حالىقارالىق فورۋم بارىسىندا قازاقستاندىق رەجيسەر تيمۋر بەكمامبەتوۆ جۋىردا ءوزىنىڭ ۆولونتەرلىك جوباسىن ۇيىمداستىراتىنىن مالىمدەدى.
«مەنىڭ بالالىق شاعىم اتىراۋدا ءوتتى. سول جەردەگى تانىستارىم شاعىن وڭىرلەر مەن قالالاردان شىققان ادامدار شەتكەرى ايماقتاعى جاستارعا ۇلگى بولا الاتىنىن ايتىپ, ويىما جاقسى يدەيا سالدى. وسى تۇستا قازاقستاننىڭ شاعىن ەلدى مەكەندەرىندە تۋىپ-ءوسىپ, ۇلكەن جەتىستىككە جەتكەن, ەسىمدەرى بۇكىل الەمگە تانىلعان ازاماتتار وتە كوپ. ماسەلەن, ورالدان شىققان ساۋلە وماروۆانىڭ ورنى بولەك. يلون ماسكتىڭ تىڭ جوبالارىنا قاتىسىپ جۇرگەن سانجار تايجاندى دا ەرەكشە اتاپ وتۋگە بولادى. مۇنداعى ۆولونتەرلىك باستامانىڭ يدەياسى – قازاقتان شىققان الەمدىك تۇلعالاردى تۋعان جەرىنە شاقىرىپ, جەرلەستەرىنىڭ جۇرەكتەرىنە ءۇمىت وتىن ۇيالاتۋ, ۇلكەن تاجىريبەسىن, زاماناۋي داعدىلارىن, ەل ىشىندە بولىپ جاتقان جاعدايلارعا قاتىستى پىكىرلەرى مەن ۇسىنىستارىن ورتاعا شىعارۋ. ول ءۇشىن قازاقستاندىق ساياساتكەرلەر مەن ەرىكتىلەر ۇيىمدارىنىڭ قولداۋى اۋاداي قاجەت. سىزدەردى وسى باستامانى قولداۋعا شاقىرامىن», دەدى تيمۋر بەكمامبەتوۆ ءوز سوزىندە.
