بالا كەزىمنەن كورشى-كولەمگە, مۇمكىندىگى شەكتەۋلى جاندارعا, جان-جانۋارلارعا كومەكتەسۋگە ۇمتىلاتىنمىن. شىنىمدى ايتسام, مەن مۇنى ۆولونتەرلىك دەپ ەسەپتەمەدىم. بۇل ۇعىمنىڭ دا نە ەكەنىن بىلمەدىم. تەك ۆولونتەرلىك قوزعالىس قۇرامىنا قوسىلعان سوڭ عانا, بۇل ىسكە تەرەڭنەن ۇڭىلە باستادىم.
جيعان بىلىمىڭمەن بولىسەسىڭ, كەيىن جانىڭا سەنىمەن رۋحتاس, سەنىمەن ۇندەس ادامدار شوعىرلانا باستايدى. مىنە, بۇل زياتكەرلىك ۆولونتەرلىك دەپ اتالادى. نەگىزى كوپ ادام وزدەرىنىڭ جاساپ جاتقان كومەكتەرىن ەرىكتىلىكپەن اينالىسىپ جاتىرمىن دەپ ەسەپتەمەيدى. سوندىقتان مۇنداي كەڭ اۋقىمداعى فورۋمدار ەرىكتىلىكتىڭ ەرمەك ەمەس ەكەنىن, ونىڭ ءمان-مازمۇنىن جان-جاقتى تۇيسىنۋگە جاردەم بەرەدى.
پاندەميا كەزىندە دە ورتادان قالىس قالمادىق. كوپ ىسكە جان بىتىردىك, دەم بەردىك. ءدارى-دارمەكتەن باستاپ, ەرەكشە جاندارعا اربا تاسۋمەن اينالىستىق. ءبىلىم ادامنىڭ ساناسىنا ماڭگىگە ساقتالادى, ادامدارعا ءومىر بويىنا قالاتىن ازىق قالدىرعىم كەلدى. مەنىڭ قازىرگى باعىتىم – زياتكەرلىك ۆولونتەرلىك.
ايتا كەتەتىن ءبىر ۇسىنىسىم. ەلدەگى ۆولونتەرلىكتە جۇيەلى بايلانىس جوق. ۆولونتەرلىك قىزمەت – ءوز ەركىڭمەن باراتىن قايىرىمدى ءىس-شارا. دەگەنمەن بۇل جۇرەك قالاۋىنىڭ قىزمەتى قازاق حالقىنىڭ قوعامدىق-الەۋمەتتىك ومىرىندە ەجەلدەن كەلە جاتقان – جىلۋ جيناۋ نەمەسە اسار جاساۋ داستۇرلەرىنىڭ تاريحي جالعاسى. تابيعات اپاتىنان نەمەسە وزگە دە باقىتسىزدىق سالدارىنان باسپاناسىنان, مال-مۇلكىنەن ايىرىلعان وتباسىنا اۋىل بولىپ كومەكتەسۋدى قازاقتا «جىلۋ جيناۋ» دەپ تە ايتادى. قوعام مۇنى ۇمىتقان دا سىڭايلى. دەمەك بالا كەزىنەن ءار جانعا بۇل الەمدە جالعىز ەمەس ەكەنىن سەزىندىرەتىندەي تاربيە بەرۋ كەرەك. «جۇمىلا كوتەرگەن جۇك جەڭىل» ەكەنىن ۇعىندىرۋ قاجەت. ءتالىم-تاربيەمەن بويىنا سىڭگەن دۇنيەنىڭ تامىرى ۇزىلمەيدى. ءبىز وسى تۇسىمىزدى شەتەلگە ۇلگى ەتە الامىز.
زاحيرا بەگاليەۆا,
«IteachMe» قورىنىڭ ديرەكتورى, ينكليۋزيۆتى ۆولونتەر
