىڭ بارلىعىندا جەڭىسكە جەتتى. كاسىپقويلاردىڭ سايىسىندا دا جۇبانىش ءوزىن جاقسى قىرىنان كورسەتىپ, ەكى قارسىلاسىن دا «قىلقىندىرۋ» ادىسىمەن جەڭدى. تاعى ءبىر ايتا كەتەرلىگى, قانداسىمىزدىڭ مما-دان ءۇش دۇركىن الەم چەمپيونى دەگەن دارداي اتاعى بار.
جوعارىدا ەسىمدەرى اتالعان قوس ساڭلاق وسىدان بىرنەشە جىل بۇرىن مما-دان وتكەن الەم چەمپيوناتىنىڭ فينالىندا كۇش سىناستى. اسا شيەلەنىستى وتكەن سول جەكپە-جەكتە باعدات جۇبانىش تورەشىلەردىڭ شەشىمىمەن جەڭىسكە جەتكەن ەدى. ەندى ءوزىنىڭ چەمپيوندىق اتاعىن ساقتاپ قالۋ ءۇشىن ول بارىن سالاتىنى انىق. ال قازىبەك ساعىن وسى جولى ءوزىنىڭ مىقتىلىعىن مويىنداتىپ, التىن بەلبەۋدى يەلەنەتىنىنە سەنىمدى. سول سەبەپتى دە بۇل قارىمتا كەزدەسۋ قازاقستاننىڭ بارشا جانكۇيەرىنىڭ ەرەكشە قىزىعۋشىلىعىن تۋدىرىپ وتىر.
