بيىلعى جىلدىڭ 23 قاڭتارىنان باستاپ ەلىمىزدە شەتەلدىك كولىكتەردى زاڭداستىرۋ ءجۇرىپ جاتىر. 16 ماۋسىمداعى جاعداي بويىنشا 161 مىڭنان استام كولىك زاڭداستىرىلدى, تاعى 13 مىڭنان استامى تىركەۋدى كۇتىپ تۇر. سونداي-اق 22 مامىردان باستاپ 7 مىڭعا جۋىق اۆتوكولىك-كونسترۋكتور قازاقستاندىق ەسەپكە قويىلدى.
«وزدەرىڭىز بىلەسىزدەر, زاڭداستىرۋدىڭ اياقتالۋىنا ەكى اپتا قالدى (ياعني, 1 شىلدەگە دەيىن). قازىر كوپتەگەن ازاماتتار كولىكتەرىن زاڭداستىرۋعا ۇلگەرمەي قالۋى مۇمكىن دەپ قاۋىپتەنەدى. دەگەنمەن مەن مىنانى ايتقىم كەلەدى. بيىلعى جىلدىڭ 1 شىلدەسىنە دەيىن ءوتىنىش بەرگەن بارلىق قازاقستان ازاماتتارىنا كورسەتىلگەن مەرزىمنەن كەيىن اۆتوكولىكتەردى زاڭداستىرۋ قۇقىعى بەرىلەتىنىن حابارلايمىز», دەدى قر ءىىم اپك توراعاسى قايسار سۇلتانباەۆ.
سونىمەن قاتار ەۋرازيالىق ەكونوميكالىق وداق ەلدەرىندە بۇرىنعى تىركەلگەن جەرى بويىنشا ەسەپتەن شىعارىلماعان جانە وسى سەبەپتى زاڭداستىرىلماعان اۆتوكولىكتەرگە كەلەتىن بولساق, اتالعان كولىك يەلەرىنە ولاردى قازاقستان رەسپۋبليكاسىندا 5 جىل مەرزىمگە ۋاقىتشا ەسەپكە قويۋ قۇقىعى بەرىلەدى.
«بيىلعى جىلدىڭ 1 شىلدەسىنەن باستاپ زاڭداستىرۋعا وتىنىشتەردى قابىلداۋ توقتاتىلادى. زاڭداستىرۋ مەرزىمى ۇزارتىلمايتىنىن ەستەرىڭىزگە سالامىز. ال, قازاقستان رەسپۋبليكاسىنىڭ زاڭناماسىن بۇزا وتىرىپ, شەتەلدە تىركەلگەن اۆتوكولىكتەردى باسقارۋدى جالعاستىراتىن ازاماتتار بولسا, ولارعا قاتىستى ءتيىستى شارالار قولدانىلادى», دەدى ق.سۇلتانباەۆ.
